A te mate e fai ei ke fanoa‵noa malosi tatou. Tenā te pogai e taku ei i te Tusi Tapu me se fili. (1 Kolinito 15:26) I te Mataupu 27, ne tauloto koe me ka fakaseai atu ne Ieova a te fili tenā. Kae ne a mea ka ‵tupu ki tino kolā ko oti ne ‵mate? I te mataupu tenei ka tauloto ne koe a mea e uke atu e uiga ki te suā folafolaga gali a Ieova​—ka toe faka‵foki mai ne ia te fia piliona o tino ke mafai o ola ki te se-gata-mai. Ka faka‵tu mai ne ia latou! E a, e mafai o tupu se mea penā? E mata, ka faka‵tu aka latou ke ola i te lagi io me i te lalolagi?

1. Se a te mea e manako a Ieova ke fai ki ‵tou tino pele kolā ko oti ne ‵mate?

E manako malosi a Ieova ke toe fakaola a tino ‵mate. Ne loto talitonu a te tagata fakatuanaki e fakaigoa ki a Iopu me ka se mafai o puli a ia ne te Atua māfai ko mate. Ana muna ki te Atua: “Ka kalaga mai koe, kae ka tali atu au ki a koe [mai te Tanuga].”​—Faitau te Iopu 14:13-15.

2. E iloa pefea ne tatou me ka toe faka‵tu aka a tino ‵mate?

I te taimi ne nofo ei a Iesu i te lalolagi, ne tuku atu ne te Atua a te ‵mana ki a ia ke mafai o toe faka‵tu aka a tino. Ne fakatu aka ne Iesu mai te mate se tamaliki fafine ko 12 ana tausaga mo te tamaliki tagata a se fafine ko mate tena avaga. (Maleko 5:41, 42; Luka 7:12-15) Fakamuli ifo, ne mate te taugasoa o Iesu ko Lasalo. E tiga loa ko oti ne mate kae tanu foki a Lasalo i aso e fa, ne toe fakatu aka ne Iesu a ia ki te ola. I te otiga ne ‵talo ki te Atua, ne ‵fuli atu a Iesu ki te tanuga kae kalaga atu: “Lasalo, vau ki tua!” Kae “ne vau ki tua te tagata telā ne mate”​—ko ola! (Ioane 11:43, 44) Mafaufau ki te fia‵fia o kāiga mo taugasoa o Lasalo i te taimi tenā!

3. Se a te fakamoemoega mō ou tino pele kolā ko oti ne ‵mate?

E folafola mai te Tusi Tapu: “Ka toe‵tu mai a tino.” (Galuega 24:15) A tino kolā ne faka‵tu aka ne Iesu i aso mua ne seki olo ki te lagi. (Ioane 3:13) Ne fia‵fia latou ke toe faka‵tu mai ki te ola i te lalolagi nei. I se auala tai ‵pau, ko pili o faka‵tu aka ne Iesu a te fia piliona o tino ke mafai o ola ki te se-gata-mai i te lalolagi palataiso. Ne fai mai a ia me i tino katoa kolā e masaua ne te Atua, ka toe faka‵tu aka, faitalia me ko seai se tino koi masaua ne ia latou.​—Ioane 5:28, 29.

 KELI MALOSI IFO

4. Ne fakamaoni mai ne Iesu me e mafai o toe faka‵tu aka ne ia a tino ‵mate

Tauloto ki mea e uke atu ne fai ne Iesu ki tena taugasoa ko Lasalo. Faitau te Ioane 11:14, 38-44, ko sau‵tala ei ki fesili konei:

• E iloa pefea ne tatou me ne mate eiloa a Lasalo? —Onoono ki te fuaiupu 39.

• Moi ne nofo atu a Lasalo i te lagi, se a tau faka‵tau, e mata, ka toe fakafoki mai a ia ne Iesu ki te ola i te lalolagi nei?

Pei te VITIO.

5. E tokouke a tino ka toe‵tu mai!

Faitau te Salamo 37:29, ko sau‵tala ei ki te fesili tenei:

• Tefea te koga ka ola i ei a te fia piliona o tino kolā ka toe‵tu mai?

Ka faka‵tu aka ne Iesu a nisi tino e tokouke i tafa o tino tapuaki ki a Ieova. Faitau te Galuega 24:15, ko sau‵tala ei ki te fesili tenei:

• Ko oi e fia fetaui koe ki ei māfai ko toetu mai?

• Ne fakamafanafana kae ne fakamalosi atu pefea ki mātua o Phelicity a te fakamoemoega ki te toetuga?

 MANATU AOGA

E folafola mai te Tusi Tapu me ka toe faka‵tu aka a te fia piliona o tino kolā ko oti ne ‵mate. E manako a Ieova ke ‵toe ola latou kae ko oti ne tuku ne ia te ‵mana ki a Iesu ke faka‵tu mai latou.

Fesili

• E pefea lagonaga o Ieova mo Iesu e uiga ki te ‵toe faka‵tumaiga o tino ‵mate?

• Tefea te koga ka toe faka‵tu ki ei a te fia piliona o tino​—i te lagi io me i te lalolagi? Kaia e tali mai ei koe penā?

• Se a te mea e fakatalitonu atu ki a koe me ka mafai eiloa o toe ola mai ou tino pele?