KAPITE 30
ʼE Ke Toe Sio Anai Kia Natou ʼAe ʼe Ke ʼOfa Ai
Ka mate he tahi, pea ʼe ko he toe kafo mamahi ia. ʼE ui ʼi te Tohi-Tapu ko te mate ʼe ko he fili. (1 Kolonito 15:26) ʼI te kapite 27, neʼe ke ako ai ʼe pulihi anai e Sehova te mate. Kae kotea ka ina fai kia natou ʼae kua mamate? ʼI te kapite ʼaeni, ʼe lahi anai te ʼu faʼahi ka ke ako ʼo ʼuhiga mo he tahi fakapapau taulekaleka ʼa Sehova. ʼE ina fakatuʼuake anai he toko lauʼi miliale hahaʼi. Pea ʼe natou maʼuʼuli anai ʼo heʼe gata. Kae ʼe hoko moʼoni anai koa? Pea kapau ʼe fakatuʼuake te kau mate, ʼe natou maʼuʼuli anai koa ʼi selo peʼe ʼi te kele?
1. Kotea ʼae ʼe loto e Sehova ke ina fai?
ʼE loto e Sehova ke ina fakatuʼuake te kau mate. ʼEi, ʼe kau ai ia natou kua mamate neʼe ke ʼofa mamahi ai. Ko Sopo neʼe ko he tagata neʼe malohi ʼaupito tana tui. Neʼe tui papau ʼe mole galoʼi anai ia ia e te ʼAtua moka mate. Neʼe ina ui ki te ʼAtua ‘ʼe ke pauʼi mai anai pea ʼe au tali atu anai mai te Faitoka.’—Lau ia Sopo 14:13-15.
2. He koʼe ʼe ke tui ʼe feala ke fakatuʼuake te kau mate?
ʼI te nofo ʼa Sesu ʼi te kele, neʼe foaki age e te ʼAtua te malohi moʼo fakatuʼuake te hahaʼi. Neʼe fakatuʼuake e Sesu he kiʼi taʼahine ʼe taʼu 12 pea mo te kiʼi tama ʼa he fafine devituʼa. (Maleko 5:41, 42; Luka 7:12-15) Ki muli age, neʼe mate tona kaumeʼa ko Lasalo. Neʼe ina fakatuʼuake logo la neʼe kua mate pea mo ʼaho fa tona kua tuku ʼi te fale maka. Neʼe faikole Sesu ki te ʼAtua pea hili ia, neʼe ina ui fenei: “Lasalo, haʼu ki tuʼa!” Pea “neʼe hu mai ki tuʼa te tagata ʼae neʼe kua mate.” Kua toe maʼuli ia. (Soane 11:43, 44) Fakafuafua age muʼa koe te fiafia neʼe logoʼi e tona famili mo ʼona kaumeʼa.
3. ʼE ke toe sio anai koa kia natou ʼae neʼe ke ʼofa mamahi ai?
ʼE fakapapau mai ʼi te Tohi-Tapu: “ʼE ʼi ai anai he fakatuʼuake.” (Gaue 24:15) Neʼe fiafia ia natou ʼae neʼe fakatuʼuake e Sesu ʼi te kele ʼi tanatou toe maʼuʼuli ake. Neʼe mole natou hake ki selo hili tanatou mamate. (Soane 3:13) Koia kua vave fakatuʼuake e Sesu te toko lauʼi miliale hahaʼi ʼi te kele ke natou maʼuʼuli ʼo heʼe gata ʼi te palatiso. Neʼe ina ui ʼe fakatuʼuake anai “ia natou fuli ʼi te ʼu fale maka fakamanatu.” Pea ʼe toe fakatuʼuake foki mo natou ʼae mole kei tou manatuʼi he ʼe mole galoʼi anai natou e te ʼAtua.—Soane 5:28, 29.
TA FAKALOLOTO
Ta vakaʼi ni fakamoʼoni ʼi te Tohi-Tapu ʼe fakatuʼuake anai te kau mate. Pea ʼe ta toe vakaʼi te ʼamanaki mo te fakalotofimalie ʼe ta maʼu ʼuhi ko te fakatuʼuake.
