SAMBIRO 30
Ŵakufwa Ŵazamuŵaso Ŵamoyo!
Tikuŵa na chitima chomene para uyo tikumutemwa wafwa. Lekani Baibolo likuti nyifwa ni mulwani. (1 Ŵakorinte 15:26) Mu Sambiro 27, tikasambira kuti Yehova wazamumazga mulwani uyu. Kweni kasi ntchivichi chizamuchitikira awo ŵali kufwa kale? Mu sambiro ili, tisambirenge chinthu chinyake chakukondweska icho Yehova walayizga. Wazamuwuska ŵabali ŵithu ŵanandi awo ŵali kufwa, ndipo ŵazamuŵaso ŵamoyo! Kasi ivi vingachitika nadi? Kasi ŵazamuwuskikira kuchanya panji pa charu chapasi?
1. Kasi Yehova wazamuŵachitira vichi ŵabali ŵithu awo ŵali kufwa?
Yehova ngwakukhumbisiska kuzakawuska ŵabali ŵithu awo ŵali kufwa. Yobu mwanalume wachipulikano wakagomezganga kuti Chiuta wangamuluwa yayi nanga wangafwa. Iyo wakati: “Muchemenge, ndipo ine nimuzgoraninge [kufuma ku Dindi].”—Ŵazgani Yobu 14:13-15.
2. Kasi tikumanya wuli kuti ŵakufwa ŵazamuwuka?
Apo Yesu wakaŵa pa charu chapasi, Chiuta wakamupa nkhongono zakuwuskira ŵakufwa. Yesu wakawuska msungwana wa vyaka 12 kweniso mwana wa chokoro. (Mariko 5:41, 42; Luka 7:12-15) Pamanyuma mubwezi wake Lazaro wakafwa. Nangauli Lazaro wakakhala mazuŵa ghanayi mu dindi, kweni Yesu wakamuwuska. Yesu wakati walomba kwa Chiuta, wakachemerezga kuti: “Lazaro, fuma!” Ndipo “munthu uyo wakaŵa wakufwa wakafuma” wamoyo! (Yohane 11:43, 44) Ghanaghanirani waka umo ŵabwezi kweniso ŵabali ŵake ŵakakondwera!
3. Kasi pali chigomezgo wuli cha ŵakutemweka ŵithu awo ŵali kufwa?
Baibolo likulayizga kuti: “Kuzamuŵa chiwuka.” (Milimo 24:15) Ŵanthu awo Yesu wakaŵawuska ŵakaluta kuchanya yayi. (Yohane 3:13) Iwo ŵakaŵaso ŵakukondwa na umoyo pano pa charu chapasi. Mwakuyana waka, sonosono apa Yesu wazamuwuska ŵanthu ŵanandi awo ŵazamukondwa na umoyo mu paradiso pano pa charu chapasi. Iyo wakati “wose awo ŵali mu madindi gha chikumbusko” ŵazamuwuka. Chiuta wakukumbuka nanga ni ŵanthu awo ŵali kufwa kale chomene ndipo wazamuŵawuska.—Yohane 5:28, 29.
MANYANI VINANDI
Wonani ukaboni kufuma mu Baibolo kuti ŵakufwa ŵazamuwuka nadi, kweniso umo layizgo la chiwuka lingamupembuzgirani na kumupani chigomezgo.
4. Yesu wakalongora kuti wali na nkhongono zakuwuska ŵakufwa
Wonani ivyo Yesu wakachitira mubwezi wake Lazaro. Ŵazgani Yohane 11:14, 38-44, kufuma apo dumbiskanani mafumbo agha:
-
Kasi tikumanya wuli kuti Lazaro wakafwa nadi?—Wonani vesi 39.
-
Lazaro waŵenge kuti wakaluta kuchanya wati wafwa, kasi mukughanaghana kuti mphanyi Yesu wakamuwuska kufuma mu dindi?
5. Ŵanthu ŵanandi ŵazamuwuka!
Ŵazgani Salimo 37:29, kufuma apo dumbiskanani fumbo ili:
-
Kasi ŵanthu ŵanandi awo ŵazamuwuka, ŵazamukhala nkhu?
Yesu wazamuwuska ŵanthu ŵanandi kusazgapo na awo ŵakusopa Yehova yayi. Ŵazgani Milimo 24:15, kufuma apo dumbiskanani fumbo ili:
-
Kasi imwe mungatemwa kuzakawona anjani kuti ŵawuskika?
Manyani kuti: Yesu wangawuska munthu uyo wafwa nga umo dada wangawuskira mwana wake mu tulo
6. Layizgo la chiwuka likutipembuzga na kutipa chigomezgo
Ŵanthu ŵanandi awo ŵali na chitima ŵakukhozgeka chomene na nkhani ya mu Baibolo ya mwana wa Yayiro. Ŵazgani nkhani iyi pa Luka 8:40-42, 49-56.
Pambere Yesu wandawuske mwana, wakaphalira Yayiro kuti: “Kopa chara, uŵe waka na chipulikano.” (Wonani vesi 50.) Kasi chigomezgo cha chiwuka chingamovwirani wuli para . . .
-
uyo mukumutemwa wafwa?
-
umoyo winu uli pangozi?
Wonelerani VIDIYO, kufuma apo dumbiskanani fumbo ili.
-
Kasi chigomezgo cha chiwuka chikaŵakhozga wuli ŵapapi ŵa Phelicity?
IVYO ŴANYAKE ŴAKUYOWOYA: “Nkhani ya chiwuka njakukondweska nadi, kweni vingachitika yayi.”
-
Kasi imwe mukuti wuli?
-
Kasi mungajura lemba wuli ilo likulongora kuti chiwuka chiliko nadi?
MWAKUDUMURA
Baibolo likulayizga kuti ŵanthu ŵanandi ŵazamuwuka. Yehova wakukhumba kuti ŵazakaŵeso na umoyo, ndipo wali kupeleka nkhongono kwa Yesu kuti wazakawuske ŵakufwa.
Kuweleramo
-
Kasi Yehova na Yesu ŵakujipulika wuli kuti ŵazamuwuska ŵakufwa?
-
Kasi ŵanthu ŵanandi awo ŵazamuwuskika ŵazamukhala nkhu? Kuchanya panji pa charu chapasi? Chifukwa wuli mwazgora nthena?
-
Kasi ntchivichi chikumukhorweskani kuti ŵakufwa ŵazamuwuka nadi?
SANGANI FUNDO ZAKUSAZGIKIRA
Wonani ivyo mungachita kuti muzizipizgenge para muli na chitima.
Kasi fundo za mu Baibolo zingawovwira munthu uyo wali na chitima?
Kasi ŵana ŵangachita wuli kuti ŵazizipizgenge para wakutemweka wawo wafwa?
Kasi ŵanthu wose ŵazamuwuskikira kuchanya? Kasi mbanjani awo ŵazamuwuka yayi?
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
