NGUDO 30
Mashaka Aṋu Na Khonani Dzaṋu Vha Nga Dovha Vha Tshila!
Lufu lu a ri khathula mbilu na u ri ṱungufhadza. Ndi ngazwo Bivhili i tshi amba uri lufu ndi swina. (1 Vhakorinta 15:26) Kha Ngudo 27, no guda uri Yehova u ḓo kunda ḽeneḽi swina. Fhedzi hu ḓo itea mini nga vhathu vho no lovhaho? Kha heyi ngudo, ni ḓo guda nga ha zwiṅwe zwithu zwavhuḓi zwe Yehova a zwi fhulufhedzisa. U ḓo vusa vhathu vhanzhi-vhanzhi vho lovhaho uri vha ḓiphiṋe nga vhutshilo lwa tshoṱhe. U ḓo ita uri vha dovhe vha tshile! Naa zwenezwo zwi nga itea zwa vhukuma? Naa vha ḓo vuswa uri vha tshile ṱaḓulu kana kha ḽifhasi?
1. Yehova u ṱoḓa u itela mini mashaka ashu na khonani dzashu vho lovhaho?
Yehova u ṱoḓa nga mbilu yoṱhe u vusa vhathu vho lovhaho. Muṅwe munna we a vha e na lutendo ane a pfi Yobo, o vha e na vhungoho ha uri Mudzimu a nga si vhuye a mu hangwa musi o no lovha. O vhudza Mudzimu a ri: “U ḓo vhidzelela, nṋe nda aravha [ndi Vhiḓani].”—Vhalani Yobo 14:13-15.
2. Ri zwi ḓivha hani uri vhafu vha nga vuswa?
Musi Yesu e kha ḽifhasi, Mudzimu o mu ṋea maanḓa a u vusa vhathu vho lovhaho. Yesu o vusa musidzana we a vha e na miṅwaha ya 12 na ṅwana wa tshilikadzi. (Marko 5:41, 42; Luka 7:12-15) Nga murahu, Lazaro khonani ya Yesu o mbo ḓi lovha. Yesu o vusa Lazaro naho ho vha ho no fhela maḓuvha maṋa o lovha. Yesu o thoma a rabela kha Mudzimu nahone nga murahu a vhidzelela a ri: “Lazaro, ibva!” “Lazaro a bva.” O vha o vuswa vhafuni! (Yohane 11:43, 44) Edzani u humbula nḓila ye mashaka a Lazaro na khonani dzawe vha vha vho takala ngayo!
3. Naa hu na fhulufhelo ḽa uri ni ḓo dovha na vhona mashaka aṋu na khonani dzaṋu vho lovhaho?
Bivhili i fhulufhedzisa uri: “Mudzimu u ḓo vusa” vhathu vho lovhaho. (Mishumo 24:15) Vhathu vhe Yesu a vha vusa musi e kha ḽifhasi, vho vha vha songo ya ṱaḓulu. (Yohane 3:13) Yesu o vha vusela kha ḽifhasi nahone vho takalela u vuselwa kha ḽifhasi. Nga hu fanaho, hu si kale Yesu u ḓo vusa vhathu vhanzhi-vhanzhi vho lovhaho uri vha ḓiphiṋe nga u tshila lwa tshoṱhe pharadisoni kha ḽifhasi. O amba uri hu ḓo vuswa “vhoṱhe vha re mavhiḓani.” Hu ḓo vuswa na vhoṱhe vhane Mudzimu a vha ḓivha vhane riṋe ra si vha ḓivhe.—Yohane 5:28, 29.
GUDANI ZWO ENGEDZEAHO
Gudani Bivhilini uri ndi ngani ri tshi nga vha na vhungoho ha uri Yesu u na maanḓa a u vusa vhathu vho lovhaho na uri u ḓo vha vusa zwa vhukuma. Gudani uri u vuswa ha vhafu zwi nga ni khuthadza hani na u ita uri ni vhe na fhulufhelo.
4. Yesu o sumbedza uri a nga kona u vusa vhafu
Gudani zwo engedzeaho nga zwe Yesu a zwi itela khonani yawe Lazaro. Vhalani Yohane 11:14, 38-44, ni kone u fhindula mbudziso dzi tevhelaho:
-
Ri zwi ḓivha hani uri Lazaro o vha o lovha zwa vhukuma?—Vhalani vese 39.
