O merimos varecasco cuci anel amenghe bari duch hai peravel-ame. Anda codoia, i Biblia phenel că o merimos si iech „dușmano”. (1 Corinteni 15:26) Andi lecția 27, deja sichilean că o Iehova va chosela cadale dușmanos. Tha so va avela le manușența cai mule ji acana? Ande cadai lecția va avela te prinjianes mai but anda i șucar promisiunea cai cărdea-la o Iehova: vo va anela pale viațate miliardea manușen, caște train anda sea o timpo. Da, va jiuvindila-le! Chiar daștil te avel ciaces cadai buchi? Cai va avena jiuvindime cadal manușa: ando cerii sau pi phuv?

1. So camel te cherel o Iehova anda codola cuci amenghe cai mule?

O Iehova abia ajucărel te uștiavel pale viațate codolen cai mule. O Iov, iech manuș pherdo pachiamos, pachiaia zurales că o Del ci va avela te bâstrel-les pala so va merela. Vo phendea le Devlesche: „Tu va achareia-ma hai me va avela te răspunzosarav tuche [anda o Mormânto]”. (Citisaren Iov 14:13-15.)

2. Catar jianas că le mule daștin te aven jiuvindime?

Cana o Isus sas-lo pi phuv, o Del dea-les o zuralimos te jiuvindil le manușen. O Isus andea pale viațate iecha șeia cai sas-la 12 bărșa hai le șiaves iecha phivleache. (Marcu 5:41, 42; Luca 7:12-15) Pala codoia, vi o Lazăr, le Isusosco amal, mulea. Chiar cana o Lazăr sas mulo hai prahome de ștar ghiesa, o Isus ușteadea-les andal mule. Pala soste manglea-pe le Devlesche, o Isus dea cingar zurales: „Lazăr, av avri!”. Hai ‘o manuș cai sas mulo avilea avri’. O Lazăr sas jiuvindime! (Ioan 11:43, 44) De chi sama so bari bucuria sas mașcar le amala hai i familia le Lazăroschi!

3. So speranța si anda codola cuci amenghe cai mule?

I Biblia phenel: „Va avela iech jiuvindimos”. (Faptele 24:15) Codola cai sas jiuvindime cana o Isus sas-lo pi phuv ci vazdile co cerii. (Ioan 3:13) Von sas bucurime că o Isus jiuvindisardea-le cade pi phuv. Sa cadea, na pa but timpo, o Isus va jiuvindila miliardea manușa caște train anda sea o timpo ando paradiso pi phuv. O Isus phendea că o Del va jiuvindila sea codolen cai sile ande leschi goghi, chiar cana niciech manuș ci mai anel pesche amintea lendar. (Ioan 5:28, 29)

 HACHIAR MAI MIȘTO

4. O Isus sicadea că daștil te jiuvindil codolen cai mule

Sichio mai but anda so cărdea o Isus anda pesco amal o Lazăr. Citisaren Ioan 11:14, 38-44 hai pala codoia den duma:

• Catar jianas că o Lazăr sas ciaces mulo? (Dich o verseto 39.)

• Dacă o Lazăr avileas te jial ando cerii, pachias că o Isus camelas te anel-les pale viațate pi phuv?

Dichen o MATERIALO VIDEO.

5. Va avena jiuvindime but manușa!

Citisaren Psalmo 37:29 hai pala codoia den duma:

• Cai va traina le miliardea manușa cai va avena jiuvindime?

O Isus va jiuvindila vi avere manușen, na numai codolen cai andine închinarea le Iehovasche. Citisaren Faptele 24:15 hai pala codoia den duma:

• Cas ajucăres anda sea o ilo te diches pale viațate?

• Sar zuriardea o pachiamos ando jiuvindimos o ilo le dadengo cai hasarde penga șeiorra, i Phelicity?

 SO SICHILEAM

I Biblia phenel că miliardea manușa cai mule va avena jiuvindime. O Iehova camel ca von te train, anda codoia dea le Isusos o zuralimos te anel-le pale viațate.

So dichleam

• Catar jianas că o Iehova hai o Isus de-abia ajucăren te anen pale viațate codolen cai mule?

• Cai va traina le miliardea manușa jiuvindime: ando cerii sau pi phuv? Sostar pachias cadaia?

• Tu sostar pachias că codola cuci cai hasardean-le ando merimos va daștina te train pale?