SAMBIRU 30
Akufwa Azamuyuka!
Nyifwa yipaska chitima ukongwa. Ndichu chifukwa chaki Bayibolu likamba kuti nyifwa ndi murwani widu. (1 Akorinto 15:26) Mu Sambiru 27, mungusambira kuti Yehova wazakumutuzgapu murwani mwenuyu. Kweni kumbi ntchinthu wuli chazamuchitikiya ŵanthu wo akufwa kali? Mu sambiru ili, musambirengi kuti Yehova wazamuyuska ŵanthu mabiliyoni nganandi wo akufwa, kuti azije so ndi umoyu wambula kumala. Kumbi venivi vingazichitika nadi? Kumbi ŵanthu akufwa azamuyuskika kuti akaje kuchanya pamwenga pacharu chapasi?
1. Kumbi Yehova wakhumba kuŵachitiyanji ŵanthu wo akufwa?
Yehova wakhumbisiska kuziyuska ŵanthu wo akufwa kuti azije so ndi umoyu. Yobu munthu wakugomezgeka wenga ndi chigomezgu kuti Chiuta wazakumuluwa cha asani wafwa. Iyu wangukambiya Chiuta kuti: “Mwazamudana, ndipu ini ndazakukumukani [kutuliya ku Masanu].”—Ŵerengani Yobu 14:13-15.
2. Kumbi tiziŵa wuli kuti akufwa azamuyuskika?
Pa nyengu yo Yesu wenga pacharu chapasi, Yehova wangumupaska nthazi zakuyuskiya akufwa. Yesu wanguyuska msungwana wavyaka 12 ndipuso mwana munthulumi wa choko. (Mariko 5:41, 42; Luka 7:12-15) Pavuli paki, Yesu wanguyuska mubwezi waki Lazaro yo wangufwa. Chinanga kuti Lazaro wanguja mazuŵa nganayi mumuwunda, Yesu wangumuyuska mbwenu ndi kuja so ndi umoyu. Wati wapemphera kwaku Chiuta, Yesu wangukamba kuti: “Lazaro, tuliya kunu kubwalu!” Ndipu “munthu yo wenga wakufwa wangutuliya kubwalu” we wamoyu! (Yohane 11:43, 44) Ŵanaŵaniyani mo abali aku Lazaro ndipuso abwezi ŵaki angukondwe iyu wati wayuka!
3. Kumbi ntchinthu wuli chazamuchitikiya ŵanthu wo akufwa?
Bayibolu likamba kuti: “Kwazamuja chiyuka.” (Machitidu 24:15) Ŵanthu wo Yesu wanguŵayuska anguluta kuchanya cha. (Yohane 3:13) Yiwu angukondwa ukongwa wati waŵayuska ndipu ajanga so penipanu pacharu chapasi. Mwakuyanana waka, Yesu wazamuyuska so ŵanthu mabiliyoni nganandi ndipu azamuja pacharu chapasi chaparadayisu kwamuyaya. Iyu wangukamba kuti “ŵanthu wosi wo ŵe mumiwunda yachikumbusu,” chinanga angawoneka nge kuti akuluwika, Chiuta weche kuŵakumbuka mbwenu ndipu azamuyuskika.—Yohane 5:28, 29.
SAMBIRANI VINANDI
Wonani ukaboni wa mu Bayibolu wo ulongo kuti akufwa azamuyuskika nadi. Wonani so mo chiyuka chingakupembuzgiyani kweniso mo chingakuwovyiyani kuti mulindizengi vinthu vamampha vo vichitikengi kunthazi.
4. Yesu wangulongo kuti wazakuŵayuska nadi akufwa
Wonani so vinthu vinyaki vo tisambirapu pa vo Yesu wanguchitiya mubwezi waki Lazaro. Ŵerengani Yohane 11:14, 38-44, pavuli paki kambiskanani mafumbu yanga:
-
Kumbi tisimikiza wuli kuti Lazaro wangufwa nadi?—Wonani vesi 39.
-
Asani Lazaro wanguluta kuchanya wati wafwa, kumbi muwona kuti Yesu watingi wamuweziyengi so pacharu chapasi?
5. Ŵanthu anandi wo akufwa azamuyuskika!
Ŵerengani Salimo 37:29, pavuli paki kambiskanani fumbu ili:
-
Kumbi ŵanthu mabiliyoni wo azamuyuskika amuja pani?
Yesu wazamuyuska ŵanthu wo asopa Yehova pe cha, kweni wazamuyuska so ŵanthu anyaki anandi. Ŵerengani Machitidu 24:15, pavuli paki kambiskanani fumbu ili:
-
Kumbi ndiyani yo yimwi mungayanja kuti muzimuwoni kuti wayuskika?
Ŵanaŵaniyani ivi: Yesu wangasuzgika cha kuyuska munthu nge mo ada angayuskiya mwana wawu yo wagona tulu
6. Kuziŵa kuti akufwa azamuyuskika kungakupembuzgani kweniso kungakuwovyani kuti mulindizgengi vinthu vamampha
Nkhani ya mu Bayibolu ya mwana munthukazi waku Yairo yaŵachiskapu ukongwa ŵanthu wo mubali wawu watayika. Ŵerengani nkhani yauneneska yeniyi pa Luka 8:40-42, 49-56.
Yesu wechendayuski msungwana mwenuyu, wangukambiya awisi a Yairo kuti: “Ungawopanga cha, ja ŵaka ndi chivwanu.” (Wonani vesi 50.) Kumbi kuziŵa kuti akufwa azamuyuka kungakuwovyani wuli . . .
-
asani munthu munyaki yo mwamuyanjanga watayika?
-
asani umoyu winu we pa ngozi?
Woneriyani VIDIYO, pavuli paki kambiskanani fumbu ili:
-
Kumbi kuziŵa kuti akufwa azamuyuka kunguŵapembuzga wuli apapi aku Phelicity?
ŴANTHU ANYAKI AKAMBA KUTI: “Mphakusuzga kugomezga kuti ŵanthu wo akufwa angazija so ndi umoyu.”
-
Yimwi muwona wuli?
-
Kumbi ndi lemba nili lo mungakambiskana nayu kuti wasimikizi kuti ŵanthu akufwa azamuyuka nadi?
KUMBI MWASAMBIRANJI?
Bayibolu likamba kuti ŵanthu mabiliyoni nganandi wo akufwa azamuyuskika. Yehova wakhumba kuti azije so ndi umoyu ndipu wamupaska nthazi Yesu kuti waziyuski ŵanthu ŵenaŵa.
Kuweriyamu
-
Kumbi Yehova ndi Yesu atiyiwona wuli nkhani yakuyuska ŵanthu wo akufwa?
-
Kumbi ŵanthu mabiliyoni wo azamuyuskika amuja kuchanya pamwenga pacharu chapasi? Ntchifukwa wuli muwona viyo?
-
Ntchifukwa wuli musimikiza kuti abali ŵinu wo akufwa angazija so ndi umoyu?
FUFUZANI
Wonani vo mungachita kuti chitima chimaleku asani mubali winu watayika.
“Vo Vingakuwovyani Asani Mwe Ndi Chitima” (Jani Masu! Na. 3 2018)
Kumbi Bayibolu lingamuwovya nadi munthu yo we ndi chitima chifukwa chakuti mubali waki watayika?
Kumbi ŵana angapembuzgika wuli asani mubali wawu watayika?
Kumbi alipu wo azamuluta kuchanya asani ayuskika? Nanga mbayani wo azamuyuskika cha?
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
