O‘lim ko‘p qayg‘u hamda tushkunlikka sabab bo‘ladi. Shu bois, o‘lim Muqaddas Kitobda dushman deb atalgan. (1 Korinfliklarga 15:26) 27- darsda Tangri Yahova bu dushmanni yengishini bilib oldingiz. Biroq o‘lganlar bilan nima bo‘ladi? Ushbu darsda Yahovaning yana bir ajoyib va’dasi, ya’ni milliardlab odamlarni hayotdan toabad zavqlanib yashashi uchun tiriltirishi to‘g‘risida bilib olasiz. Xudo ularni hayotga qaytaradi! Xo‘sh, bu chindan ham yuz berishi mumkinmi? Ular osmonda yoki yer yuzida yashash uchun tiriladimi?

1. Hayotdan ko‘z yumgan yaqinlarimiz uchun Yahova nima qilmoqchi?

Yahova o‘lganlarni hayotga qaytaradigan paytni intiqib kutyapti. Ayub payg‘ambar Alloh uni o‘limidan so‘ng unutmasligiga amin edi. U Xudoga shunday degan: «Meni chaqirasan, men esa [mozordan] javob beraman». (Ayub 14:13–15 ni o‘qing.)

2. O‘lganlar tirilishi mumkinligini qayerdan bilamiz?

Iso yer yuzida bo‘lganida Xudo unga odamlarni tiriltirish qudratini berdi. U 12 yoshli qizchani va bevaning o‘g‘lini hayotga qaytardi. (Mark 5:41, 42; Luqo 7:12–15) Keyinroq Isoning do‘sti Lazar vafot etdi. Uning o‘lganiga va qabrga qo‘yilganiga to‘rt kun bo‘lgan bo‘lsa-da, Iso uni hayotga qaytardi. Iso Xudoga ibodat qildi va baland ovozda: «Lazar, tashqariga chiq!» — dedi. Shunda «jasad chiqib keldi». Bu Lazar edi. (Yuhanno 11:43, 44) Lazarning do‘stlari-yu oila a’zolari naqadar xursand bo‘lganini bir tasavvur qiling.

3. Hayotdan ko‘z yumgan yaqinlaringiz uchun qanday umid bor?

Muqaddas Kitobda «odamlarning tirilishi» va’da qilingan. (Havoriylar 24:15) Iso yer yuzida bo‘lganida tiriltirgan odamlar osmonga ko‘tarilmagan. (Yuhanno 3:13) Iso ularni aynan bu yer yuzida tiriltirgan va ular bundan baxtiyor edi. Shu singari, yaqinda u milliardlab insonlarni yer yuzidagi jannatda hayotdan toabad zavqlanib yashashi uchun tiriltiradi. U «xotira mozorlarida bo‘lgan hamma», hatto unutilganday ko‘ringan, ammo Xudoning xotirasida bo‘lganlar hayotga qaytarilishini aytgan. (Yuhanno 5:28, 29, izoh)

 KO‘PROQ BILIB OLING

4. Iso o‘lganlarni tiriltirishga qodir ekanini isbotladi

Iso do‘sti Lazar uchun nimalar qilgani haqida ko‘proq bilib oling. Yuhanno 11:14, 38–44 ni o‘qing, so‘ng quyidagi savollarni muhokama qiling:

• Lazar chindan ham o‘lganini qayerdan bilamiz? (39- oyatga qarang.)

• Nima deb o‘ylaysiz, Lazar o‘lganidan keyin jannatga tushganida, Iso uni tiriltirib, yerda yashashga majburlarmidi?

VIDEONI tomosha qiling.

5. Ko‘plar tiriladi!

Zabur 37:29 ni o‘qing, so‘ng quyidagi savolni muhokama qiling:

• Tiriladigan milliardlab insonlar qayerda yashaydi?

Iso Masih Yahovaga topinadiganlardan tashqari yana ko‘plarni tiriltiradi. Havoriylar 24:15 ni o‘qing, so‘ng quyidagi savolni muhokama qiling:

• Kimning tirilishini istardingiz?

• Qay yo‘sin tirilish umidi Felisitining ota-onasiga dalda va tasalli baxsh etdi?

 XULOSA

Muqaddas Kitobda milliardlab insonlar tirilishi borasida va’da qilingan. Yahova ular yana yashashini istaydi va Isoga ularni tiriltirish qudratini bergan.

Takrorlash

• Yahova hamda Iso o‘lganlarni hayotga qaytarishni istayotganini qayerdan bilamiz?

• Tirilgan milliardlab odamlar qayerda yashaydi — osmondami yoki yerdami? Nega bunday fikrdasiz?

• Qadrdon yaqinlaringiz yana yashashiga sizni nima ishontiryapti?