UYONO 30
Ihwo Wẹn ri Ghwuru Cha Rhoma Dia!
Ughwu so uvweri vẹ omaemuophiyọ. Kọyensorọ Baibol na vwo se ughwu ọvweghrẹn. (1 Kọrẹnt 15:26) Vwẹ Uyono 27, wo yonori nẹ Jihova che phi ọvweghrẹn yena kparobọ. Ẹkẹvuọvo, die yen cha phia kẹ ihwo ri ghwuru jovwore? Vwẹ uyono nana, wo che yono kpahen ive ri Jihova ọfa—ọ cha rhọvwọn ihwo buebun ri ghwuru nushi rere ayen vwọ dia bẹdẹ vwẹ otọrakpọ na. Ọ cha rhọvwọn ayen! Ọ ghene sa phia? A cha rhọvwọn ayen kpo odjuvwu gbanẹ otọrakpọ na?
1. Die yen Jihova guọnọ ru vwọ kẹ ihwo rẹ avwanre vwo ẹguọnọ kpahen ri ghwuru?
Jihova rhẹro ọke rọ cha vwọ rhọvwọn ihwo ri ghwuru nushi. Ọshare ọvo ro vwo esegbuyota re se Job vwo imuẹro nẹ Ọghẹnẹ cha karophiyọ ọyen ọke ro de ghwu. Ọ da vuẹ Ọghẹnẹ: “Ko wo se, ki mi nyo we; [vwo nẹ ushi rhe].”—Se Job 14:13-15.
2. Mavọ yen a vwọ riẹn nẹ ihwo ri ghwuru che vrẹn nushi?
Jesu vwọ hẹ otọrakpọ na, Ọghẹnẹ kẹrẹ ẹgba rọ vwọ rhọvwọn ihwo ri ghwuru. Jesu rhọvwọn ọmọtẹ rẹ ẹgbukpe 12 vẹ ọmọ rẹ ayeuku ọvo. (Mak 5:41, 42; Luk 7:12-15) Ọke vwọ yanran na, ugbeyan ri Jesu re se Lazarọs de ghwu. Dede nẹ Lazarọs ghwuru ẹdẹ ẹne re, jẹ e ji sho re, Jesu da rhọvwọn nushi. Ọ vwọ nẹrhovwo rhe Ọghẹnẹ nu, Jesu de kperi: “Lazarọs, yanrhe. Ohwo ro ghwuru na da yanrhe”—Lazarọs rhọvwọn nushi re! (Jọn 11:43, 44) Vwẹro roro oborẹ oma vwerhen orua vẹ igbeyan ri Lazarọs te!
3. Iphiẹrophiyọ vọ yen herọ vwọ kẹ ihwo ri ghwuru?
Baibol na da ta: “Evrẹnushi herọ.” (Iruo Rẹ Iyinkọn Na 24:15) Ihwo rẹ Jesu rhọvwọn nushi rhe ọke rọ vwọ hẹ otọrakpọ na kpo odjuvwu-u. (Jọn 3:13) Oma vwerhen ayen ra vwọ rhọvwọn ayen rhe otọrakpọ na. Chekemerha, Jesu cha rhọvwọn ihwo buebun vwọ dia iparadaisi vwẹ otọrakpọ na bẹdẹ. Ọ tare nẹ, “irivwi rẹ hẹ evun rẹ ishi ejobi” kọyen ihwo re tobọ chọrọ avwanre ẹro re, hẹ evunrẹ ẹkarophiyọ rẹ Ọghẹnẹ. Ọ cha rhọvwọn ayen eje.—Jọn 5:28, 29.
HIẸ KODO
Fuẹrẹn oborẹ Baibol na tare ro djerephia nẹ a cha rhọvwọn ihwo ri ghwuru nushi. Mrẹ oborẹ evrẹnushi na sa vwọ vwẹ uchebro vẹ iphiẹrophiyọ kẹ wẹ.
4. Jesu djerephia nẹ ọyen sa rhọvwọn ihwo ri ghwuru nushi
Yono kpobarophiyọ kpahen oborẹ Jesu ru kẹ ugbeyan rọyen Lazarọs. Se Jọn 11:14, 38-44, ovwan ta ota kpahen onọ nana:
-
Mavọ yen avwanre ru riẹn nẹ Lazarọs ghini ghwu?—Ni awọreta 39.
