ITYOUGH 30
Ior Ou mba Ve Kpe la Vea Hide a Lu Uma!
Ku ka u va a ijungwen man ishimavihin kpishi. Ka nahan ve Bibilo i yer ku ér orihyom ye. (1 Mbakorinte 15:26) U hen ken Ityough 27 kira, er ica a gba ga tsô Yehova una tim orihyom la yô. Nahan kpa ior mba ve kpe la di una er a ve nena? Ken ityough kin, u seer henen kwagh u ityendezwa igen i doon tsung i Yehova a er wener una va nder ior ubiliôn imôngo vea hide a lu uma gbem sha won shin tar la. Una nder ve! Kpa kwagh a fatyô u eren nahan mimii? A nder ve vea yem sha shin ve vea lu shin tara?
1. Ka nyi Yehova a soo u eren sha ci u ior asev mba ve kpe laa?
Sar Yehova tsung u nderen mba ve kpe la ve hide ve lu uma. Orjighjigh Yobu yange lu a vangertiôr ér una kpe kpa Aôndo una hungur un ga. Yange kaa a Aôndo ér: ‘Ú yila, mo me gema me vengese shin uwar.’—Ôr Yobu 14:13-15.
2. Er nan se fe ser a nder mbakpeneve?
Shighe u Yesu lu shin tar la, Aôndo na un tahav mbu nderen ior shin ku. Yesu yange nder wankwase u lun anyom 12 kua wan u kwasecôghol ugen shin ku. (Marku 5:41, 42; Luka 7: 12-15) Shighe kar yô, ijende i Yesu, Lasaru kpe. Er Lasaru kpe shi i ii un kuma ayange anyiin nahan kpa, Yesu nder un, hide lu uma. Yesu yange er msen hen Aôndo, genger imo kaa ér: “Lasaru, due ken won!” Maa “or u kpe la due.” Lasaru hide lu uma! (Yohane 11:43, 44) Nenge imba er yange a saan tsombor u Lasaru kua azende a na iyol sha wono!
3. Ka ishimaverenkeghen i nyi i lu sha ci u ior ou mba ve kpe laa?
Bibilo kaa ér: Aôndo “ngu va nderen” ior shin ku. (Aerenakaa 24:15) Ior mba Yesu nder ve shin ku la yange ve yem sha ga. (Yohane 3:13) Yange nder ve ve hide ve lu uma shin tar shi saan ve iyol kpaa. Nahan kape ica a gba ga tsô Yesu una nder ior ubiliôn imôngo, vea hide a lu uma gbem sha won ken paradiso shin tar je la. Yange kaa ér, mba Aôndo a lu umbur ve la cii a nder ve, kua mbara mba i lu inja er ve kpe hungur la kpaa.—Yohane 5:28, 29.
HEN KWAGH I ZA SHIMI
Time ken Bibilo fa er i hii ve se ne jighjigh ser Yesu ngu a tahav mbu nderen ior shi una va nder ve kpaa yô. Hen fa er kwagh u mnder u shin ku la una fatyô u surun we ishima shi nan we ishimaverenkeghen yô.
4. Yesu yange tese ér una fatyô u nderen mbakpenev
Seer henen kwagh u Yesu yange er a ijende na Lasaru yô. Ôr Yohane 11:14, 38-44, maa lam nen sha mbampin mban:
-
Er nan se fe ser Lasaru yange kpe mimi?—Nenge ivur 39.
-
Lasaru yange una yem sha nahan, u hen wer Yesu yange ma hide a na ér a va lu uma shin tara?
5. A va nder ior kpishi shin ku!
Ôr Pasalmi 37:29, maa lam nen sha mpin ne:
-
Ior ubiliôn imôngo mba a nder ve la vea lu hana?
Yesu una nder ior kpishi kua mbagen mba yange ve civir Yehova ga la kpaa. Ôr Aerenakaa 24:15, maa lam nen sha mpin ne:
-
Ka an i sar u u ma i nder nan, ma u nenge a nana?
Hen ase sha kwagh ne: Er ter ka nan nder wan u nan u a lu yaven nahan, kape Yesu kpa a lu un ican ga u nderen or u nan kpe je la
6. Mnder u shin ku una fatyô u surun we ishima shi nan we ishimaverenkeghen
Kwagh u Bibilo i ôr sha kwagh u wan u Yairu u kwase la ka a sur ior kpishi ishima shi a taver ve ishima shighe u or ve nan kpe yô. Ôr kwagh ne ken Luka 8:40-42, 49-56.
Cii ve Yesu nder wan u Yairu u kwase la yô, a kaa a ter u wankwase la ér: “I̱ de ze u iyol ga, na jighjigh di tsô.” (Nenge ivur 50.) Ishimaverenkeghen i mnder u shin ku la ia wase u . . .
-
shighe u or wou nan kpe nena?
-
shighe u uma wou a lu sha zongo nena?
Nenge VIDIO i i lu heen ne, maa lam nen sha mpin u a dondo ne.
-
Ishimaverenkeghen i mnder u shin ku la yange i sur mbamaren mba Phelicity ishima shi i taver ve ishima nena?
IOR MBAGENEV KA VE KAA ÉR: “Kwagh u mnder u shin ku la doo gande, a fatyô u lun mimi ga.”
-
We u nenge nena?
-
Ka ivur Bibilo i han u fatyô u ôron u tesen or wer ka va nderen ior shin kuu?
KA NYI U HENE?
Bibilo kaa ér mba va nderen ior ubiliôn imôngo mba ve kpe la. Yehova soo ér ve hide ve lu uma, nahan a na Yesu tahav mbu va nderen ve.
Mbampin mba umbur kwagh u i hen yô
-
Yehova man Yesu nenge kwagh u nderen ior shin ku sha u ve hide ve lu uma la nena?
-
Ior ubiliôn mba a nder ve la, vea lu hana, vea yem sha shin vea lu shin tara? Er nan ve u ôr nahana?
-
Er nan u ne jighjigh wer a va nder ior ou mba ve kpe la vea hide a lu uma?
SEER HENEN KWAGH
Hen akaa a aa wase u u wan ishima shighe u u lu zungwen ku u or wou yô.
“Akaa a Aa Wase Mba Ve Lu Zungwen Ku Yô” (Awake! Namba 3 2018)
Mimi je akaawan a Bibilo aa fatyô u wasen or u nan lu zungwen ku yôô?
Ka nyi ia wase mbayev u wan ishima shighe u or ve nan kpe?
A nder mbagen vea yem sha? Ka unô a nder ve ga?
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
