Lefu le utlwisa bohloko ebile le baka mathata. Ke ka hoo Bibele e reng lefu ke sera. (1 Bakorinthe 15:26) Kgaolong ya 27 o ile wa ithuta hore Jehova o tla fedisa sera seo. Empa ho tla etsahalang ka batho ba seng ba hlokahetse? Kgaolong ena o tla ithuta ka tshepiso e nngwe ya Jehova e thabisang ya hore o tlo tsosa batho ba dibilione hore ba tlo phela ka ho sa feleng. Na seo se ka etsahala? Na ba tla tsosetswa ho ya phela lehodimong kapa lefatsheng?

1. Ke eng eo Jehova a batlang ho e etsa ka batho bao re ba ratang ba seng ba hlokahetse?

Jehova o batla ho tsosa bafu. Monna e mong ya neng a na le tumelo e leng Jobo, o ne a kgodisehile hore ha a ka shwa Modimo a ke ke a mo lebala. O ile a re ho Modimo: “O tla howa mme ke tla o araba [ke le lebitleng].”​—Bala Jobo 14:13-15.

2. Re tseba jwang hore bafu ba tla tsoswa?

Ha Jesu a le lefatsheng, Modimo o ile a mo fa matla a ho tsosa bafu. Jesu o ile a tsosa ngwanana ya dilemo di 12 a ba a tsosa le mora wa mohlolohadi. (Mareka 5:41, 42; Luka 7:12-15) Ha morao Lazaro motswalle wa Jesu o ile a shwa. Le hoja e ne e se e le matsatsi a mane Lazaro a shwele a bile a patilwe, Jesu o ile a mo tsosa. Ka mora hore Jesu a rapele Modimo o ile a hweletsa a shebile lebitleng a re: “Lazaro, tswa!” Ka mora moo, “monna ya neng a shwele a tswa” a phela. (Johanne 11:43, 44) E tlameha ebe lelapa labo Lazaro le metswalle ya hae ba ne ba thabile haholo.

3. Ho na le tshepo efe ka batho bao o ba ratang ba seng ba hlokahetse?

Bibele e a re tshepisa e re: “Ho tla ba le tsoho.” (Liketso 24:15) Batho bao Jesu a ileng a ba tsosa ha a ne a le lefatsheng, ba ne ba sa ya leho­dimong. (Johanne 3:13) Ba ne ba thabetse ho tla phela hape mona lefatsheng. Ka ho tshwanang, haufinyane Jesu o tla tsosa batho ba dibilione hore ba tlo phela ka ho sa feleng paradeiseng, mona lefatsheng. O ile a re “bohle ba mabitleng a kgopotso” ba tla tsoswa. Modimo o tla tsosa batho ba mohopolong wa hae, esita le bao ho se nang motho ya hopolang hore ba kile ba phela.​—Johanne 5:28, 29.

 ITHUTE DINTLHA TSE DING

4. Jesu o ile a bontsha hore a ka kgona ho tsosa bafu

Ithute hore na Jesu o ile a etsetsa motswalle wa hae Lazaro eng. Bala Johanne 11:14, 38-44 ebe le buisana ka dipotso tsena:

• Re tseba jwang hore Lazaro o ne a hlile a shwele? (Sheba temana ya 39.)

• Haeba Lazaro a ne a ile lehodimong, na o nahana hore Jesu o ne a tla mo kgutlisa hore a tlo phela lefatsheng?

Bapala VIDEO.

5. Batho ba bangata ba tla tsoswa

Bala Pesaleme ya 37:29 ebe le buisana ka potso ena:

• Batho ba dibilione ba tla tsoswa ba tlo phela hokae?

Jesu o tla tsosa batho ba bangata ho akarelletsa le ba neng ba sa rapele Jehova. Bala Liketso 24:15 ebe le buisana ka potso ena:

• Ke mang eo o ka thabelang ho mo bona a tsositswe?

• Tshepo ya hore bafu ba tla tsoswa e ile ya tshedisa le ho kgothatsa batswadi ba Phelicity jwang?

 KAKARETSO

Bibele e re tshepisa hore batho ba dibilione ba hlokahetseng ba tlo tsoswa. Jehova o batla hore ba tlo phela hape mme o file Jesu matla a ho ba tsosa.

Re Ithutileng?

• Jehova le Jesu ba ikutlwa jwang ka ho tsosa bafu?

• Na batho ba dibilione ba tlo tsoswa ba tla phela lehodimong kapa lefatsheng? Ke hobaneng ha o tjho jwalo?

• Ke eng e o kgodisang hore batho bao o ba ratang ba seng ba hlokahetse ba tla tsoswa?