КИЧЭЭЛ 30
Чок апарган улус катап чурттаар!
Өлүм дыка хөй ыы-сыы, ажыг-шүжүгнү эккеп турар. Библияда өлүмнү дайзын деп адаан (1 Коринфичилерге 15:26). Иегова өлүмнү узуткаар деп 27 дугаар кичээлден билип алган бис. А шагда-ла чок апарган улусту канчаар? Миллиард-миллиард кижилерни мөңге чурттаар кылдыр диргизер дээн Иегованың база бир кайгамчыктыг аазаашкынын бо кичээлден билип алыр силер. Шынап ол болдунар бе? Дирлип келген кижилер дээрге чурттаар бе азы черге бе?
1. Чок апарган улуска Иегова чүнү кылыр?
Өлген улусту чуртталгаже катап эгидерин Иегова дыка күзеп турар. Бурган шынчы бараалгакчызын утпас деп, Иов бүзүрээр болгаш: «Сен ынчан кыйгырар ийик сен, а мен [хөөрден] харыылаар ийик мен» — дээн. (Номчуптуңар: Иов 14:13—15.)
2. Чок апарган кижини диргизип болур деп кайыын билир бис?
Бурган Оглунга кижилерни диргизер күштү берген. 12 харлыг уругну болгаш бир херээжен кижиниң оглун Иисус диргискен (Марк 5:41, 42; Лука 7:12—15). Эжи Лазар чок апарган соонда, дөрт хонук эрткенде, Иисус ону диргизипкен. Эгезинде ол Бурганга мөргээш: «Лазар, куй иштинден үнүп кел!» дээрге, эжи үнүп келген (Иоанн 11:43, 44). Лазар катап дириг! Эштери болгаш төрелдери кайы хире өөрээнин, сагыштаалап көрүңер даан!
3. Чок апарган улуска кандыг идегел бар?
Ыдыктыг Бижилгеде диргизиишкин болур деп аазаашкын бар (Ажыл-чорудулга 24:15). Бурганның оглу кижилерни дээрге эвес, а черге өөрүшкүлүг чурттазын дээш диргизип турган (Иоанн 3:13). Черге дываажаңга мөңге чурттаар кылдыр миллиард-миллиард кижилерни ол диргизер. Иисус «чевеглерде чыдар бүгү улус» дирлип кээр дээн. Шагда-ла уттундурган кижилерни безин Бурган диргизиптер (Иоанн 5:28, 29).
ХАНЫ ШИНЧИЛЕҢЕР
Иисус кижилерни диргизип шыдаар база ону албан кылыр деп бадыткалдарны көрүңер. Диргизиишкинге идегел оожургалды бээрин билип алыр силер.
4. Диргизиишкин болдунар деп, Иисус бадыткаан
Эжи Лазарга Иисустуң чүнү кылганын эки билип алыңар. Иоанн 11:14, 38—44-тү номчааш, харыылаптыңар:
-
Лазарь шынап өлген деп кайыын билир бис? (39 дугаар шүлүктү көрүңер.)
-
Чүү деп бодаар силер, Лазарь дээрже үне берген болза, Иисус ону диргизер турган бе?
5. Миллиард-миллиард кижилер дирлип кээр!
Ырлар 36:29-ту номчааш, харыылаптыңар:
-
Дирлип келген улус каяа чурттаар?
Иегованың бараалгакчыларындан өске улусту база Иисус диргизер. Ажыл-чорудулга 24:15-ти номчааш, харыылаптыңар:
-
Кымның дирлип келирин көрүксээр силер?
Ачазы оглун оттуруптары ышкаш, өлген кижини диргизери Иисуска берге эвес
6. Диргизиишкин оожургалды болгаш идегелди бээр
Иаирниң уруун диргискен төөгү дыка хөй улусту аргалап, чидиригниң аарышкызын оожургаткан. Лука 8:40—42, 49—56-да болган төөгүнү номчуптуңар.
Уруун диргизиптериниң мурнунда Иисус Иаирге: «Кортпа, чүгле бүзүрелиң ышкынма» — дээн. (50 дугаар шүлүктү көрүңер.) Диргизиишкинге идегел силерге канчаар дузалап болур:
-
чоок улузуңарны чидирген болзуңарза?
-
амы-тыныңар айыылда болза?
ВИДЕОНУ көргеш, айтырыгга харыылаптыңар:
-
Диргизиишкинге идегел Фелиситиниң ада-иезин канчаар аргалап, улаштыр чурттаар күштү берип турар?
ЧАМДЫК УЛУС МЫНЧА ДЕП БОЛУР: «Диргизиишкин дээрге анаа чараш тоол-дур».
-
А силер чүү деп бодаар силер?
-
Диргизиишкин ыяап болур деп кандыг библейжи шүлүктү көргүзүп болур силер?
КОЛ БОДАЛ
Миллиард-миллиард кижилерни дирлип кээр деп, Бурган аазаан. Ынчангаш Иегова Иисуска диргизер күштү берген.
Катаптаашкын
-
Иегова биле Иисус чүге миллиард-миллиард кижилерни диргизер?
-
Дирлип келген улус каяа чурттаар: дээрге бе азы черге бе?
-
Диргизиишкин болур деп силерни чүү бүзүредип турар?
НЕМЕЛДЕ
Чидиригниң аарышкызын чүү оожургадып болурун номчуп көрүңер.
Чоок кижизин чидирген кижиге Библия дузалап болур бе?
Чоок кижизи чок апарган бичии кижиге канчаар дузалаарыл?
Дээрге чурттаар кылдыр диргизер кижилер бар бе? Кымны шуут диргиспес?
Силерге солун бооп болур
ҮРГҮЛЧҮ САЛЫР АЙТЫРЫГЛАР
Иегованың Херечилериниң библейжи кичээлдери канчаар эртип турар?
Иегованың Херечилеринде Ыдыктыг Бижилге-биле таныжып алырынга дузалаар ажыктыг курс бар. Өөредилге үезинде бодуңарның Библияңарны ажыглап, кичээлдерже өг-бүлеңерни, эштериңерни чалап ап болур силер.
