O merepen anell menge ropen un i bari duk an o dji — job hi har i feindo mendar. Te hi o tsiro jaake dur, lell o Jesus i soor dran o merepen (1. Korintarja 15:26). An i lektiona 27 was tuke sikedo, har o Jehowah kowa krella. Un hoi hi kolentsa, kai meran un kanna mulo hi? An kaja lektiona well tuke sikedo, ap hoi o Jehowah peskro lab das: Job dell bud menshen o djipen pale, te nai djiwenn le bachteles hake tsireske. Nai patsah kowa tchatchepah? Un djiwenn kola, kai wenn djangedo, an o bolepen oder ap i phub?

1. Hoi kamell o Jehowah mare kamle mulenge te krell?

Peskro djiestar kamell o Jehowah i mulen te djangrell. I patslo morsh, leskro lab his Hiob, patsas, kai bistrals o Dewel les gar, te merals job. Job penas ap o Debleste: “Tu dals ap mande gole, un me shunaus un daus [dran o mulengro kheer] pale gole” (Dikenn pal an Hiob 14:13-15).

2. Hoske djinah mer, kai wenn i mule pale djangedo?

Har o Jesus ap i phub his, das o Dewel les koi soor, te djangrell lo mulen pre. O Jesus djangras i tchat, kai his 12 bersha phures, un i morsh tchawes, koleskri dai kek rom buder his (Marko 5:41, 42; Luka 7:12-15). Pal kowa meras o Jeseskro maal, o Lazaro. Job his star diwessa mulo un paskedo, kote rakras o Jesus glan o mulengro kheer i mangepen, un das gole: “Lazaro, am win! Un kowa, kai meras, was win” — job his pale djido (Johanni 11:43, 44). Hawi bacht leskri familjake un leskre malenge kowa hunte his!

3. Hawo latcho lab della kolenge, kai meran?

I bibla penella “kai kolla, kai meran, pale djido wenna” (Bitchepangre 24:15). Har o Jesus ap i phub his, djangras job menshen pre. Kola hins gar an o bolepen (Johanni 3:13). Jon hins bachteles, kai djiwan le pale ap i phub. An o tsiro glan mende dell o Jesus kolen, kai kanna mulo hi, ninna o djipen pale. Jon nai djiwenn an i paradiso kate ap i phub i bachtelo djipen hake tsireske. O Jesus penas, kai wenn i tsele mule, kolen o Dewel gar bistras, djangedo — ninna sawe, kolendar mer gar djinam, kai jon djiwan (Johanni 5:28, 29).

 RODAS DUREDER

4. O Jesus sikras, kai nai djangrell lo i mulen

Hoi kras o Jesus peskro maleske, i Lazareske? Dikenn pal an Johanni 11:14, 38-44, un rakrenn khetne pral:

• Hoske djinah mer, kai hunte his o Lazaro tchatchepah mulo (Dikenn pal an o verso 39)?

• Hoi penals tu: Lals o Jesus i Lazares pale ap i phub, te djiwals lo pal o merepen an o bolepen?

Dikenn o VIDEO.

5. Bud lenn o djipen pale!

Dikenn pal an Gilja 37:29 un Mateo 5:5, un rakrenn khetne pral:

• Kai djiwenn kola bud milliarde menshe, te lenn le o djipen pale?

O Jesus djangrell gar kokres kolen, kai mangan ap i Jehoweste. Dikenn pal an Bitchepangre 24:15, un rakrenn khetne pral:

• Kones kamals tu pale djides te dikell?

• Har das o patsepen ap o djangepen i Phelicitakre eltren soor an o dji?

 HOI KATE PENLO WAS

I bibla penella, kai wenn bud milliarde mule pale djangedo. O Jehowah kamell, te djiwenn le pale un job das i Jeses koi soor, te djangrell lo len pre.

Hoi penals tu?

• Hoske djinah mer, kai kamenn o Jehowah un o Jesus o djiestar, te lenn i mule o djipen pale?

• Kai djiwenn kola bud menshe, te lenn le o djipen pale — ap i phub oder an o bolepen? Hoske peneh tu kowa jaake?

• Hoske patseh tu, kai nai djiwenn tire kamle mule ninna pale?