La Bìblia la dise che la morte la ze come un nemigo parché la ne fà sofrir tanto. (1 Corinti 15:26) Nela lession 27, te ghè imparà che Geovà el ndarà finir fora con questo nemigo. Ma cossa che ndarà suceder con quei che i ze belche morti? Geovà el ga prometesto che el ndarà ressussitar bilioni de persone par viver par sempre. Ma sarà che questo ndarà pròpio suceder? Ndove che queste persone le ndarà viver? Nel cielo o nela Tera? In questa lession, te ndarè imparar de pi sora questa bela promessa.

1. Cossa che Geovà l’è premoso de far par quei dela nostra fameia e amighi che i ze belche morti?

Geovà l’è premoso de ressussitar quei che i ze morti. Un servo fedele de nome Giò l’era sicuro che Geovà no’l ndaria desmentegarse de lu dopo che el morisse. Lu el ga dito che Geovà el ndaria ciamarlo e lu el ndaria risponder. — Ledi Giò 14:13-15.

2. Come che savemo che ghen sarà una ressuression?

Quando Gesù l’era qua nela Tera, lu el ga ressussità arquante persone col poder de Geovà. Par esémpio, lu el ga ressussità una toseta de 12 ani e el fiol de una védova. (Marco 5:41, 42; Luca 7:12-15) Lu el ga anca ressussità el so amigo, Làsaro, dopo che fea quatro giorni che l’era morto. Gesù el ga pregà a Dio e el ga dito: ‘Làsaro, vien fora! E el omo che l’era morto l’è vegnesto fora.’ (Gioani 11:43, 44) L’è sicuro che la fameia e i amighi de Làsaro i ze restadi tanto contenti!

3. Che speransa ghen’è par quei che te ami che i ze morti?

La Bìblia la dise che ghen sarà una ressuression. (Ati 24:15) Gesù el ga dito che tuti quei che Geovà el vol ressussitar i tornarà a viver. (Gioani 5:28, 29) Questo vol dir che Geovà el ndarà ressussitar quei che i ze morti, anca se nissun se ricorda pi de lori. Ma ndove i ndarà viver? Nel cielo, o nela Tera? Gesù el va ressussitar bilioni de persone par viver par sempre nte un paradiso qua nela Tera. Come savemo de questo? Parché quei che Gesù el ga ressussità nel passà no i ze ndati nel cielo, ma i ze restadi contenti de viver nantra volta qua nela Tera. — Gioani 3:13.

 IMPARA DE PI!

4. Gesù el ga mostrà che el pol ressussitar i morti

Impara de pi sora la ressuression de Làsaro. Ledé Gioani 11:14, 38-44, e dopo, parlé sora questo:

• Come che semo sicuri che Làsaro l’era pròpio morto? (Vardé el versìcolo 39.)

• Gesù el ga ressussità Làsaro par viver nantra volta qua nela Tera. Sarà che Gesù lo gavaria ressussità qua nela Tera se lu el fusse belche nel cielo?

Vardé el VÌDEO.

5. Tante persone le sarà ressussitade!

Ledé Salmo 37:29, e dopo, parlé sora questo:

• Ndove che i ndarà viver i bilioni de persone che le ndarà ressussitar?

Gesù el ndarà ressussitar i servi fedeli de Geovà e tante altre persone. Ledé Ati 24:15, e dopo, parlé sora questo:

• Chi che te piaseria veder nantra volta?

• Come che la speransa dela ressuression la ga giutà el pupà e la mama dela toseta?

 COSSA CHE TE GHÈ IMPARÀ?

La Bìblia la promete che bilioni de persone che le ze morte le ndarà ressussitar. Geovà l’è premoso par ressussitar le persone, e lu el ga dato a Gesù el poder de far questo.

Sito bon de ricordarte?

• Cossa che Geovà e Gesù i vol far par quei che i ze belche morti?

• Quei che i sarà ressussitadi i ndarà viver nel cielo o nela Tera? Parché che te pensi cossita?

• Sito sicuro che quei che te ami i tornarà a viver? Parché?