A lifu dzri hi yentxa hi twa ku vavisa hi tlhela hi xaniseka. Hi leswo swi yentxaka Bibele dzri hlaya leswaku a lifu i nala. (1 Ba-le-Korite 15:26) Ka xidondzro 27, u dondzre leswaku Yehovha a ta helisa nala lweyo. Kambe ku ta yentxeka yini hi vhanu lava kutani va fiki? Ka xidondzro lexi, u ta dondzra hi xidumbiso xin’wana xa ku nyonxisa lexi Yehovha a xi hi dumbisiki xone, ku nga ku pfuxa vhanu va ntsrandzravahlayi akuva va hanya hi lani ku nga helikiki. Xana leswo swi ta yentxeka hakakunene? Loko va pfuxiwa, xana va ta hanya a tilweni kumbe a misaveni?

1. I yini leswi Yehovha a djulaka ku yentxela maxaka ni vanghanu vezru lava va fiki?

Yehovha a swi djula ngopfu ku pfuxa vhanu lava fiki. Wanuna wa ku dumbeka lweyi a vitaniwaka Yobe, a a tiyiseka leswaku Xikwembu Nkulukumba a a nge ti mu dzrivala ntsrhaku ka loko a file. Yene a byele Xikwembu Nkulukumba a ku: ‘U ta ndzri vitana, . . . ndzri ta ku yangula [a Sizreni].’—Dondzra Yob 14:13-15.

2. Hi swi tivisa kuyini leswaku vafi va ta pfuxiwa?

Nkama lowu Yesu a a li lani misaveni, Xikwembu Nkulukumba a mu nyike ntamu wa ku pfuxa vhanu lava fiki. Hi xikombiso, Yesu a pfuxe xin’hwanyatana lexi a xi ni 12 wa malembe a tlhela a pfuxa ni n’wana wa djaha wa wansati wa kukazri lweyi a feliwiki hi nuna. (Marka 5:41, 42; Luka 7:12-15) A tlhele a pfuxa munghanu wake Lazaru. Nambileswi Lazaru a a ni mune wa masiku na a file a tlhela a lahliwa, Yesu a mu pfuxile. Yesu a khongote ka Papayi wake, a gama a ku: “Lazaru, humela handle.” Hi loko “a mufi a huma”. Lazaru a tlhele a hanya! (Yohan 11:43, 44) Yanakanya ku nyonxa loku vanghanu ni maxaka ya Lazaru va viki na kone!

3. He dzrini dumbo ledzri vanghanu vaku ni maxaka yaku lama fiki va nga na dzrone?

A Bibele dzri dumbisa leswi: ‘Ku ta va ni ku pfuka ka lava ku fa.’ (Amintiṛo 24:15) Vhanu lava Yesu a va pfuxiki a nkameni lowu khalutiki a va yanga tilweni. (Yohan 3:13) Vone va nyonxile hi ku tlhela va hanya lani misaveni. Hi ndlela leyi fanaka, ku nga li khale Yesu a ta pfuxa vhanu va ntsrandzravahlayi akuva va hanya hi lani ku nga helikiki a paradeyisini lani misaveni. Yene a hlaye leswaku ‘hinkwavu lava nga masizreni’ va ta pfuxiwa. Leswi hlayaka leswaku hinkwavu lava nga miyanakanywini ya Xikwembu Nkulukumba va ta pfuxiwa, nambi lava swi tikombaka ingiki va dzrivaliwile.—Yohan 5:28, 29.

 KELISISA

4. Yesu a swi kombisile leswaku a nga va pfuxa vafi

Dondzra leswi yengetelekiki mayelanu ni leswi Yesu a swi yentxeliki munghanu wake Lazaru. Dondzrani Yohan 11:14, 38-44, mi gama mi bulisana hi swivutiso leswi landzrelaka:

• Hi swi tivisa kuyini leswaku Lazaru a a file hakunene?—Vonani ndzrimana 39.

• Yesu a pfuxe Lazaru akuva a tlhela a hanya lani misaveni. Loko Lazaru e e ya tilweni, u vona leswaku Yesu a a ta swi yentxa leswo?

Vonani VIDHIYU.

5. Vhanu vanyingi va ta pfuxiwa!

Dondzrani Amapsalma 37:29, mi gama mi bulisana hi xivutiso lexi landzrelaka:

• Xana vhanu va tsrandzravahlayi lava taka pfuxiwa va ta hanya kwini?

Handle ka ku pfuxa malandzra ya ku dumbeka ya Yehovha, Yesu a ta pfuxa ni vhanu van’wana va vanyingi. Dondzrani Amintiṛo 24:15, mi gama mi bulisana hi xivutiso lexi landzrelaka:

• I mani lweyi u navelaka leswaku a pfuxiwa?

• Xana vapswali va Phelicity va txhaveleliwe ni ku tiyisiwa hi ndlela yini hi dumbo dzra ku pfuxiwa ka vafi?

 NKATSRAKANYU

Bibele dzri dumbisa leswaku vhanu va ntsrandzravahlayi lava va fiki va ta tlhela va hanya. Yehovha a djula leswaku va tlhela va hanya nakone a nyike Yesu ntamu wa ku swi yentxa leswo.

Mpfuxeto

• I yini leswi Yehovha na Yesu va djulaka ku swi yentxela vhanu lava va fiki?

• Xana vhanu va ntsrandzravahlayi lava taka pfuxiwa va ta hanya a tilweni kumbe a misaveni? Ha yini u hlaya leswo?

• Xana wa kholwa leswaku vhanu lava u va zrandzraka va ta tlhela va hanya? Ha yini?