DYONDZO 30
Maxaka Ni Vanghana Va Wena Lava Feke Va Nga Tlhela Va Hanya!
Hi twa ku vava swinene hi tlhela hi va ni gome loko hi feriwile. Hi yona mhaka leyi Bibele yi vulaka leswaku rifu i nala. (1 Vakorinto 15:26) Eka Dyondzo 27, u dyondze leswaku Yehovha u ta herisa nala yoloye. Kambe ku ta endleka yini hi lava se va feke? Eka dyondzo leyi, u ta twa swo tala hi xitshembiso xin’wana xo tsakisa xa Yehovha. U ta pfuxa vanhu va tibiliyoni leswaku va hanya hilaha ku nga heriki. U ta va pfuxa! Xana sweswo swi nga endleka hakunene? Xana va ta pfuxeriwa ku ya hanya etilweni kumbe emisaveni?
1. I yini leswi Yehovha a lavaka ku swi endlela maxaka ni vanghana va hina lava feke?
Yehovha u lava ku pfuxa vanhu lava feke. Wanuna wa ripfumelo loyi a vitaniwaka Yobo a a tiyiseka leswaku Xikwembu xi ta n’wi pfuxa loko a fa. U byele Xikwembu a ku: “U ta vitana, mina ndzi ta ku hlamula [ndzi ri eSirheni].”—Hlaya Yobo 14:13-15.
2. Hi swi tivisa ku yini leswaku lava feke va ta pfuxiwa?
Loko Yesu a ha ri laha misaveni, Xikwembu xi n’wi nyike matimba ya ku pfuxa vanhu. Yesu u pfuxe xinhwanyatana xa malembe ya 12 ni n’wana wa noni. (Marka 5:41, 42; Luka 7:12-15) Hi ku famba ka nkarhi, Lazaro munghana wa Yesu u file. Hambileswi a a ri ni masiku ya mune a lahliwile, Yesu u n’wi pfuxile. Endzhaku ka loko Yesu a khongele eka Xikwembu, u huwelele a langute esirheni a ku: “Lazaro, huma!” Hiloko “Lazaro loyi a file a huma.” (Yohane 11:43, 44) Ehleketa ndlela leyi ndyangu ni vanghana va Lazaro a va tsake ha yona!
3. Ku ta endleka yini hi vanghana ni maxaka ya wena lama feke?
Bibele yi tshembisa leswaku “ku ta va ni ku pfuxiwa [ka lava feke].” (Mitirho 24:15) Lava Yesu a nga tshama a va pfuxa loko a ha ri laha misaveni a va yanga etilweni. (Yohane 3:13) A va tsake ngopfu loko va pfuxiwa leswaku va tlhela va hanya kwala misaveni. Hilaha ku fanaka, ku nga ri khale Yesu u ta pfuxa vanhu va tibiliyoni leswaku va tiphina hi vutomi hilaha ku nga heriki emisaveni leyi nga paradeyisi. U vule leswaku “hinkwavo lava nga emasirheni” ku katsa ni lava nga ha tsundzukiwiki kambe va nga emiehleketweni ya Xikwembu va ta pfuxiwa.—Yohane 5:28, 29.
ANAKANYISISA
Kambisisa vumbhoni lebyi nga eBibeleni lebyi kombisaka leswaku lava feke va ta pfuxiwa. Twana leswaku mhaka ya ku pfuxiwa ka vafi yi nga ku chavelela njhani ni ku ku nyika ntshembo.
4. Yesu u swi kombisile leswaku wa swi kota ku pfuxa lava feke
Twana leswi Yesu a swi endleleke munghana wakwe Lazaro. Hlaya Yohane 11:14, 38-44, ivi mi bula hi swivutiso leswi:
-
Hi swi tivisa ku yini leswaku Lazaro a a file hakunene?—Vona ndzimana 39.
-
Loko ku ri hileswaku Lazaro a ye etilweni, xana u ehleketa leswaku Yesu a a ta va a n’wi pfuxile leswaku a hanya laha misaveni?
5. Vo tala va ta pfuxiwa!
Hlaya Pisalema 37:29, ivi mi bula hi xivutiso lexi:
-
Vanhu va tibiliyoni lava nga ta pfuxiwa va ta hanya kwihi?
Yesu u ta pfuxa vanhu vo tala ku katsa ni lava a va nga n’wi gandzeli Yehovha. Hlaya Mitirho 24:15, ivi mi bula hi xivutiso lexi:
-
I mani loyi u navelaka ku n’wi vona a pfuxiwa enkarhini lowu taka?
Ehleketa hi mhaka leyi: Yesu wa swi kota ku pfuxa munhu loyi a feke ku fana ni tatana loyi a pfuxaka n’wana loyi a khomiweke hi vurhongo
6. Mhaka ya ku pfuxiwa ka lava feke yi nga ku chavelela ni ku ku nyika ntshembo
Mhaka ya le Bibeleni ya n’wana wa Yayiro yi chavelele ni ku khutaza vo tala lava nga ni gome. Hlaya hi mhaka yoleyo eka Luka 8:40-42, 49-56.
Loko Yesu a nga si pfuxa n’wana wa Yayiro, u byele Yayiro a ku: “U nga chavi, vana ni ripfumelo.” (Vona ndzimana 50.) Mhaka ya ku pfuxiwa ka lava feke yi nga ku chavelela njhani . . .
-
loko u feriwa hi munhu loyi u n’wi rhandzaka?
-
loko vutomi bya wena byi ri ekhombyeni?
Tlanga VHIDIYO, ivi mi bula hi xivutiso lexi landzelaka.
-
Yi va chavelele njhani vatswari va Phelicity mhaka ya ku pfuxiwa ka vafi?
VAN’WANA VA RI: “Vafi a va nge pfuxiwi.”
-
Wena u ri yini?
-
Hi rihi tsalwa leri u nga ri tirhisaka leri kombisaka leswaku lava feke va ta pfuxiwa?
NKATSAKANYO
Bibele yi tshembisa leswaku vanhu va tibiliyoni lava nga fa va ta pfuxiwa. Yehovha u lava va tlhela va hanya naswona u nyike Yesu matimba ya ku va pfuxa.
Mpfuxeto
-
Yehovha na Yesu va titwa njhani hi ku pfuxa lava feke?
-
Xana vanhu va tibiliyoni lava nga ta pfuxiwa va ta ya hanya kwihi, etilweni kumbe emisaveni? Hikwalaho ka yini u vula tano?
-
I yini lexi endlaka u tshemba leswaku maxaka ni vanghana va wena va ta tlhela va hanya?
KUMA LESWI ENGETELEKEKE
Twana leswi nga ku pfunaka loko u feriwile.
Xana misinya ya milawu ya Bibele yi nga n’wi pfuna munhu loyi a feriweke?
I yini lexi nga pfunaka vana loko va feriwe hi loyi va n’wi rhandzaka?
Xana ku ni lava nga ta pfuxeriwa ku ya hanya etilweni? I vamani lava nga taka va nga pfuxiwi?
“I Yini Ku Pfuxiwa Ka Vafi?” (Nhlokomhaka leyi kumekaka eka website)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
