අපි ආදරේ කරන කෙනෙක් මිය ගියාම අපිට දැනෙන්නේ ලොකු දුකක්. ඒකයි බයිබලයේ කියන්නේ මරණය සතුරෙක් කියලා. (1 කොරින්ති 15:26) යෙහෝවා දෙවියන් මරණය කියන සතුරාව නැත්තටම නැති කරනවා කියලා ඔයා 27වෙනි පාඩමෙන් දැනගත්තා. ඒත් දැනටමත් මිය ගිහින් ඉන්න අයට මොකද වෙන්නේ? ඒ අය ගැන යෙහෝවා දීලා තියෙන ලස්සන පොරොන්දුවක් ගැන මේ පාඩමෙන් ඉගෙනගන්න පුළුවන්. ඔහු පොරොන්දු වෙනවා මිය ගිය බිලියන ගාණක් දෙනෙක්ව නැවත නැඟිටුවනවා කියලා. ඒ කියන්නේ එයාලට ආයෙත් ජීවිතය දීලා හැමදාටම ජීවත් වෙන්න ඔහු අවස්ථාව දෙනවා කියලා. ඒ පොරොන්දුව අපිට ඇත්තටම විශ්වාස කරන්න පුළුවන්ද? එයාලට ආයෙත් ජීවත් වෙන්න ලැබෙන්නේ මේ පොළොවේද නැත්නම් ස්වර්ගයේද?

1. මිය ගිය අය වෙනුවෙන් යෙහෝවා කරන්න ආසාවෙන් ඉන්නේ මොනවාද?

මිය ගිහින් ඉන්න අපේ පවුලේ අයට, යාළුවන්ට ආයෙත් ජීවිතය දෙන්න යෙහෝවා දෙවියන් ගොඩක් ආසාවෙන් බලාගෙන ඉන්නවා. යෝබ් දෙවියන්ට විශ්වාසවන්තව හිටපු කෙනෙක්. එයා මැරුණත් යෙහෝවාට එයාව අමතක වෙන්නේ නැහැ කියලා යෝබ්ට ලොකු විශ්වාසයක් තිබුණා. “ඔබ මට අඬගසන්නෙහිය. මමද [මිනී වළේ සිට] උත්තර දෙන්නෙමි” කියලා එයා දෙවියන්ට කිව්වේ ඒ නිසයි.—යෝබ් 14:13-15 කියවන්න.

2. මැරුණු අයට ආයෙත් ජීවිතය ලැබෙනවා කියලා විශ්වාස කරන්න පුළුවන් ඇයි?

යේසුස් පොළොවේ ඉද්දී යෙහෝවා ඔහුට බලය දුන්නා මැරුණ අයට ආයෙත් ජීවිතය දෙන්න. ඔහු අවුරුදු 12ක දැරියක්වත් වැන්දඹුවකගේ පුතාවත් නැවත නැඟිටෙව්වා. (මාක් 5:41, 42; ලූක් 7:12-15) පස්සේ කාලෙක යේසුස්ගේ යාළුවෙක් වුණ ලාසරුස් මිය ගියා. එයා මැරිලා දවස් 4ක් ගත වෙලා තිබුණත් යේසුස් එයාට ආයෙත් ජීවිතය දුන්නා. ඒ වෙලාවේ යේසුස් දෙවියන්ට යාච්ඤා කරලා හඬ නඟලා මෙහෙම කිව්වා. “ලාසරුස්, පිටතට එන්න.” එතකොට ‘මිය ගිහින් හිටපු [ලාසරුස්] පිටතට ආවා.’ (යොහන් 11:43, 44) එයාගේ පවුලේ අය, යාළුවන් කොච්චර සතුටු වෙන්න ඇද්ද!

3. මිය ගිහින් ඉන්න ඔයාගේ පවුලේ අය, යාළුවන් ගැන දෙවියන් පොරොන්දු වෙන්නේ මොනවාද?

