Engachi uarhiranchajka nemani, kánikuachi kómu pʼikuarherasïnga. Jimbosï Biblia uandajti eska uarhikua ikiatspiti máeska (1 Korintu 15:26). Jorhenguarhikua 27 jimbo, chájtsï jorhenguarhiska eska Tata Diosï Jeoba kʼamajkuaka ini ikiatspitini. ¿Peru ambe úkuarhia imani kʼuiripuecha jingoni engaksï uarhikia? Ini jorhenguarhikua jimbo, sánderujtsï sési míteaka ambakiti ambe engajtsïni Tata Diosï Jeoba aiachijka: ima tsítantauati uánikua kʼuiripuechani parakaksï tsípikua jingoni irekaaka para méntkisï. ¡Ménderuksï irentaati! ¿Meru ísï úkuarhia i ambe? ¿Ka auandarhuksï tsíntaa o Echerirhu?

1. ¿Ambe uékasïni úni Tata Diosï Jeoba imeecha jingoni engachi xénchauenga ka engaksï uarhikia?

Tata Diosï Jeoba uékaxatiia tsítantaani imani kʼuiripuechani engaksï uarhikia. Jobu, achamasï ma enga kánikua mintsikeenga Tata Diosïni, seguru jarhaspti eska ima no mirikurhipiringa jiáni enga ima uarhipiringia ka enga “Tumbarhu” japiringia. Arhispti Tata Diosïni: “Tʼureni uandajpaaka ka jíkeni mókuchiaka” (arhinta je Job 14:13-15).

2. ¿Nénachi míteski eskaksï uarhiricha tsíntaaka?

Enga Jesúsi Echerirhu japka, Tata Diosï íntskuspti uinhapikua para tsítantaani kʼuiripuechani. Jimbosï Jesúsi tsítantapti nanakani ma enga 12 jatiripka ka tsïndiri uájpani ma (Markusʌ 5:41, 42; Lukasʌ 7:12-15). Tátsekua imeeri amigu Lásaru uarhispti. Ka nájkiruka tʼámu jurhiatikua páni japkia uarhirini ka jatsinhantania, Jesúsi tsítantaspti. Enga na kómarhipkia Tata Diosïni, uinhachaspti tumbani eraaparini: “Lásaru, juni uéntani”. Ka “uarhiri luejku uéntaspti”, ¡ka tsípiti jarhaspti! (Juanu 11:43, 44). ¿Eranhaskasïntsï na engaksï xáni tsípini japka Lásarueri familia ka imeeri amiguecha?

3. ¿Tsíntaaksï imeecha engajtsï chá xénchauenga?

Biblia aiatspesïndi eskaksï “tsíntaaka uarhiricha” (Ukuecha 24:15). Ima kʼuiripuecha enga Jesúsi tsítantaapka nóksï niraspti auandarhu (Juanu 3:13). Iáminduechaksï kánikua tsípini pʼikuarheraspti ménderu irekani ixú Echerirhu. Ka eska na úkuarhipka jiáni, no ióni jimbo Jesúsi tsítantauati uánikua kʼuiripuechani parakaksï tsípikua jingoni irekaaka para méntkisï ixú Echerirhu enga paraisu máeuakia. Jesúsi uandaspti eskaksï iámindu imeecha engaksï Tata Diosïri eratsekuarhu jaka, tsíntaakaksï, asta imeecha enga nóteru nema miáuajkia (Juanu 5:28, 29).

 JORHENGUARHI JE SÁNDERU AMBE

4. Jesúsi xarhatasti eska úsïnga tsítantaani uarhirichani

Jorhenguarhi je ambe ka ambe úspi Jesúsi imeeri amigu Lásaru jimbo. Arhinta je Juanu 11:14 ka 38-44, ka uandontskuarhi je íri ambe:

• ¿Nénachi míteski eska Lásaru meru uarhirixapka? (Exe je bersikulu 39).

• Enga Lásaru auandarhu nipiringa, ¿exesïntsï eska Jesúsi tsítantapiringa para ménderu Echerirhu irekani?

Exe je BIDEUNI.

5. ¡Uánikuechaksï ménderu irentaati!

Arhinta je Salmo 37:29 ka uandontskuarhi je íri ambe:

• ¿Naniksï irekaa xáni uánikua kʼuiripuecha engaksï tsíntaaka?

Jesúsi no solu imeechani tsítantauati engaksï Tata Diosï Jeobani marhuakuka; ístu tsítantauati máteru kʼuiripuechani. Arhinta je Ukuecha 24:15 ka uandontskuarhi je íri ambe:

• Engaksï uarhiricha tsíntaakia, ¿néntsï uékapirini exeni?

• ¿Néna uinhaperantaaspi ka sési pʼikuastantaani Felisiteri taati jémbeechani míteni eska jauaka tsíntskua?

 AMBE ENGACHI JORHENGUARHIKA

Biblia aiatspesïndi eskaksï uánikua kʼuiripuecha tsíntaaka. Tata Diosï Jeoba uékasïndi eskaksï ménderu irekaaka ka Jesúsini íntskusti uinhapikua para tsítantaani.

Ambejtsï jorhenguarhiski

• ¿Nénachi míteski eska Tata Diosï Jeoba ka Jesúsi uékaxakaksïa tsítantaani uarhirichani?

• ¿Naniksï irekaa xáni uánikua kʼuiripuecha engaksï tsíntaaka: auandarhu o Echerirhu? ¿Andijtsïsï ísï uandajki?

• ¿Andijtsïsï chá seguru jaki eskaksï tsíntaaka imeecha engajtsï chá kánikua xénchauenga?