LESOGNE 30
Mbe ho Velogne i Longontika Naho i Namantika fa Nimate Rey!
Malahelo tikagne naho fa misy longontikagne ndra namantikagne mate. Izay ty mahavy ty Baiboly manao o fateo tihoe fahavalo. (1 Korintianina 15:26) Nianarantikagne tamy Lesogne 27 ao fa hamoagne o fahavalo iohoe ty Jehovah. Faie ino ty raha tamae i ndaty fa nimate rey? Ho trea’o amy ty lesogne toy ato fa misy raha tena fanjaka ampitamae i Jehovah iareo. Ndaty an-tapetrisa’e ty hovelome’e amy ty mate, le hiaigne nainai’e. Tena ho avy eo vata’e vao zay? Hiaigne an-dagnitse agne vao sa an-tane etoy i ndaty hovelomegne rey?
1. Tea i Jehovah hatao akore i longontika naho i namantika fa nimate rey?
Magniry mafe hamelogne o ndaty mateo ty Jehovah. Natoky ty lahilahy raike nanam-pinoagne atao tihoe Joba toy fa tsy hagnaligno aze ty Andrianagnahare naho fa mate reke. Hoe reke taman’Andrianagnahare: “Hikanjy rehe le hanoigne azo [boake an-kibory ao] raho.”—Vakio ty Joba 14:13-15.
2. Akore ty ahafantarantikagne fa mbe azo velomegne o ndaty mateo?
Tamy i Jesosy tan-tane etoỳ, le nimea i Jehovah hery hamelogne ty ndaty fa nimate reke. Nivelome’e ohatse ty somondrara raike 12 taogne naho ty ana-dahy ty ampela vantotse raike. (Marka 5:41, 42; Lioka 7:12-15) Nimate ka ty Lazarosy nama’e naho fa tafara tatoy. Vita i Jesosy ty namelogne aze ndra tie fa efatse andro aza ty nandevegnagne aze. Naho fa boake nivavake taman’Andrianagnahare reke, le nitoka tihoe: “O Lazarosy, miakara!” Naho fa niavy eo, “le niakatse boake ao i lahilahy fa nimatey.” (Jaona 11:43, 44) Ho nanao akore hoe rehe ty nihafalea i keleia i Lazarosy rey naho i nama’e rey!
3. Mbe hovelogne indraike vao i longo’o naho i nama’o fa nimate rey?
Mampitamà ty Baiboly fa: ‘Hisy ty famelomagne ty mate.’ (Asan’ny Apostoly 24:15) Tsy nandeha an-dagnitse agne i ndaty nivelome i Jesosy rey taloha ty nameloma’e iareo. (Jaona 3:13) Nifale iareo naho fa nivelome’e tan-tane etoy. Tsy ho ela ka ty Jesosy, le hamelogne i ndaty an-tapetrisa’e fa nimate rey sady hiaigne nainai’e amy i paradisa an-tane etoỳ iareo. Nirehake reke fa ze ndaty agnate ty fitadidian’Andrianagnahare ndra tie haligno o ndatio aza ty miomba aze, le mbe hovelogne indraike.—Jaona 5:28, 29.
ANDAO HANDINEKE TY PITSOPITSO’E
Hodinehentikagne ato tie ino ty porofo fa mahavita mamelogne ty mate ty Jesosy sady tena hanao izay reke. Hotreantikagne ato ka tie nagnino ro mampahery naho magnomey fanantenagne antikagne ty mahafantatse tie mbe hovelomegne ty mate.
4. Niporofoe i Jesosy tie vita’e ty mamelogne ty mate
Hodinehentikagne amy ty pitsopitso’e ty raha natao i Jesosy tamy i Lazarosy nama’e. Vakio ty Jaona 11:14, 38-44, sady iharò midineke ty fagnonteneagne retoa:
-
Akore ty ahafantarantikagne fa tena nimate ty Lazarosy?—Henteo ty andine’e 39.