මැරුණ අය “නැවත නැඟිටිනවා” කියලා බයිබලයේ පොරොන්දු වෙනවා. (ක්‍රියා 24:15) යේසුස් නැවත නැඟිටවපු කිසිම කෙනෙක් එයාලව මේ පොළොවේ නැවත නැඟිටුවන්න කලින් ස්වර්ගයට ගිහින් තිබුණේ නැහැ. (යොහන් 3:13) පොළොවේ ආයෙත් ජීවත් වෙන්න ලැබුණ එක ගැන එයාලා ගොඩක් සතුටු වුණා. යේසුස් ළඟඳීම මිය ගිය බිලියන ගාණක් අයව නැවත නැඟිටුවලා එයාලට මේ පොළොවේ හැමදාටම ජීවත් වෙන්න අවස්ථාව දෙනවා. යේසුස් කිව්වා ‘සොහොන් ගෙවල්වල ඉන්න හැමෝවම’ ඒ කියන්නේ දෙවියන්ගේ මතකයේ ඉන්න හැමෝටම ඔහු ආයෙත් ජීවිතය දෙනවා කියලා. මිනිස්සුන්ට ඒ අයව අමතක වෙලා තිබුණත් දෙවියන්ට එයාලව අමතක වෙන්නේ නැහැ.—යොහන් 5:28, 29.

 තවත් හොයමු

4. මිය ගිය අයව නැවත නැඟිටුවන්න යේසුස්ට පුළුවන් කියලා ඔහු ඔප්පු කළා

යේසුස් ඔහුගේ යාළුවා වුණ ලාසරුස් වෙනුවෙන් කරපු දේ ගැන තව දැනගන්න. යොහන් 11:14, 38-44 කියවලා මේ ප්‍රශ්න ගැන කතා කරන්න.

• ලාසරුස් ඇත්තටම මැරිලා හිටියා කියලා අපි දන්නේ කොහොමද?​—39වෙනි පදය බලන්න.

• ලාසරුස් ඒ වෙද්දී ස්වර්ගයට ගිහින් තිබුණා නම් ඔයා හිතනවාද යේසුස් මේ පොළොවේ ජීවත් වෙන්න එයාව නැවත නැඟිටුවයි කියලා?

වීඩියෝ එක බලන්න.

5. බිලියන ගාණක් ආයෙත් ජීවත් වෙනවා!

ගීතාවලිය 37:29 කියවලා මේ ප්‍රශ්නය ගැන කතා කරන්න.

• නැවත නැඟිටුවන බිලියන ගාණක් දෙනා ජීවත් වෙන්නේ කොහෙද?

යෙහෝවා දෙවියන්ට නමස්කාර කරපු අයව විතරක් නෙමෙයි, තව හුඟදෙනෙක්ව යේසුස් නැවත නැඟිටුවනවා. ක්‍රියා 24:15 කියවලා මේ ප්‍රශ්නය ගැන කතා කරන්න.

• මිය ගිහින් ඉන්න අය අතරින් ඔයා දකින්න ආස කාවද?

• නැවත නැඟිටීමේ බලාපොරොත්තුව ෆෙලිසිටිගේ දෙමාපියන්ට සහනයක් සහ ශක්තියක් වුණේ කොහොමද?

 ඉගෙනගත්ත දේ

මිය ගිය බිලියන ගාණක් අයට ආයෙත් ජීවිතය දෙන්න යෙහෝවා ආසාවෙන් ඉන්නවා. ඔහු ඒ දේ කරන්න යේසුස්ට බලය දීලා තියෙනවා.

ඔයා හිතන්නේ මොකක්ද?

• මිය ගිය අයට ආයෙත් ජීවිතය දෙන්න යෙහෝවා සහ යේසුස් ආසාවෙන් ඉන්නවා කියලා අපි දන්නේ කොහොමද?

• නැවත නැඟිටුවන බිලියන ගාණක් ජීවත් වෙන්නේ පොළොවේද, ස්වර්ගයේද? එහෙම කියන්නේ ඇයි?

• මිය ගිය පවුලේ අයට, යාළුවන්ට ආයෙත් ජීවිතය ලැබෙනවා කියලා ඔයා විශ්වාස කරන්නේ ඇයි?