Papate nakakoạ taumata lụl᷊ahunsusah dingangu nasusah naung. Hakị u ene, Alkitapẹ̌ nẹ̌sěbạ papate kai sědụ. (1 Korintus 15:26) Su Pěngangěndungang 27, i kitẹ seng něngěndung i Yehuwa sarung mapakailang sědụ ene. Katewe, apa sarung mariadi su taumata apang seng nate? Su pěngangěndungang ini, i kitẹ sarung měngěndung limembong mal᷊awọ soal u diandi wal᷊inẹ makạlaherang bọu i Yehuwa. I Sie sarung mapakawiahẹ̌ miliarẹ̌e taumata apang seng nate gunang měbiahẹ̌ mal᷊uasẹ̌ sarang karěngụe. Apa ene botonge kahěngang-hěngang mariadi? I sire sarung ipěbiahẹ̌ gunang mẹ̌tanạ su sorga arau su dunia?

1. Apa mapulu koateng i Yehuwa gunang taumata ikẹ̌kěndagi kitẹ apang seng nate?

Yehuwa mapulu saụ mapakawiahẹ̌ taumata apang seng nate. Sěngkatau esẹ arenge Ayub, mangimang Mawu tawe miwul᷊e si sie su tempong i sie mate. I sie naul᷊ị su Mawu, ”I Kau sarung mẹ̌kui, kụ iạ sarung sumimbahẹ̌ [bọu Kubul᷊ẹ̌].”​—Basa Ayub 14:​13-​15.

2. Kerea i kitẹ masingkạ taumata nate botonge saụ ipěbiahẹ̌?

Su tempong Yesus su dunia, Mawu něgělị si sie kawasa gunang saụ mapakawiahẹ̌ taumata nate. Yesus napakawiahẹ̌ anạ wawine umurẹ̌ 12 su taunge dingangu anạ esẹ bọu sěngkatau wawine wal᷊u. (Markus 5:​41, 42; Lukas 7:​12-​15) Bọu ene, hapị i Yesus, i Lazarus, nate. Maning i Lazarus nate kụ seng nikubul᷊ẹ̌ ěpạu ěllo karěngụe, Yesus saụ napakawiahẹ̌ si sie. Su apang bọu nẹ̌doa su Mawu, Yesus nẹ̌kui dingangu tingihẹ̌ maihạ, ”Lazarus, sěbangke!” Kụ, ”tau bọu nate ene siměbang”, i sie saụ něbiahẹ̌! (Yohanes 11:​43, 44) Keluarga dingangu manga hapị i Lazarus tantu sěbạe mal᷊uasẹ̌.

3. Apa pělaharapẹ̌ gunang taumata ikẹ̌kěndagi kitẹ apang seng nate?

Alkitapẹ̌ nẹ̌diandi, ”Taumata nate sarung ipěbiahẹ̌.” (Kisah 24:15) Taumata nate apang saụ nipěbiahẹ̌ karạ i Yesus su tempong tamai tawe nakoạ sarang sorga. (Yohanes 3:​13) I sire mal᷊uasẹ̌ saụ nipěbiahẹ̌ su dunia. Kerene lai, seng mal᷊ighạ i Yesus sarung mapakawiahẹ̌ miliarẹ̌e taumata gunang měbiahẹ̌ mal᷊uasẹ̌ sarang karěngụe su firdaus su dunia. I sie naul᷊ị kěbị apang tẹ̌tahěndungangu Mawu sarung saụ ipěbiahẹ̌, maning taumata tawe nakatahěndung si sire.​—Yohanes 5:​28, 29.

 BANGKA PAKARAL᷊UNG

4. Yesus něnodẹ i sie botonge mapakawiahẹ̌ taumata nate

Mahịe měngěndung limembong mal᷊awọ soal u apa nikoạ i Yesus su hapịe Lazarus. Basa Yohanes 11:​14, 38-​44, bọu ene bisarai manga kakiwal᷊o ini:

• Kerea i kitẹ masingkạ i Lazarus kahěngang-hěngang seng nate?​—Pěmanda ayatẹ̌ 39.

• Manga i Lazarus seng nakoạ sarang sorga, tumuhụ si kau apa i Yesus sarung saụ mapakawiahẹ̌ si sie gunang saụ mẹ̌tanạ su dunia?

Putarẹ̌ VIDEONE.

5. Lawọ taumata sarung saụ ipěbiahẹ̌

Basa Mazmur 37:​29, bọu ene bisarai kakiwal᷊o ini:

• Miliarẹ̌e taumata apang saụ ipěbiahẹ̌ sarung mẹ̌tanạ su apa?

Yesus sarung mapakawiahẹ̌ lawọ taumata, kụ bal᷊inẹ kětạeng manga ělang i Yehuwa. Basa Kisah 24:​15, bọu ene bisarai kakiwal᷊o ini:

• I kau mapulu mẹ̌sombang dingangi sai?

• Kerea pělaharapẹ̌ taumata nate saụ ipěbiahẹ̌ nakahiborẹ̌ dingangu nakatoghasẹ̌ matimadi Phelicity?

 RINGKASAN

Alkitapẹ̌ nẹ̌diandi miliarẹ̌e taumata apang seng nate sarung saụ ipěbiahẹ̌. Yehuwa mapulu i sire saụ měbiahẹ̌, kụ i Sie seng něgělị kawasa si Yesus gunang mapakawiahẹ̌ si sire.

Apa seng nikaěndungangu?

• Kerea pěndang i Yehuwa dingangi Yesus soal u mapakawiahẹ̌ taumata apang seng nate?

• Miliarẹ̌e taumata nate sarung saụ ipěbiahẹ̌ su sorga arau su dunia? Kawe nụe i kau simimbahẹ̌ kerene?

• Apa nakakoạ si kau mangimang taumata ikẹ̌kěndagu sarung saụ ipěbiahẹ̌?