-
Soa fagnahy vao ty Jesosy naho ohatse fa tan-dagnitse agne ty Lazarosy faie mbe nahere’e an-tane etoy indraike?
5. Maro ty ndaty hovelomegne!
Vakio ty Salamo 37:29, sady iharò midineke ty fagnonteneagne toy:
-
Hiaigne aia i ndaty an-tapetrisa’e hovelomegne rey?
Tsy ty ndaty nanompo i Jehovah avao ty hovelome i Jesosy. Maro ka ty ndaty tsy nanompo i Jehovah hovelome’e. Vakio ty Asan’ny Apostoly 24:15, sady iharò midineke ty fagnonteneagne toy:
-
Ia ty fa tsy ligne’o ty hahatrea aze naho fa hovelomegne ty mate?
Dineho zao: Afake mamoha ty ana’e miroro ty rae’e. Tsy ho sarotse amy i Jesosy ka ty mamelogne o ndaty nimateo
6. Mampionogne naho mahavy antikagne hanagne fanantenagne ty fahafantaragne tie mbe hovelomegne ty mate
Maro ty ndaty nimate longo nahazo fampionognagne naho fampaherezagne naho fa namaky ty namelomagne i anak’ampela i Jairoy. Rehafegne agnate Baiboly ao ty tantara’e. Vakio amy Lioka 8:40-42, 49-56 ao o tantara iohoe.
Izao ty nirehafe i Jesosy tamy i Jairo taloha ty nameloma’e i anak’ampela’ey: “Ko matahotse, fa manàgna finoagne avao.” (Henteo ty andine’e 50.) Nagnino ro mahasoa azo ty fahafantaragne tie mbe hovelomegne ty mate...
-
naho ohatse fa nimate ty longo’o tsy foe’o ndra ty nama’o?
-
naho atahoragne ho mate rehe?
Alefaso i VIDEO oy, sady iharò midineke ty fagnonteneagne toy naho fa avy eo.
-
Mitamà i rae aman-drene i Phelicity rey fa mbe hovelomegne ty mate. Nagnino zay ro nampionogne naho nampahery iareo?
MISY TY MIREHAKE FA: “Ho velomegne an-dagnitse agne o ndaty mateo fa tsy an-tane etoy.”
-
Akore ty heve’o?
-
Ino ty andinin-teny azo’o ampiasaegne magnaporofo fa hisy famelomagne ty mate ty an-tane etoy?
FAMINTIGNAGNE
Mampitamà ty Baiboly fa hisy ndaty an-tapetrisa’e hovelomegne amy ty mate. Tea i Jehovah hovelomegne indraike iareo, le ho mea’e hery ty Jesosy hamelogne iareo.
Fameregnagne
-
Ino ty porofo fa tena te hamelogne o ndaty mateo ty Jehovah naho i Jesosy?
-
Hiaigne aia o ndaty an-tapetrisa’e hovelomegneo, an-dagnitse agne sa an-tane etoy? Ino ty anto’e?
-
Nagnino rehe ro rese lahatse fa hovelomegne i ndaty tsy foe’o fa nimate rey?
FAGNAZAVAGNE FAGNAMPE’E
Misy raha hagnampe azo hiatreke ty alahelo’o ty ato.
“Ino ty Hagnampe Azo Hizaka ty Haorea’o?” (Mifohaza! Nim. 3 2018)
Afake magnampe ty ndaty mate longo vata’e vao ty toro lala ty Baiboly?
Tsy mora amo o ajajao tihoe mate ty longo’e ndra ty nama’e maifitse aze. Akore ty hagnampeagne aze?
Misy ndaty hovelomegne mba hiaigne an-dagnitse agne vao? Ia ty tsy hovelomegne amy ty mate?
“Ino ty Atao Tihoe Fitsanganagne amy ty Mate?” (Lahatsoratse amy jw.org ao)
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