-
Ọ da dianẹ Lazarọs kpo odjuvwu, kẹ wo rorori nẹ Jesu cha rhoma rhọvwọn rhe otọrakpọ na?
5. A cha rhọvwọn ihwo buebun ri ghwuru nushi rhe!
Se Une Rẹ Ejiro 37:29, ovwan ta ota kpahen onọ nana:
-
Tivọ yen ihwo buebun ra cha rhọvwọn nushi rhe na cha dia?
Vwọ vrẹ ihwo re ga Jihova, Jesu je cha rhọvwọn ihwo buebun efa nushi rhe. Se Iruo Rẹ Iyinkọn Na 24:15, ovwan ta ota kpahen onọ nana:
-
Ono yen wọ guọnọ mrẹ vwẹ usun rẹ ihwo ra cha rhọvwọn nushi rhe?
Di roro: Jesu sa fobọ rhọvwọn ohwo ro ghwuru kirobo rẹ ọsẹ sa rhọvwọn ọmọ rọ vwerhẹn
6. Evrẹnushi na sa kẹ wẹ uchebro vẹ iphiẹrophiyọ
Ikuegbe rẹ ọmọtẹ ri Jairọs rọhẹ Baibol na vwo uchebro vẹ uduephiophiyawọ vwọ kẹ ihwo ri vwere uvweri. Se ikuegbe yena vwẹ Luk 8:40-42, 49-56.
Jesu ke rhọvwọn ọmọtẹ ri Jairọs, ọ da vuẹ ọsẹ rẹ ọmọ na: “Wọ djẹ oshọ-ọ; takpi segbuyota.” (Ni awọreta 50.) Mavọ yen iphiẹrophiyọ rẹ evrẹnushi na sa vwọ chọn wẹ uko . . .
-
ọke rẹ ohwo wo vwo ẹguọnọ kpahen de ghwu?
-
ọke rẹ arhọ wẹn da hẹ ẹdia rẹ imuoshọ?
Hworo IVIDIO na, ovwan ta ota kpahen onọ nana.
-
Idjerhe vọ yen iphiẹrophiyọ rẹ evrẹnushi na vwọ vwẹ uchebro vẹ uduephiophiyawọ vwọ kẹ ọsẹ vẹ oni ri Phelicity?
IHWO EVO TA: “Ọ bẹnre re vwo vwo imuẹro nẹ ihwo ri ghwuru na cha rhoma dia.”
-
Die wo rorori?
-
Ẹkpo ri Baibol vọ yen wo se vwo djephia nẹ evrẹnushi cha dia?
ỌDJẸKOKO
Baibol na tare nẹ a cha rhọvwọn ihwo buebun ri ghwuru nushi. Jihova guọnọre nẹ ayen rhoma dia. Ọ vwẹ ogangan vwọ kẹ Jesu rọ vwọ rhọvwọn ayen nushi.
Ẹrhomafuẹrẹn
-
Mavọ yen oma ru Jihova vẹ Jesu kpahen evrẹnushi rẹ ihwo ri ghwuru na?
-
Tivọ yen ihwo ra cha rhọvwọn nushi rhe cha dia—odjuvwu gbanẹ otọrakpọ na? Diesorọ wọ vwọ ta ọtiọyen?
-
Die yen kẹ wẹ imuẹro nẹ ihwo ri ghwuru cha rhoma dia?
HIẸ GUỌNỌ
Yono kpahen obo wo se vwo yerin ghene uvweri.
“Ukẹcha Ra Vwọ kẹ Ihwo ri Vwere Uvweri” (Awake! Ukeri 3 2018)
Odjekẹ ri Baibol sa ghene vwẹ ukẹcha vwọ kẹ ohwo ro vwere uvweri?
Mavọ yen emọ se vwo yerin ghene ughwu rẹ ohwo rẹ ayen vwo ẹguọnọ kpahen?
A cha rhọvwọn ihwo evo kpo odjuvwu? Kẹ, ihwo vọ yen a cha rhọvwọ-ọn?
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
