LESONA 30
E Mafai Ona Toetutū Mai Ē Pele ua Maliliu!
E tatou te lagona le faanoanoa ma le faavauvau ona o le oti. O le māfuaaga lenā ua taʻua ai i le Tusi Paia le oti o se fili. (1 Korinito 15:26) I le Lesona 27, na tatou aʻoaʻoina ai o le a tafiesea e Ieova lenā fili. Ae o le ā o le a tupu i tagata ua maliliu? I lenei lesona, o le a e aʻoaʻoina ai se isi folafolaga matagofie a Ieova, o le toe faatutū mai lea o le faitau piliona o tagata ua maliliu, ma maua se olaga fiafia e faavavau. O le a ia toe faatutūina i latou! Pe o le a tupu moni lenā mea? Pe o le a toe faatutūina aʻe i latou i le lagi, po o le lalolagi?
1. O le ā le finagalo o Ieova mo ē pele ua maliliu?
E naunau Ieova e toe faatutūina mai i latou ua maliliu. Na mautinoa le tane faatuatua o Iopu, o le a manatua o ia e le Atua pe a oti. Na ia faapea atu i le Atua: “E te valaau mai, ona ou tali atu ai lea iā te oe [mai le Tuugamau].”—Faitau le Iopu 14:13-15.
2. E faapefea ona tatou iloa e mafai ona toe faatutūina ē ua maliliu?
A o iai Iesu i le lalolagi, na tuuina atu e le Atua iā te ia le mana e toe faatutūina ai tagata ua oti. Na ia faatūina se teineitiiti e 12 tausaga, ma le tama a se fafine ua oti lana tane. (Mareko 5:41, 42; Luka 7:12-15) Mulimuli ane, na maliu foʻi le uō a Iesu o Lasalo. E ui ua fā aso talu ona maliu ma tanu Lasalo, ae na toe faatūina o ia e Iesu. Ina ua uma ona tatalo Iesu i le Atua, ona ia valaau atu lea i le tuugamau: “Lasalo e, inā sau ia i fafo!” Ona “sau ai lea i fafo o le tagata na oti,” ua toe ola! (Ioane 11:43, 44) Seʻi faaata le fiafia o uō ma aiga o Lasalo!
3. O le ā le faamoemoe mo ē pele iā te oe ua maliliu?
Ua folafola mai e le Tusi Paia: “E toetutū mai tagata.” (Galuega 24:15) E leʻi ō i le lagi i latou na toe faatutūina e Iesu i le taimi ua mavae. (Ioane 3:13) Na latou fiafia ina ua toe faatutūina aʻe i latou i le lalolagi. Ua toeitiiti foʻi ona toe faatutū lea e Iesu o le faitau piliona o tagata, ma maua se olaga fiafia e faavavau i se lalolagi parataiso. Na ia faapea mai o le a toe faatutūina “i latou uma o loo i tuugamau,” e tusa lava pe ua faagalogaloina e tagata ae manatua pea e le Atua.—Ioane 5:28, 29.
SAʻILIʻILI ATILI
Iloilo le faamaoniga mai le Tusi Paia e iloa ai, e mafai ona toetutū ē ua maliliu, ma o le a tupu moni lava. Ia aʻoaʻo atili pe faapefea i le toetū ona faamāfanafanaina ai oe ma aumaia ai se faamoemoe.
4. Na faamaonia e Iesu e mafai ona ia toe faatutūina ē ua maliliu
Iloilo atili le mea na faia e Iesu mo lana uō o Lasalo. Faitau le Ioane 11:14, 38-44, ona talanoa lea i fesili nei:
-
E faapefea ona tatou iloa na oti moni lava Lasalo?—Tagaʻi i le fuaiupu 39.
-
Afai na alu Lasalo i le lagi, faamata la e mafai e Iesu ona toe faatūina aʻe o ia i le lalolagi?
5. O le a toetutū mai le toʻatele o tagata!
Faitau le Salamo 37:29, ona talanoa lea i le fesili lenei:
-
O fea o le a toetutū aʻe ai le faitau piliona o tagata?
E lē na o i latou na tapuaʻi iā Ieova o le a toe faatutū aʻe e Iesu. Faitau le Galuega 24:15, ona talanoa lea i le fesili lenei:
-
O ai e te fia vaai atu ua toe faatūina mai?
Mafaufau i le manatu lenei: E faigofie lava ona toe faatūina e Iesu se tagata ua maliu, e pei ona faigofie ona fafagu e se tamā sona atalii pe a moe
6. E faamāfanafanaina oe e le toetū ma aumaia ai se faamoemoe
O le tala o loo i le Tusi Paia e faatatau i le afafine o Iairo, e faamāfanafanaina ma faalaeiau ai le toʻatele pe a faavauvau. Faitau i lenā mea moni na tupu i le Luka 8:40-42, 49-56.
Na faapea atu Iesu iā Iairo a o leʻi faatūina lona afafine: “Aua e te fefe, ae ia faatuatua.” (Tagaʻi i le fuaiupu 50.) E faapefea ona fesoasoani le faamoemoe o le toetū iā te oe . . .
-
pe a maliu sē e pele?
-
pe a lamatia lou ola?
Faaali le VITIŌ, ona talanoa lea i le fesili lenei:
-
Ua faapefea ona faamāfanafanaina ma faalaeiauina mātua o Phelicity i le faamoemoe o le toetū?
UA FAAPEA MAI NISI: “E lē mafai ona toetutū mai ē ua maliliu.”
-
O le ā sou manatu?
-
O le ā se mau e mafai ona e faaaogā e faailoa atu ai o le a toetutū moni lava tagata?
AOTELEGA
Ua folafola mai e le Tusi Paia, o le a toetutū mai le faitau miliona o tagata. E finagalo Ieova ia toe feola mai i latou ma ua ia tuu atu iā Iesu le mana e toe faatutūina ai i latou.
Fesili Autalu
-
O ā faalogona o Ieova ma Iesu i le toe faatutūina mai o ē ua maliliu?
-
O fea o le a ola ai le faitau piliona o tagata o le a toe faatutū mai? O le lagi po o le lalolagi? Aiseā?
-
E faapefea ona e mautinoa o le a toe faatutū mai ē pele ua maliliu?
MANATU FAAOPOOPO
Iloilo auala aogā e mafai ona e faia ina ia manumalo ai i lagona faavauvau.
Pe e mafai moni ona fesoasoani mataupu silisili o le Tusi Paia i se tasi o faavauvau?
E faapefea ona fesagaʻia e fanau le maliu o sē e pele?
Pe e iai nisi o le a toe faatutūina i le lagi? O ai o le a lē toe faatutūina?
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
