LIJIGANYO 30
Achalongo Achimjetu Ŵaŵawile Chachiŵasoni ni Umi
Chiwa chikusatutendekasya kuti tuŵeje ŵachanasa mnope. Ni ligongo lyakwe Baibulo jikusati chiwa chili mmagongo jwetu. (1 Akolinto 15:26) Mu Lijiganyo 27, twalijiganyisye kuti Yehofa chachimgomeka mmagongo jweleju, mwamti ŵandu ngasawagasoni. Nambo uli pakwamba ya ŵandu ŵaŵele ali mkuwa mpaka apano, ana jemanjaji yichatendechela yamtuli? Mu lijiganyoli, chitulijiganye yejinji payasasile Yehofa pangani ja kwimuka ku ŵawe. Jwalakwe chachajimusya ŵandu ŵajinji ŵaŵawile kuti chasangalale ni umi mpaka kalakala. Nambo ana yili yisyene kuti yeleyi yichitendekwa? Ana ŵandu ŵaŵawileŵa chachajimusya kuti akatameje kwinani kapena pachilambo chapasi?
1. Ana Yehofa akusaka kwatendela chichi achalongo achimjetu ŵaŵawile?
Yehofa ali jwakusachilila kwajimusya ŵandu ku chiwa. Mundu jwakulupichika Yobu nganakayichila ata panandi kuti Mlungu chachimjimusya ku chiwa. Mwamti jwalakwe ŵamsalile Mlungu kuti: “Ŵalakwe pitachiŵilanga, une tinjajanga [kutyochela m’Malembe].”—Aŵalanje Yobu 14:13-15.
2. Ana tukwete umboni wamtuli wakuti ŵawe chachijimuka?
Yesu paŵaliji pachilambo chapasi, Mlungu ŵampele machili gakwajimusya ŵandu ŵawe. Yesu ŵakajimwisye ku chiwa kamsikana ka yaka 12. Jwalakwe ŵamjimwisyesoni ku chiwa mwanache jwa jwamkongwe jwamasije. (Maliko 5:41, 42; Luka 7:12-15) Pali papite ndaŵi mjakwe jwa Yesu juŵaliji Lasalo jwawile. Atamose kuti Lasalo jwaliji ali awile kwa masiku mcheche, nambope Yesu ŵamjimwisye jwalakwe ku chiwa. Yesu paŵagambile kupopela kwa Mlungu, jwagumisile kuti: “Lasalo, kopokani pasa!” Kaneko “jwalakwe ŵakopweche pasa” ali ni umi. (Yohane 11:43, 44) Agambe kuganisya muŵatite kusangalala achalongo achimjakwe ŵa Lasalo soni ŵandu ŵane.
3. Ana tukwete chembecheyo chamtuli pakwamba ya achalongo achimjetu ŵaŵawile?
Baibulo jikusatusimichisya kuti kusogoloku kuchiŵa ‘kwimuka ku ŵawe.’ (Masengo 24:15) Kalakalako, ŵandu ŵele Yesu ŵajimusyaga ku chiwa, ngaŵa kuti ŵaliji ali apite kwinani. (Yohane 3:13) Jwalakwe ŵajimusyaga ŵanduŵa ku chiwa ni ŵatamaga pachilambo chapasi. Mwakulandana ni yeleyi, pachangakaŵapa Yesu chiŵajimusye ŵandu ŵajinji ku chiwa kuti chatameje ni umi mpaka kalakala pachilambo chapasi. Jwalakwe jwasasile kuti ŵandu wosope ŵele Mlungu akwakumbuchila chachajimusya, atamose yiŵe yakuti ŵanduŵe ngatukwamanyilila.—Yohane 5:28, 29.
KULIJIGANYA YEJINJI
Alijiganye maumboni gakutyochela m’Baibulo gakusimichisya kuti ŵawe chachijimuka. Chalolesoni kuti chikulupi chakuti kuchiŵa kwimuka kwa ŵawe, chikusatukamuchisya kuti tuŵeje ŵakusangalala soni tukoleje sogolo jambone.
