LESIONY 30
¡Buñ ni ronladxlo sabanyibu stoib!
Galgoity nigolú ragoʼ nabanni buñ né ratudyni buñ ló galrrioʼob. Por ngú, la Biblia ná que galgoity nacni toib enemig (1 Corintios 15:26). Ló lesiony 27, bisuidylo que Jehová sanitló enemig reʼ. Per ¿xí gac né buñ ni ma goity? Ló lesiony reʼ sasuidylo ni ma goniʼ Jehová gony: láabu salísbu xidalguixo buñ ni ma goity par guibanyibu tipzó ló Gudxlio. ¡Sabanyibu stoib! ¿Nigolúpa sácni la? ¿Né siásyibu par guibanyibu lainy guibá la o ló Gudxlio?
1. ¿Xí raniiny Jehová gony por buñ ni ronladxno ni ma goity?
Jehová raniiny guilís buñ ni ma goity. Job, toib buñguieeu ni gop xiroʼ fe lóo Jehová, gondxichbu que Jehová dipa ñaladx láabu órni ñoʼbu «lainy Baʼ». Gochbu Dios: «Looy sacaʼlo rudx né naʼ sacabi looy» (bíil Job 14:13-15).
2. ¿Ximod nanno que buñ ni ma goity labúu guiásyibu lad gueʼet?
Órni goyoʼ Jesús ló Gudxlio, Dios bidudy galnadip láabu par labúu nalísbu buñ ni ma goity. Por ngú labúu golísbu toib nidxigonaʼyen de 12 íz lad gueʼet, né láaca labúu golísbu xiingaʼn toib gonaʼ viod (Marcos 5:41, 42; Lucas 7:12-15). Después ximigbu Lázaro goity, né ná ma tap govitz de goló goitybu, Jesús golís láabu lad gueʼet. Biloxsi bunybu oración, bicaʼbu rudx: «¡Lázaro, bireʼ!». Né «buñguieeu ni goity bireʼ» (Juan 11:43, 44). Buny pensary balaati bibaladx xfamil né ximig Lázaro órni bibanybu stoib.
3. ¿Buñ ni ronladxlo ni ma goity sabanyibu stoib la?
La Biblia ná que «siás gueʼet» (Hechos 24:15). Buñ ni golís Jesús lad gueʼet diti goyeeyibu guibá (Juan 3:13). Buñ ni biás lad gueʼet nigolú bibaladxyibu ni bibanyibu stoib ló Gudxlio. Mod buny Jesús ló dzú ni see, láaca salísbu xidalguixo buñ lad gueʼet, par guioladxyibu guibanyibu tipzó ló Gudxlio órni ma nacni toib lagary móz. Goniʼbu que «guirá ni noʼ lainy baʼ», ni rasetnaladx Dios siás lad gueʼet, dada buñ ni diti noʼ chú rasetnaladx (Juan 5:28, 29, nota).
NANOY GUISUIDYNO LÁANI
Guisuidyno xi prueby radudy la Biblia que buñ ni ronladxno siás né que nigolú sácni. Né guienno ximod ni guiáscu gueʼet labúu guisialdóni xcalnabanyno né guidudyni esperanza lóono.
4. Jesús bislooy que labúu guilísbu buñ ni ma goity
Bisuidy xi más buny Jesús por ximigbu Lázaro. Colgoʼol Juan 11:14 né 38-44, né colgooy xtiitzni:
-
¿Ximod nanno que Lázaro nigolú goity? (Colguibiʼ versículo 39).
-
Pal Lázaro ñee guibá, xpensarylo ¿buny Jesús toib favor a Lázaro par bitné láabu ló Gudxlio stoib la?
5. ¡Xidalguixo buñ sabanyibu stoib!
Colgoʼol Salmo 37:29 né colgooy xtiitzni:
-
¿Pu lagary guibany xidalguixo buñ ni guiás lad gueʼet?
Jesús diti nosi salísbu buñ ni buny adorar a Jehová; láaca salísbu xidalguixo buñ. Colgoʼol Hechos 24:15 né colgooy xtiitzni:
-
Órni guiás buñ ni ma goity, ¿chú láabu raniiny looy guibiʼlo?
Buny pensary ló ndeʼ: par Jesús diti nagan guilísbu buñ ni ma goity lad gueʼet, nacni suusi órni toib buñ rabeʼ bacaʼal ló xiin.
6. Ni guiáscu gueʼet labúu guisialdóni xcalnabanylo né guidudyni esperanza looy
Historia xtuny xiindzap Jairo ni sieed ló la Biblia ma bisialdóni né ma gocnéni xidalguixo buñ ni noʼ nabann. Colgoʼol historia reʼ ló Lucas 8:40-42 né 49-56.
Antes de nalís Jesús xiindzap Jairo, Jesús góoch láabu: «Diti guidzuibylo, gop fe» (colguibiʼ versículo 50). ¿Ximod labúu gacné esperanza reʼ looy...
-
... órni gaity buñ ni ronladxlo?
-
... órni noʼlo ló riesga gaitylo?
Colguibiʼ VIDEO reʼ né colgooy xtiitzni:
-
¿Ximod ni guiás buñ lad gueʼet ma buny animarni né ma bisialdóni xcalnabany bixios né xinaʼ Phelicity?
TIPNÉS BUÑ NÁ: «Rasac nagana goni crer que buñ ni ma goity guibany stoib ló Gudxlio».
-
¿Xí ronylo pensary?
-
¿Xí texto naquiinlo par naslooylo que buñ ni ma goity sabany stoib ló Gudxlio?
¿XÍ BISUIDYLO?
La Biblia ná que xidalguixo buñ ni ma goity sabany stoib ló Gudxlio. Jehová raniiny que buñ guibany stoib né ma bidudybu galnadip Jesús par guilís buñ ni ma goity.
Repas
-
¿Ximod nanno que Jehová né Jesús raniiny layibu guilísyibu gueʼet?
-
¿Pu lagary guibany buñ ni guiás lad gueʼet: lainy guibá la o ló Gudxlio? ¿Xigony racapylo modreʼ?
-
¿Xigony naplo confianz que buñ ni ronladxlo sabany stoib?
PAR GANLO MÁS
Bíil xi labúu gacné looy par labúu guicalólo galnabann.
«Galrracné par buñ ni noʼ nabann xtol galgoity» (¡Despertad!, núm. 3 íz 2018)
¿Labúu gacné la Biblia buñ ni noʼ nabann xtol galgoity la?
Bibiʼ ximod labúu gacnélo toib mbioxien ni ma goity xfamil o ximig.
¿Sioʼ buñ ni guiás lad gueʼet par guibany lainy guibá la? ¿Sioʼ ni diti siás lad gueʼet la?
«¿Xí radudy diitz guiás buñ lad gueʼet?» (Artículo ni sieed jw.org)
Sigory láaca sioladxlo ndeʼ
NI MÁS RANABDIITZ BUÑ
¿Ximod rasuidy testigos xtuny Jehová buñ?
Órni guisuidylo né testigos xtuny Jehová labúu guiquiinlo nitisi traducción xtuny la Biblia. Labúu guiruʼlo guirá xfamilo né ximiglo par gony compañer looy.
