A lifu li yentxa swaku vanhu va twa ku vava va tlhela va hlupheka. Hi mhaka leyo Bibele li vula swaku lifu i nala. (1 Vakorinto 15:26) Ka Djondzo 27, u djondze swaku Yehovha a ta mu helisa nala lweyi. Kambe ku ta yentxeka yini hi lava se va nga fa? Ka djondzo leyi u ta djondza hi xitshembiso xin’wana xa Yehovha xa ku tsakisa, ku nga ku pfuxiwa ka vanhu va vanyingi lava va nga fa swaku va hanya wutomi la ku kala li nga heli. Ku nga va swaku leswo swi ta yentxeka hikakunene? Va ta pfuxiwa swaku va hanya kwini? Atilweni kumbe lani misaveni?

1. Yehovha a lava ku ma yentxela yini maxaka ni vanghanu va hina lava va nga fa?

Yehovha a swi lava hintamu ku pfuxa vanhu lava va nga fa. Wanuna wa lipfumelo ku nga Yobo a a tiyiseka swaku Xikwembu a xi nga ta mu khohlwa loko a fa. Yena a te: “U ta vitana, kutani ni ta ku hlamula [na ni li Sirheni].” — Lerha Yobo 14:13-15.

2. Hi swi tivisa ku yini swaku lava va nga fa va nga pfuxiwa?

Nkama Yesu na a li lani misaveni, Xikwembu xi mu nyike matimba ya ku pfuxa vanhu lava va nga fa. Hi xikombiso, Yesu a pfuxe ximininana xa 12 wa malembe lexi a xi file ni n’wana wa wansati lweyi a a feliwe hi nuna. (Marku 5: 41, 42; Luka 7:12-15) Yesu a pfuxe ni munghanu wa yena Lazaru hambileswi se a a ni 4 wa masiku na a file. Yesu a khongele ka Xikwembu, a gama a ku: “Lazaru, huma handle!” Loko a game ku vula leswo “se Lazaru, lweyi a a file, a huma”, na a hanya. (Yohani 11:43, 44) Pimisa hi leswi maxaka ni vanghanu va Lazaru va nga tsakisa xiswona!

3. Hi wini ntshembo wu nga kona hi maxaka ni vanghanu va wena lava va nga fa?

Bibele li li lava va nga fa “va ta pfuxiwa.” (Mintirho 24:15) Lava Yesu a nga va pfuxa khale a nga va pfuxanga swaku va ya hanya tilweni. (Yohani 3:13) Vona a va tsakile hi ku tlhela va hanya kola misaveni. Hi ku fanana, Yesu a ta pfuxa vanhu va vanyingi swaku va hanya wutomi la ku kala li nga heli aparadesi lani misaveni. A vule swaku hinkwavu lava va nga ka mimpimiso ya Xikwembu va ta pfuxiwa, hambi hi lava hi kalaka hi nga ha va khumbuki. — Yohani 5:28, 29.

 DJONDZA SWIN’WANA

4. Yesu a swi kombisile swaku a nga swi kota ku pfuxa lava va nga fa

Djondza swin’wana hi leswi Yesu a nga swi yentxela munghanu wa yena Lazaru. Lerhani Yohani 11:14, 38-44, mi gama mi bula hi swivutiso leswi landzelaka:

• Hi swi tivisa ku yini swaku Lazaru a a file hikakunene? — Vona ndzimana 39.

• Loko ku li swaku Lazaru a a ye tilweni, u pimisa swaku Yesu a a ta mu sindzisa swaku a tlhela a ta hanya lani misaveni?

Sixtirani VHIDIYO.

5. Vanhu va vanyingi va ta pfuxiwa

Lerhani Tipisalema 37:29, mi gama mi bula hi xivutiso lexi landzelaka:

• Vanhu va vanyingi lava nga ta pfuxiwa va ta hanya kwini?

Yesu a ta pfuxa vanhu va vanyingi ku nga li lava gandzelaka Yehovha ntsena. Lerhani Mintirho 24:15, mi gama mi bula hi xivutiso lexi landzelaka:

• I mani lweyi a wu tsakela ku mu vona na a pfuxiwile?

• A ntshembo wa ku pfuxiwa ka vafi wu va tiyisise ku yini ni ku va nyika ntamu vapsali va Phelicity?

 LESWI HI NGA SWI DJONDZA

Bibele li tshembisa swaku vanhu va vanyingi lava nga fa va ta pfuxiwa. Yehovha a lava swaku va tlhela va hanya naswona a nyike Yesu matimba ya ku va pfuxa.

Ku kambela leswi hi nga swi djondza

• Yehovha na Yesu va titwisa ku yini hi ku pfuxa lava va nga fa?

• Vanhu va vanyingi lava nga ta pfuxiwa va ta pfuxiwa swaku va ya hanya tilweni kumbe kola misaveni? Hi mhaka muni u vula leswo?

• I mpsini swi ku kholwisaka swaku lava u va rhandzaka va nga tlhela va hanya?