SUƐI LEBOLII 31

Yɛɛ Cho yɛ Masale Mɛlɛkaleŋ?

PILEI

A Masale Mɛlɛkaleŋ okɔɔ Baabuiyo soo tau ni. Chɛhowa cho Masaleŋ ndeŋ soliŋ kpeku le mi tuu ndoo nɔ a chieeŋndo hoo okɔɔ wo peeluŋ. Yɛɛ cho yɛ Masale Mɛlɛkaleŋ? Vɛɛ naŋ looku yɛ sina maa le kanduŋ niŋ? Yɛɛ le tosa yɛ niŋ? Nduyɛ, yɛɛ le cho yɛ hunɔɔ tosa o siɔdii lachioo niŋ? Suɛi lebolle hei a ŋ muuŋ cho lachi woŋ cho nyunalaŋ ndaŋ muli.

1. Yɛɛ cho yɛ Masale Mɛlɛkaleŋ, nduyɛ nɛɛ cho yɛ Masaa le Masaleŋ ndeŋ?

Masale Mɛlɛkaleŋ le cho masale Chɛhowa pila kila leŋ ni. O choo choo niŋ Masaleŋ ndeŋ le cho ni, nduyɛ Chiisu Kiliti cho Masaa ni. (Maatiu 4:17; Chɔŋ 18:36) Mi Baabuiyo dimi a Chiisu okɔɔ aa: “O cho hunɔɔ wa masaa . . . le fɛɛŋ a fɛɛŋ.” (Luku 1:32, 33) Masale Mɛlɛkaleŋ le cho hunɔɔ tiu o chieeŋndo choo kpou, nduyɛ mi wana o wana wa Chiisu o ba bɛŋgu.

2. Nɛɛ yaa cho yɛ masaleŋ tosa a Chiisu latulu?

O cho Chiisu ndupilɛ le cho masaleŋ tosa le. Waŋnda fulaa o “lekaa o lekaa niŋ, a isɔɔ o isɔɔ maŋgalaa, a lelɛŋ o lelɛŋ, . . . cho wa masaa chieeŋndo choo kpou.” (Sɔɔŋ Chɔɔmaŋndoŋ 5:9, 10) Vɛɛ kpɛ waŋnda cho yɛ wa o masaleŋ choo a Chiisu? Chɔŋ a teleŋ Chiisu hiŋ o chieeŋndo choo wo, waŋnda o miiliɔŋndaŋ niŋ simnuŋ niŋ Kilisiɔŋnda ni, ma wa ndu tolɔɔ kɔɔli. Kɛ o nda tɛɛŋ, waŋnda 144,000 koni cho lakɔ choo choo ni le waa o masaleŋ choo a Chiisu. (Nuawɔ Sɔɔŋ Chɔɔmaŋndoŋ 14:1-4.) Kilisiɔŋaa tuaa kpou cho wa o lɛŋndeŋ choo o Masale Mɛlɛkaleŋ bɛŋgu.—Sam 37:29.

3. Le yɛɛ Masale Mɛlɛkaleŋ le bɛnda yɛ mi le hiau masale waŋnda chieeya?

Mi masaa waŋnda chieeya yeema le sɔɔŋ kɛndɔŋ tosaa. Kɛ, a nɔ kpaaya le muŋ tosaa kpou le. Nduyɛ te teleŋ tiŋ hiou pɛ, ma faŋa nda pɛŋ o lemasa okoŋ, ma miŋgi acheleŋ. Lepum, a nda miŋgi kaŋ nda nɔ iyeema le waŋnda malaa le. Kɛ wana o wana siŋga niŋ Chiisu o Masale Mɛlɛkaleŋ choo le. Mɛlɛka chii niŋ hɛli “masale tembu le fɛɛŋ a fɛɛŋ te leŋ.” (Daaniɛɛ 2:44) Chiisu cho wa masaa le chieeŋndo hoo kpou ni. Nduyɛ, o hɛli niŋ ŋwaŋnda chiee le. Chiisu nɔ kaalaa, kɛndɛi, a sandei. O cho waŋnda pɛɛku le ma nɔ kaalaa le chaaŋaa ndaa, nduyɛ ma nɔ kɛndɛi a sandei maa ndupila.—Nuawɔ Aisaya 11:9.

CHƆƆLU YAASIAA

Pɛɛku wɔ ma sina le sabu Masale Mɛlɛkaleŋ le bɛnda, mi le hiau masale kɛ kɛ wo.

4. Masale kpaaya leŋ lepilɛ kpe le cho hunɔɔ wa le chieeŋndo kpou ni

Chiisu Kiliti nɔ kpaayaa le waa masa mbo hiau masa kɛ kɛ. Nuawɔ Maatiu 28:18, okoŋ mi la suukaŋ o nyunaa hoo choo:

Le yɛɛ kpaaya Chiisu wo hiou yɛ kpaayala masaa waŋnda chieeya?

