LISAUN 30
Ema neʼebé mate ona bele moris filafali!
Mate lori duni susar no sentimentu triste. Tan neʼe Bíblia bolu mate nuʼudar inimigu. (1 Korinto 15:26) Iha lisaun 27, Ita aprende katak Jeová sei halakon tiha inimigu neʼe. Maibé saida mak sei akontese ba ema neʼebé mate tiha ona? Iha lisaun neʼe, Ita sei aprende liután kona-ba Jeová nia promesa furak ida katak nia sei halo ema barak tebes neʼebé mate ona moris filafali no moris ba nafatin. Nia sei fó moris-hiʼas ba sira! Neʼe sei akontese duni ka lae? Sira sei hetan moris-hiʼas ba lalehan ka iha rai?
1. Jeová hakarak halo saida ba ema neʼebé mate ona?
Jeová hakarak tebes atu halo ema neʼebé mate ona moris filafali. Mane fiar-naʼin ida naran Job iha fiar neʼebé metin katak Maromak sei la haluha nia maski nia mate. Nia hatete ba Maromak: “Ita sei bolu no haʼu sei hatán ba Ita [husi rate laran].”—Lee Job 14:13-15.
2. Oinsá mak ita hatene katak ema mate bele moris filafali?
Bainhira Jesus iha rai, Maromak fó ba nia kbiit atu fó moris-hiʼas ba ema. Jesus fó moris-hiʼas ba labarik-feto ida ho idade 12 no feto-faluk ida nia oan-mane. (Marcos 5:41, 42; Lucas 7:12-15) Tuirmai, Jesus nia belun Lázaro mate. Maski Lázaro mate no hakoi ona ba loron haat, Jesus halo nia moris filafali. Depois halo tiha orasaun ba Maromak, Jesus hatete: “Lázaro, sai mai liʼur!” no “mane neʼebé mate ona sai mai liʼur”. Lázaro moris fali! (João 11:43, 44) Imajina toʼok, Lázaro nia família no belun sira iha neʼebá sente haksolok tebetebes!
3. Saida mak esperansa ba ema neʼebé mate ona?
Bíblia promete katak: “Maromak sei fó moris-hiʼas.” (Apóstolu 24:15) Sira neʼebé Jesus fó moris-hiʼas iha tempu uluk la bá lalehan bainhira sira mate. (João 3:13) Sira sente kontente bainhira moris filafali iha rai. Nuneʼe mós, lakleur tan Jesus sei fó moris-hiʼas ba ema barak tebes neʼebé mate ona atu moris ba nafatin iha mundu paraízu. Jesus dehan katak “ema hotu neʼebé iha rate laran” ka iha Maromak nia memória sei hetan moris-hiʼas, maski ema haluha ona sira.—João 5:28, 29.
KEʼE KLEʼAN
Buka-hatene evidénsia husi Bíblia neʼebé hatudu katak ema neʼebé mate ona sei hetan moris-hiʼas. Aprende oinsá mak moris-hiʼas bele halo Ita sente kmaan no fó Ita esperansa.
4. Jesus hatudu katak nia bele fó moris-hiʼas ba ema mate
Aprende liután kona-ba saida mak Jesus halo ba ninia belun Lázaro. Lee João 11:14, 38-44, depois koʼalia hamutuk kona-ba pergunta tuirmai:
-
Oinsá mak ita hatene katak Lázaro mate duni?—Haree versíkulu 39.
-
Se Lázaro saʼe duni ba lalehan, tuir Ita-nia hanoin Jesus sei halo nia moris filafali iha rai ka lae?
5. Ema barak sei hetan moris-hiʼas!
Lee Salmo 37:29, depois koʼalia hamutuk kona-ba pergunta tuirmai:
-
Ema rihun ba rihun sei hetan moris-hiʼas iha neʼebé?
Jesus sei fó moris-hiʼas ba ema neʼebé adora Jeová, no mós sira neʼebé seidauk hetan oportunidade atu adora Jeová. Lee Apóstolu 24:15, depois koʼalia hamutuk kona-ba pergunta tuirmai:
-
Sé mak Ita hakarak hasoru iha tempu moris-hiʼas nian?
Hanoin toʼok: Fasil deʼit ba Jesus atu fó moris-hiʼas ba ema, hanesan aman neʼebé fanu ninia oan neʼebé toba hela
6. Moris-hiʼas bele halo Ita sente kmaan no fó Ita esperansa
Bíblia nia istória kona-ba Jairo nia oan-feto fó ona kmaan ba ema neʼebé sente triste tanba ema mate. Lee kona-ba neʼe iha Lucas 8:40-42, 49-56.
Antes fó moris-hiʼas ba Jairo nia oan-feto, Jesus hatete ba Jairo: “Keta taʼuk, hatudu fiar bá.” (Haree versíkulu 50.) Oinsá mak esperansa kona-ba moris-hiʼas ajuda Ita . . .
-
bainhira ema neʼebé Ita hadomi mate?
-
bainhira Ita-nia moris iha perigu laran?
Loke VÍDEO, depois koʼalia hamutuk kona-ba pergunta tuirmai.
-
Oinsá mak esperansa moris-hiʼas fó kmaan no aten-brani ba Phelicity nia inan-aman?
EMA BALU DEHAN: “Haʼu la fiar ema mate bele moris fali iha rai.”
-
Ita sei hatán saida?
-
Eskritura saida mak Ita sei uza atu hatudu katak ema barak tebes sei moris fali iha rai?
PONTU IMPORTANTE
Bíblia promete katak ema barak tebes neʼebé mate ona sei hetan moris-hiʼas. Jeová hakarak sira atu moris filafali, no nia fó ona kbiit ba Jesus atu halo ida-neʼe.
Rezumu
-
Oinsá mak ita hatene katak Jeová no Jesus hakarak fó moris-hiʼas ba ema neʼebé mate ona?
-
Ema barak tebes sei hetan moris-hiʼas iha neʼebé, iha lalehan ka iha rai? Tanbasá Ita dehan nuneʼe?
-
Saida mak halo Ita fiar metin katak ema neʼebé Ita hadomi sei moris filafali?
BUKA-HATENE LIUTÁN
Aprende kona-ba dalan balu oinsá atu tahan hasoru laran-triste bainhira ema mate.
“Tahan hasoru laran-triste bainhira ema mate” (Matan-moris bá! No. 3 2018)
Bíblia nia prinsípiu sira bele ajuda ema tahan hasoru laran-triste bainhira ema ida mate ka lae?
Saida mak bele ajuda labarik sira tahan hasoru laran-triste bainhira ema neʼebé sira hadomi mate?
Ema balu sei hetan moris-hiʼas ba lalehan ka lae? Sé mak sei la hetan moris-hiʼas?
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
