OCIPAMA 30
Vangandiove va Pondola Oku Kuata Vali Omuenyo!
Olofa vi koka evalo lialua kuenda esumuo. Eli olio esunga lieci Embimbiliya li tukuila olofa okuti, unyãli. (1 Va Korindo 15:26) Vocipama 27, wa lilongisa okuti, Yehova o ka kundula unyãli waco. Pole, nye ci ka pita lomanu vana va fa ale? Vocipama cilo, o lilongisa ohuminyo yikuavo yi komõhisa ya Yehova yoku pindula omanu valua oco va sanjukile oku kala vali komuenyo otembo ka yi pui. Eye o ka va pindula! Eci ci ka lingiwa muẽle? Ovo va ka pinduiwila oku kala kilu, ale palo posi?
1. Nye Yehova a yongola oku lingila vangandietu va fa?
Yehova o yongola oku pindula omanu va fa oco va kuate vali omuenyo. Ulume umue ukuekolelo o tukuiwa Yovi, wa kolelele okuti, Suku ka ko wivala eci eye a fa. Eye wa sapuila Suku hati: “Ove o ka kovonga kuenje ame ndi ka ku tambulula [Vonjembo].”—Yovi 14:13-15.
2. Tua kũlĩha ndati okuti vana va fa va ka pinduiwa?
Eci Yesu a kala palo posi, Suku wa ecele kokuaye unene woku pindula omanu va fa. Yesu wa pindula kafeko wa kuatele 12 kanyamo kuenda omõla ulume wocimbumba cimue. (Marko 5:41, 42; Luka 7:12-15) Noke ekamba lia Yesu Lasaru, wa fa. Ndaño okuti tunde eci Lasaru a fa kuenda wa kendiwa pa pitile ale oloneke vikuãla, Yesu wo pindula. Yesu noke yoku likutilila ku Suku, poku vandekela keyambo wa kaluka hati: “A Lasaru, tundila posamua!” Kuenje “ulume wa file, wa tundila posamua” lomuenyo! (Yoano 11:43, 44) Sokolola esanju akamba kuenda epata lia Lasaru va kuata!
3. Elavoko lipi o kuete liatiamẽla ku vangandiove va fa?
Embimbiliya li likuminya okuti: “Ku laika oku kala epinduko.” (Ovilinga 24:15) Vana Yesu a pindula kosimbu, ka va endele kilu. (Yoano 3:13) Ovo va sanjukilile oku pinduiwila muẽle palo posi. Cimuamue haico okuti, Yesu ndopo o ka pindula omanu valua oco va sanjukile oku kala komuenyo otembo ka yi pui vocumbo celau palo posi. Eye wa popia hati: “Vosi va kasi vayambo”—oku kongelamo vana va kasi ndu okuti va ivaliwa, pole, va kasi vovisimĩlo via Suku,—va ka pinduiwa.—Yoano 5:28, 29.
LILONGISA ONDONGOSI
Lilongisa Vembimbiliya esunga lieci tu sukilila oku kolela okuti, Yesu o kuete unene woku pindula omanu kuenda o ka ci linga muẽle. Lilongisavo ndomo epinduko li ku lembeleka loku ku ĩha elavoko.
4. Yesu wa lekisa okuti, o pondola oku pindula vana va fa
Lilongisa ovina vikuavo Yesu a lingila ekamba liaye Lasaru. Tanga Yoano 11:14, 38-44, noke konomuisa apulilo a kuãimo:
-
Tua kũlĩha ndati okuti Lasaru wa file muẽle? —Tala ocinimbu 39.
-
Nda Lasaru wa endele kilu, o sima okuti Yesu poku u pindula nda wo nena vali palo posi?
5. Valua va ka pinduiwa!
Tanga Olosamo 37:29, noke konomuisa epulilo li kuãimo:
-
Omanu valua va ka pinduiwa, va ka kala pi?
Yesu o ka pindula omanu valua okuti, vana va vumbile Yehova ci sule. Tanga Ovilinga 24:15, noke konomuisa epulilo li kuãimo:
-
Helie ove o yongola oku ka mola vali oku pinduiwa?
Sokolola ocindekaise eci: Yesu o pondola oku pindula lonjila ya leluka omunu umue ndeci isia umue a pasula omõlaye kotulo
6. Epinduko li pondola oku ku lembeleka loku ku ĩha elavoko
Ulandu u sangiwa Vembimbiliya womõla a Yairo, wa siata oku lembeleka loku pamisa omanu valua va pumba vangandiavo. Tanga ulandu waco wocili, kelivulu lia Luka 8:40-42, 49-56.
Osimbu omõla a Yairo ka pinduiwile, Yesu wa sapuila isia yaco hati: “Ku ka kuate usumba; kuata ño ekolelo.” (Tala ocinimbu 50.) Elavoko liepinduko li ku kuatisa ndati . . .
-
nda umue ngandiove wa fa?
-
nda omuenyo wove u kasi kohele?
Tala OVIDEO, noke konomuisa epulilo li kuãimo.
-
Elavoko Iiepinduko lia siata oku lembeleka loku pamisa ndati olonjali via Phelicity?
OMANU VAMUE VA POPIA VATI: “Ca tĩla oku tava okuti, omanu va fa va ka kuata vali muẽle omuenyo.”
-
Nye o sima?
-
Ocisonehua cipi nda wa longisa laco oco o lekise okuti, ku laika oku kala epinduko?
NYE WA LILONGISA?
Embimbiliya lia likuminya okuti, omanu valua va fa, va ka pinduiwa. Yehova o yongola okuti, ovo va kuata vali omuenyo kuenda wa eca ku Yesu unene woku va pindula.
Oku Pitulula
-
Yehova la Yesu va liyevite ndati catiamẽla koku pindula vana va fa?
-
Omanu valua va ka pinduiwa va ka kala—kilu, ale palo posi? Momo lie o ci popela?
-
Nye ci ku vetiya oku tava okuti, vangandiove va fa va ka kuata vali omuenyo?
OCO O KŨLĨHE OVINA VIKUAVO
Kũlĩha olonumbi vi ku kuatisa poku liyaka lesumuo lioku pumba umue ngandiove.
Olonumbi Viembimbiliya vi kuatisa hẽ omunu umue wa pumba ngandiaye?
Omãla va pondola oku liyaka ndati lolofa via umue ngandiavo?
Omanu vosi va ka pinduiwila oku kala kilu? Helie ka ka pinduiwa?
“Epinduko li Lomboloka Nye?” (Ocipama ci sangiwa lika vo Internet)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