Ma siŋga masaa waŋnda chieeya teleŋnda bɔɔbɔɔ. Nduyɛ masa kɛ kɛ, o lɛŋnde ndɔleŋ choo koni o nɔ kpaayaa ni. Kɛ Masale Mɛlɛkaleŋ yɛ? Nuawɔ Daaniɛɛ 7:14, okoŋ mi la suukaŋ o nyunalaŋ ndaŋ choo:

Le yɛɛ i cho yɛ suɛi kɛndɛ le sinaa maa, Masale Mɛlɛkaleŋ le cho “wa le fɛɛŋ a fɛɛŋ”?
Le yɛɛ i cho yɛ suɛi kɛndɛ le sinaa maa le cho wa le chieeŋndo kpou?

5. Masale waŋnda chieeya le nɔ mi le faŋaŋ

Le yɛɛ masɛi waŋnda chieeya nɔ yɛ mii faŋaŋ, mi Masale Mɛlɛkaleŋ le miiŋgu o foofo ndaa? Handu VIDUEIYO, okoŋ mi la suukaŋ o nyunaa hoo choo:

VIDUEIYO: Yɛɛ Cho yɛ Masale Mɛlɛkaleŋ?—Buŋgɛi Pɔmbɔ (1:41)

Yɛɛnɛ cho yɛ yɔŋnɔŋndo o masale waŋnda chieeya bɛŋgu?

Nuawɔ Ikilisiaatii 8:9, okoŋ mi la suukaŋ o nyunalaŋ ndaŋ choo:

A yiyaŋ pa maa Masale Mɛlɛkaleŋ le nɔ mi le miiŋgu o foofo masɛi waŋnda chieeya? Le yɛɛ ŋ dimi yɛ lende?

6. Wanaa cho wa o Masale Mɛlɛkaleŋ choo wa sina bahawɛila naalaŋ

Chiisu wa niŋ o lɛŋndeŋ choo mbo cha saŋga naŋ cho niŋndo. Le hei, te o huŋ wa naa pɛ choo masa, o cho ‘naa tuiinɔŋ inyiɛɛ, kanifuule o sina maa ŋ nɔ kpaaya le.’ (Hibuluiya 4:15) Puaa a waŋ laanduaa laalaŋaa cho masaleŋ tosa a ndu wa cho wa waŋnda 144,000. Nduyɛ Chɛhowa cho nda hɛlioo fulaa o “lekaa o lekaa niŋ, a isɔɔ o isɔɔ maŋgalaa, a lelɛŋ o lelɛŋ.”—Sɔɔŋ Chɔɔmaŋndoŋ 5:9.

Baa i cho pa suɛi kɔl dɛɛniaa le sinaa maa, Chiisu a wanaa nda cho wa o masaleŋ choo wa bɛɛ kei niŋ o saŋga naŋ cho niŋndo niŋ? Le yɛɛ ŋ dimi yɛ lende?

Chɛhowa hɛli waŋ piaanduaa a waŋ laanduaa fulaa o kɔɔlima yɛ yiaŋ niŋ, le ma wa o masaleŋ choo a Chiisu latulu

7. Masale Mɛlɛkaleŋ le hiou nɔ sawala kɛndɛlaŋ

Mi masɛi waŋnda chieeya kɛsi sawalaŋ le wanaa cho o lɛŋndeŋ niŋnda mandaa. Masale Mɛlɛkaleŋ bɛɛ le nɔ sawalaŋ. Nduyɛ, wanaa cho wa o leŋ bɛŋgu wa nɔ ma bii laŋ. Nuawɔ 1 Kɔliŋtiaŋ 6:9-11, okoŋ mi la suukaŋ o nyunalaŋ ndaŋ choo:

Vɛɛ ŋ yiyaŋ yɛ maa chieeŋndo cho wa, te wana o wana bii pɛ sawala Mɛlɛkalaŋ? a
A yiyaŋ pa maa sawala Chɛhowa dɔu laŋ ndaŋ la bɛnda, le wanaa cho wa o Masale ndɔleŋ bɛŋgu wa? Le yɛɛ ŋ dimi yɛ lende?
Yɛɛ chɔm yɛ maa wanaa cho wɔ sawalaŋ ndaŋ biyɔɔ le wa nɔla ma siŋgaŋ?—Tofa sɔɔŋ 11.

Mi masaa waŋnda chieeya kɛsi sawalaŋ le wanaa cho o lɛŋndeŋ niŋnda mandaa. Masale Mɛlɛkaleŋ bɛɛ le nɔ sawalaŋ le wanaa cho wa o leŋ bɛŋgu wa mandaa. Nduyɛ laŋ la hiou naŋɔɔ

TE WAŊNDO DIMI PƐ AA: “Naa o kɔl Masale Mɛlɛkaleŋ le cho ni.”