4. Neʼe fakaha e Sesu tana lava fakatuʼuake te kau mate
Tou vakaʼi he tahi ʼu manatu ʼo ʼuhiga mo te aluʼaga neʼe fai e Sesu maʼa tona kaumeʼa ko Lasalo. Lau ia Soane 11:14, 38-44, pea fai te ʼu fehuʼi ʼaeni:
-
ʼE tou iloi feafeaʼi neʼe mate moʼoni ia Lasalo?—Vakaʼi te vaega 39.
-
Kapau la neʼe hake moʼoni ia Lasalo ki selo, ʼi tau manatu la ʼe ui age anai koa e Sesu ki ai ke hifo mai ki te kele?
5. ʼE fakatuʼuake anai te tokolahi
Lau ia Pesalemo 37:29, pea fai te fehuʼi ʼaeni:
-
ʼE maʼuʼuli anai ʼifea ia natou ʼae ka fakatuʼuake?
ʼE mole fakatuʼuake pe anai e Sesu ia natou ʼae ʼe tauhi kia Sehova. Lau ia Gaue 24:15, pea fai te fehuʼi ʼaeni:
-
Ko ai ʼae ʼe ke loto ke ke toe sio ki ai?
ʼE ko he meʼa noa ia kia Sesu tana fakatuʼuake he tahi, ohage pe ko he tamai ʼe ina lava fafagu te moe ʼo hana fanau
6. ʼE ke maʼu he ʼamanaki mo he fakalotofimalie
ʼE kaugā malie natou ʼe mamahi ʼuhi ko he tahi neʼe mate neʼe natou ʼofa mamahi ai. Kae neʼe natou maʼu he fakalotofimalie mo he fakalotomalohi ʼi te hisitolia ʼo te ʼofafine ʼo Sailusi. Ko te hisitolia moʼoni, lau ia Luka 8:40-42, 49-56.
Neʼe ui fenei e Sesu ki te tamai, ʼi muʼa ʼo tana fakatuʼuake tona ʼofafine: “ʼAua naʼa ke tuʼania kaʼe ke ke tui.” (Vakaʼi te vaega 50.) ʼI tau iloʼi ʼae ʼe ʼi ai te fakatuʼuake, ʼe tokoni feafeaʼi atu anai . . .
-
moka mate he tahi ʼe ke ʼofa mamahi ai?
-
moka ʼe tuʼutamakiʼia tou maʼuli?
Vakaʼi te ʼATA VITEO, pea fai te fehuʼi ʼae ʼe hoa mai.
-
Kotea ʼae neʼe ina fakalotofimalieʼi te ʼu matuʼa ʼa Phelicity?
ʼE UI E ʼIHI: “Ko te fakatuʼuake ʼe ko he moemisi ia.”
-
Kotea tau ia manatu?
-
Ko te vaega fea la ʼe feala tau fakaha ki he tahi ʼe ʼi ai te fakatuʼuake?
MANATU TAFITO
ʼE fakapapau mai ʼi te Tohi-Tapu ʼe fakatuʼuake anai he toko lauʼi miliale hahaʼi. ʼE loto e Sehova ke natou toe maʼuʼuli ake pea ʼe ina foaki te malohi kia Sesu ke ina fakatuʼuake natou.
Fehuʼi Fakamanatu
-
Kotea ʼe loto e Sehova mo Sesu ke nā fai ʼo ʼuhiga mo te kau mate?
-
ʼE maʼuʼuli anai ʼifea ia natou ka fakatuʼuake, ʼi selo peʼe ʼi te kele? He koʼe ʼe ke ui ki te faʼahi ʼaia?
-
He koʼe ʼe ke tui papau ʼe ke fakatuʼuake anai ia natou ʼe ke ʼofa mamahi ai?
TE TAHI ʼU MANATU
He ʼu tokoni ʼaoga moka mate he tahi ʼe ke ʼofa mamahi ai.
ʼE tokoni moʼoni anai koa te ʼu pelesepeto ʼo te Tohi-Tapu ki he tahi neʼe mate hona famili peʼe kaumeʼa?
Kotea ʼe tokoni ki he fanau ke lotomalohi moka mate he tahi ʼe ʼofa mamahi ai?
ʼE ʼi ai koa ʼihi ʼe fakatuʼuake ki selo? Kae ko ai ʼae ʼe mole fakatuʼuake anai?