Kéen kíimik wa máax jach k-yaabiltmeʼ jach ku yaatal k-óol, le oʼolal le Bibliaoʼ ku yaʼalikeʼ le kíimiloʼ k-enemigo (1 Corintios 15:26). Teʼ xook 27, ta kaneʼ Jéeobaeʼ yaan u xuʼulsik le kíimiloʼ. Chéen baʼaleʼ, ¿baʼax túun kun úuchul yéetel le máaxoʼob tsʼoʼok u kíimloʼoboʼ? Teʼ xookaʼ yaan a kanik uláakʼ tiʼ u jatsʼuts promesaʼob Jéeoba: letiʼeʼ yaan u kaʼa líiʼsik u millonesil máakoʼob utiaʼal u kuxtaloʼob mantatsʼ. ¿Jach wa tu jaajil yaan u yúuchul leloʼ? ¿Tuʼux kun kuxtaloʼob: way Luʼumeʼ wa teʼ kaʼanoʼ?

1. ¿Baʼax ken u beet Jéeoba yoʼolal le máaxoʼob tsʼoʼok u kíimloʼoboʼ?

Jéeobaeʼ jach u kʼáat u kaʼa kuxkíint le kimenoʼoboʼ. Úuchjeakileʼ juntúul máak ku kʼaabaʼtik Jobeʼ tu yaʼaleʼ kex ka yanak teʼ muknaloʼ yaan u kaʼa kuxkíintaʼal tumen Jéeoba. Letiʼeʼ tu yaʼalaj tiʼ Dios: «Le kéen a tʼaneneʼ yaan in núukiktech» (xok Job 14:13-15).

2. ¿Bix k-ojéeltik yaan u kaʼa kuxkíintaʼal le kimenoʼoboʼ?

Le ka anchaj Jesús way Luʼumeʼ Jéeobaeʼ tu tsʼáaj poder tiʼ utiaʼal u kaʼa kuxkíintik máak. Le oʼolal juntéenjeakeʼ tu kuxkíintaj juntúul chan x-chʼúupal de 12 años bey xan u hijo juntúul viuda (Marcos 5:41, 42; Lucas 7:12-15). Ka máan kʼiineʼ kíim Lázaro, juntúul u amigo Jesús. Kex tsʼoʼok u máan cuatro días kíimkeʼ Jesúseʼ tu kaʼa kuxkíintaj. Le ka tsʼoʼok u beetik junpʼéel oración tiʼ Dioseʼ tu kʼaʼam aʼalaj: «¡Lázaro, jóokʼen!». «Le máak kimen kaʼachoʼ» kaʼa kuxlajeʼ ka jóokʼi (Juan 11:43, 44). ¡Bukaʼaj wal kiʼimakchajik u yóol u familia yéetel u amigoʼob Lázaroeʼ!

3. ¿Yaan wa u kaʼa kuxtal le kimenoʼoboʼ?

Le Bibliaoʼ ku yaʼalikeʼ yaan «u kaʼa kuxkíintaʼal le kimenoʼoboʼ» (Hechos 24:15). Le máaxoʼob kaʼa kuxkíintaʼaboʼob tumen Jesúsoʼ maʼ binoʼob teʼ kaʼanoʼ (Juan 3:13). Letiʼobeʼ kiʼimakchaj u yóoloʼob úuchik u kaʼa kuxkíintaʼaloʼob way Luʼumeʼ. Maʼ kun xáantaleʼ Jesúseʼ yaan u kaʼa líiʼsik u millonesil máakoʼob utiaʼal u kuxtaloʼob teʼ Paraísooʼ. Letiʼeʼ tu yaʼaleʼ «tuláakal le máaxoʼob yanoʼob ichil le muknaloʼob» wa tu tuukul Diosoʼ yaan u kaʼa kuxkíintaʼaloʼob. Tak le máaxoʼob maʼ kʼajaʼan tiʼ mix máakoʼ Dioseʼ yaan u kaʼa kuxkíintikoʼob tumen letiʼeʼ maʼ u tuʼubsmoʼobiʼ (Juan 5:28, 29).

 UTIAʼAL A MAAS NAʼATIK

4. Jesúseʼ tu yeʼesaj jeʼel u páajtal u kaʼa kuxkíintik le kimenoʼoboʼ

Ilawil baʼax tu beetaj Jesús yoʼolal Lázaro. Xokeʼex Juan 11:14, 38-44, kéen tsʼoʼokkeʼ ka tsikbaltikeʼex lelaʼ:

• ¿Bix k-ojéeltik jach tu jaajil kíim Lázaro? (Ilawileʼex versículo 39).

• Wa ka xiʼik kaʼach Lázaro teʼ kaʼan le ka kíimoʼ, ¿maʼalob wa túun úuchik u suʼutul tumen Jesús way Luʼumeʼ?

Chaʼanteʼex le VIDEOOʼ.

5. ¡Yaʼab máakoʼob kun kaʼa kuxtaloʼob!

Xokeʼex Salmo 37:29, kéen tsʼoʼokkeʼ ka tsikbaltikeʼex lelaʼ:

• ¿Tuʼux kun kajtal le u millonesil máakoʼob kun kaʼa kuxkíintbiloʼoboʼ?

Jesúseʼ maʼ chéen le máaxoʼob adorartik Jéeoba ken u kaʼa kuxkíintoʼ, baʼaxeʼ tak uláakʼ máakoʼob. Xokeʼex Hechos 24:15, kéen tsʼoʼokkeʼ ka tsikbaltikeʼex lelaʼ:

• ¿Máax taak a wilik le kéen kaʼa kuxkíintaʼak le kimenoʼoboʼ?

• ¿Bix tsʼoʼok u yáantaʼal u papáʼob Phelicity ikil u yojéeltikoʼob yaan u kaʼa kuxkíintaʼal le kimenoʼoboʼ?

 BAʼAX TSOʼOLI

Le Bibliaoʼ ku yaʼalikeʼ u millonesil máakoʼob tsʼoʼok u kíimloʼobeʼ yaan u kaʼa kuxtaloʼob. Jéeobaeʼ u kʼáat ka kuxlakoʼob tu kaʼatéen, le oʼolal tsʼoʼok u tsʼáaik poder tiʼ Jesús utiaʼal u beetik.

Baʼax ta kanaj

• ¿Bix k-ojéeltik Jéeoba yéetel Jesúseʼ jach u kʼáat u kaʼa kuxkíintoʼob le kimenoʼoboʼ?

• ¿Tuʼux kun kajtal le u millonesil máakoʼob kun kaʼa kuxkíintbiloʼoboʼ: way Luʼumeʼ wa teʼ kaʼanoʼ? ¿Baʼaxten bey a waʼalikoʼ?

• ¿Baʼax eʼesiktech jach tu jaajil yaan u kaʼa kuxkíintaʼal le máaxoʼob a yaabiltmoʼ?