CIIYO 30
Bayandwa Banu Bafwide Balakonzya Kupona Alimwi!
Lufwu lulacisa kapati alimwi luletela buumba. Nkakaambo kaako Bbaibbele ncolyaamba kuti lufwu ngusinkondoma. (1 Bakorinto 15:26) Mu Ciiyo 27, mwakaiya kuti Jehova uyoomuzunda sinkondo ooyu. Pele ncinzi ciyoocitika kubantu ibakafwa kale? Muciiyo eeci, mulaiya zinji kujatikizya cisyomezyo ca Jehova cimbi icikkomanisya kapati cakuti, uyoobusya bantu banji kapati kuti bakapone kukabe kutamani. Uyoobabusya! Sena eeco ciyoocitika ncobeni? Sena bayoobusyigwa kuti bakapone kujulu naa anyika?
1. Ncinzi Jehova ncayanda kuyoocita kubayandwa besu ibakafwa?
Jehova ulayandisisya kuyoobusya bantu ibakafwa. Mwaalumi iwakajisi lusyomo Jobu, wakalisinizyide kuti Leza uyoomubusya aakufwa. Wakaambila Leza kuti: “Uyakwiita, eelyo mebo ndiyookuvwiila [kuzwa mucuumbwe].”—Amubale Jobu 14:13-15.
2. Ino tuzyi buti kuti bafwide balakonzya kubusyigwa?
Ciindi Jesu naakali anyika, Leza wakamupa nguzu zyakubusya bafwide. Jesu wakabusya mwana musimbi iwakajisi myaka iili 12 alimwi amwana wamukamufwu. (Marko 5:41, 42; Luka 7:12-15) Kumbele, mulongwe wa Jesu Lazaro wakafwa. Nokuba kuti Lazaro wakalifwide alimwi akuzikkwa kwamazuba one, Jesu wakamubusya. Naakamana kupaila kuli Leza, Jesu wakoompolola ajwi pati kuti: “Lazaro, kozwa oomo!” Mpoonya “imuntu ooyo iwakafwide wakazwa” kali muumi! (Johane 11:43, 44) Amuyeeye buyo mbobakakkomana banamukwasyi alimwi abalongwe!
3. Mbulangizi nzi mbobajisi bayandwa banu ibakafwa?
Bbaibbele lisyomezya kuti: “Kuyooba bubuke.” (Milimo 24:15) Aabo Jesu mbaakabusya kaindi tiibakaunka kujulu. (Johane 3:13) Bakabusyigwa mpeena aano aanyika alimwi bakalikkomene. Mbubwenya buyo, lino-lino Jesu uyoobusya bantu banji kapati kutegwa bakapone kukabe kutamani muparadaiso anyika. Wakaamba kuti “boonse ibali muzyuumbwe,” nobaba baabo ibalibonya kuti bakalubwa pele mbayeeyede Leza, bayoobusyigwa.—Johane 5:28, 29.
AMWIIYE ZINJI
Amulange-lange bumboni bwamu Bbaibbele ibutondezya kuti bafwide balakonzya kubuka alimwi akuti bayoobusyigwa. Amubone bubuke mbobukonzya kumuumbulizya alimwi akumupa bulangizi.
4. Jesu wakatondezya kuti ulakonzya kubabusya bafwide
Amwiiye zinji kujatikizya Jesu ncaakamucitila mulongwe wakwe Lazaro. Amubale Johane 11:14, 38-44, akubandika mibuzyo eeyi:
-
Ino tuzyi buti kuti Lazaro wakalifwide ncobeni?—Amubone kapango 39.
-
Ikuti naa Lazaro wakaunkide kujulu, sena muyeeya kuti Jesu naakamubusyila anyika?
5. Bantu banji bayoobusyigwa!
Amubale Intembauzyo 37:29, akubandika mubuzyo ooyu:
-
Ino bantu banji ibayoobusyigwa bayookkala kuli?
Jesu uyoobusya bantu banji ikutali buyo baabo ibakali kukomba Jehova balikke. Amubale Milimo 24:15, akubandika mubuzyo ooyu:
-
Mbaani mbomuyanda kuyoobona baakubusyigwa?
Amubone kaambo aaka: Ncuuba-uba kuli Jesu kubusya muntu uufwide mbubonya mbocili cuuba-uba kuli bausyi kubusya mwana iwoona
6. Bubuke bulakonzya kumuumbulizya akumupa bulangizi
Cibalo camu Bbaibbele icaamba mwana musimbi wa Jairo, cabaumbulizya alimwi akubakulwaizya bantu banji ibali mubuumba. Amucibale cibalo eeco icakacitika ncobeni kulugwalo lwa Luka 8:40-42, 49-56.
Katanamubusya mwana musimbi wa Jairo, Jesu wakaambila bausyi kuti: “Utayoowi pe, kosyoma buyo.” (Amubone kapango 50.) Mbuti bulangizi bwabubuke mbobukonzya kumugwasya . . .
-
ciindi nomwafwidwa muyandwa wanu?
-
ciindi buumi bwanu nobuli muntenda?
Atweebelele VIDIYO, akubandika mubuzyo uutobela.
-
Mbuti bulangizi bwabubuke mbobwakabaumbulizya alimwi akubayumya bazyali ba Phelicity?
BAMWI BAAMBA KUTI: “Cilakatazya kusyoma kuti bafwide bayoobuka alimwi.”
-
Ino nywebo muyeeya buti?
-
Ndugwalo nzi ndomukonzya kubelesya kutondezya kuti kuyooba bubuke?
MUBUFWAAFWI
Bbaibbele lisyomezya kuti bantu banji ibakafwa bayoobusyigwa. Jehova uyanda kuti bakapone alimwi, nkakaambo kaako wakapa Jesu nguzu zyakubabusya.
Ncinzi Ncomwaiya?
-
Ino Jehova alimwi a Jesu balimvwa buti kujatikizya kubusya bafwide?
-
Ino bantu banji ibayoobusyigwa bayookkala kuli, kujulu naa anyika? Nkaambo nzi ncomwaambila boobo?
-
Ncinzi cimupa kusyoma kuti bayandwa banu bayoobusyigwa?
AMUZYIBE ZINJI
Amwiiye nzila zigwasya izikonzya kumuumbulizya nomuli mubuumba.
“Luumbulizyo Kuli Baabo Ibali Mubuumba” (Sinsimuka! No. 3 2018)
Sena njiisyo zyamu Bbaibbele zilakonzya kumugwasya ncobeni muntu uuli mubuumba?
Mbuti bana mbobakonzya kuliyumya ciindi nobafwidwa muyandwa wabo?
Sena bantu boonse bayoobusyigwa kuti bakapone kujulu? Ino mbaani batakabusyigwi?
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