-
Arali Lazaro o vha o ya ṱaḓulu, naa ni vhona u nga Yesu o vha a tshi ḓo vha o mu vusa uri a tshile kha ḽifhasi?
5. Hu ḓo vuswa vhathu vhanzhi!
Vhalani Phisalema 37:29, ni kone u fhindula mbudziso i tevhelaho:
-
Vhathu vhanzhi-vhanzhi vhane vha ḓo vuswa vha ḓo tshila gai?
Yesu u ḓo vusa vhathu vhanzhi-vhanzhi u katela na vhe vha si shumele Yehova. Vhalani Mishumo 24:15, ni kone u fhindula mbudziso i tevhelaho:
-
Ndi nnyi ane na takalela u mu vhona a tshi vuswa vhafuni?
Humbulani nga ha hezwi: Zwo leluwa kha Yesu uri a vuse muthu o lovhaho, u fana na khotsi a tshi vusa ṅwana wawe o eḓelaho
6. U vuswa ha vhafu zwi nga ni khuthadza na u ita uri ni vhe na fhulufhelo
Mafhungo a re Bivhilini a ambaho nga ha ṅwana wa Yairo, o khuthadza na u ṱuṱuwedza vhathu vhanzhi vhe vha lovhelwa nga mashaka avho na khonani dzavho. Vhalani eneo mafhungo o iteaho zwa vhukuma kha Luka 8:40-42, 49-56.
Musi Yesu a sa athu vusa ṅwana wa Yairo, o vhudza Yairo a ri: “U songo ofha, ivha na lutendo.” (Vhalani vese 50.) U ḓivha uri vhafu vha ḓo vuswa zwi nga ni thusa hani . . .
-
musi mashaka aṋu na khonani dzaṋu vha tshi lovha?
-
musi vhutshilo haṋu vhu khomboni?
Ṱalelani VIDIO, ni kone u fhindula mbudziso i tevhelaho.
-
U ḓivha uri vhafu vha ḓo vuswa, zwo khuthadza na u ṱuṱuwedza hani vhabebi vha Phelicity?
VHAṄWE VHATHU VHA AMBA URI: “A zwi tendisei uri vhathu vho lovhaho vha ḓo vuswa uri vha dovhe vha tshile kha ḽifhasi.”
-
Inwi ni ri mini?
-
Ndi ifhio vese ine na nga i shumisa u itela u sumbedza uri vhafu vha ḓo vuswa zwa vhukuma?
NO GUDA MINI?
Bivhili i fhulufhedzisa uri vhathu vhanzhi-vhanzhi vho lovhaho vha ḓo vuswa. Yehova u khou ṱoḓa vha tshi dovha vha tshila nahone o ṋea Yesu maanḓa a uri a kone u vha vusa.
Ni Kha Ḓi Zwi Humbula?
-
Ri zwi ḓivha hani uri Yehova na Yesu vha ṱoḓa nga mbilu yoṱhe u vusa vhathu vho lovhaho?
-
Naa vhathu vhanzhi-vhanzhi vho lovhaho vha ḓo vuswa uri vha tshile ṱaḓulu kana kha ḽifhasi? Ndi ngani ni tshi ralo?
-
Ndi mini zwine zwa ita uri ni vhe na vhungoho ha uri mashaka aṋu na khonani dzaṋu vho lovhaho vha ḓo dovha vha tshila?
WANANI ZWO ENGEDZEAHO
Gudani zwine na nga zwi ita u itela u konḓelela vhuṱungu ha u lovhelwa nga shaka kana khonani.
Naa zwine Bivhili ya zwi funza zwi nga thusa zwa vhukuma muthu ane a khou pfa vhuṱungu ha u lovhelwa nga shaka kana nga khonani?
Vhana vha nga kona hani u konḓelela vhuṱungu ha u lovhelwa nga shaka kana nga khonani?
Naa hu na muthu ane a ḓo vuswa uri a tshile ṱaḓulu? Ndi vhafhio vhane vha sa ḓo vuswa?
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