4. Yesu ŵalosisye kuti chachajimusya ŵawe
Alijiganye yejinji yiŵatesile Yesu kwa mjakwe juŵaliji Lasalo. Aŵalanje Yohane 11:14, 38-44, kaneko akambilane yiwusyo ayi:
-
Ana tukumanyilila chamtuli kuti Lasalo jwawile?—Alole vesi 39.
-
Naga Lasalo paŵawile ŵaliji ali apite kwinani, ana akuganisya kuti Yesu akamtyosisye Lasalo kwinaniko kuti aŵesoni ni umi pachilambo chapasi?
5. Ŵajinji chachijimuka ku chiwa
Aŵalanje Salimo 37:29, kaneko akambilane chiwusyo achi:
-
Ana ŵandu ŵajinji ŵachachijimuka ku chiwa chachitamaga kwapi?
Yesu ngasagamba kwajimusya ŵandu ŵaŵamtumichilaga Yehofape, nambo jwalakwe chachajimusyasoni ŵandu ŵane ŵajinji. Aŵalanje Masengo 24:15, kaneko akambilane chiwusyo achi:
-
Ana ŵawe pachachijimuka, wawojo akusaka chawonegane ni ŵani?
Aganichisye ayi: Yesu mpaka amjimusye jwam’we mwangasawusya mpela mwakusatendela mtati pakumjimusya mwanache jwagonile
6. Kwimuka ku ŵawe kukusatukamuchisya kuŵa ŵakusangalala soni kola sogolo jambone
Ngani ja m’Baibulo jakwamba mwanache jwamkongwe jwa Yayilo, jalimbikasisye ŵandu ŵajinji ŵawililwe. Aŵalanje nganiji pa Luka 8:40-42, 49-56.
Yesu mkanamjimusye mwanache jwa jwamkongwe jwa Yayilo, jwalakwe ŵasalile babagwe ŵa mwanachejo kuti, “Mkajogopa, mgambe kulupilila.” (Alole vesi 50.) Ana chikulupi chakuti ŵawe chachijimuka mpaka chakamuchisye chamtuli . . .
-
naga mlongo mjawo awile?
-
naga akusimana ni yakogoya paumi wawo?
Alolele FIDIYO, kaneko akambilane chiwusyo achi.
-
Ana chikulupi chakuti ŵawe chachijimuka, chalimbikasisye chamtuli achinangolo ŵa Felisite?
YAKUSAŴECHETA ŴANDU ŴANE: “Yili yakusawusya kulupilila kuti ŵawe chachijimuka.”
-
Ana wawojo akuganisya uli?
-
Ana ni lilemba lyapi lyampaka akamulichisye masengo pakulosya kuti ŵawe chachijimuka?
YALIJIGANYISYE
Baibulo jikusatusimichisya kuti ŵandu ŵajinji ŵaŵawile chachijimuka. Yehofa akusachilila kwajimusya jemanjajo soni ampele Yesu machili gakutenda yeleyi.
Yiwusyo Yakuwilisya
-
Ana tukumanyilila chamtuli kuti Yehofa soni Yesu chachajimusya ŵandu ŵaŵawile?
-
Ana ŵandu ŵajinji ŵachachajimusya ku ŵawe, chachitamaga kwinani kapena pachilambo chapasi? Ligongo chichi ajanjile myoyo?
-
Ana ni chichi chachikwasimichisya kuti achalongo achimjetu ŵaŵawile chachiŵasoni ni umi?
YAKULINGA YINESONI
Alijiganye yampaka atende kuti aŵeje ŵakupilila pali ŵachanasa.
Ana mfundo sya m’Baibulo mpaka simkamuchisye mundu jwawililwe?
Ana ŵanache mpaka apilile chamtuli chiwa cha jwachinasi jwawo kapena mjawo?
Ana pana ŵatachijimuka kwawula kwinani? Ana ŵani ŵangasajimuka ku ŵawe?
“Ana Kwimuka ku Ŵawe Kukugopolela Chichi?” (Ngani ja pa intaneti)
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
