KIFUNDWA 31
Lelo Bulopwe bwa Leza I Bika?
Musapu mukatampe udi mu Bible i utala Bulopwe bwa Leza. Yehova usa kwingidija buno Bulopwe mwanda wa kufikidija mpango yandi imbajinjibajinji itala ntanda. Le Bulopwe bwine i bika? Le tubayuka namani amba pano buludikanga? I bika byokebupwe kala kulonga? Ne kadi, i bika byobusa kulonga kumeso’ku? Kino kifundwa ne bibidi bikwabo bilonda’ko bikalondolola bino bipangujo.
1. Le Bulopwe bwa Leza i bika, ne Mulopwe wabo i ani?
Bulopwe i umbikalo utūdilwe’ko na Yehova Leza. Yesu Kidishitu, Mulopwe wa buno Bulopwe, uludikanga aye momwa mūlu. (Mateo 4:17; Yoano 18:36) Bible unena padi Yesu amba: “Ukabikala bu Mulopwe . . . nyeke.” (Luka 1:32, 33) Yesu byadi Mulopwe wa Bulopwe bwa Leza, ukaludika muntu ense pano pa ntanda.
2. Le i bāni baludika pamo na Yesu?
Yesu kaludikangapo bunka. Bantu “ba ku bisaka byonso ne ndimi ne bantu ne mizo . . . bakabikalanga bu balopwe pa ntanda.” (Kusokwelwa 5:9, 10) Lelo i bantu banga ba kuludika na Kidishitu? Tamba Yesu wiila pano pa ntanda, kudi bene Kidishitu midiyo ne midiyo bekele ke balondi bandi. Inoko mu bano, mudi’nka bantu 144 000 bo benda mūlu kuludika na Yesu. (Tangai Kusokwelwa 14:1-4.) Bano bene Kidishitu bonso bakwabo bakekala bu bana ba buno Bulopwe.—Ñimbo ya Mitōto 37:29.
3. Le Bulopwe bwa Leza i bupite imbikalo ya bantu namani?
Nansha shi bantu bendeja abatompa kulonga bintu biyampe, kebadipo na bukomo bwa kulonga byonso byobasaka. Mwenda mafuku, bapingakanibwanga na bakwabo padi bampikwa kulangila babikalwa babo. Inoko Muludiki wa Bulopwe bwa Leza, ke Yesu kadi, aye kakapingakanibwapo na muntu nansha umo. Leza i mwimike “bulopwe kebukonakanibwapo nansha dimo.” (Danyele 2:44) Yesu ukaludika ntanda yonso, kadi kakekalapo na mboloji. Udi na buswe, kanye, ne boloke, kadi ukafundija bantu nabo belongele bintu mu muswelo umo—na buswe, na kanye, ne na boloke.—Tangai Isaya 11:9.
LANGULUKA BININGE
Tala, umone mwanda waka Bulopwe bwa Leza i buyampe mpata kupita umbikalo o-onso wa bantu.
4. Umbikalo mukomokomo o usa kuludika ntanda yonso
Yesu Kidishitu udi na bukomo bukatampe bwa kuludika kupita bonso mu mānga ya bantu. Tangai Mateo 28:18, ne kwisambila pa kino kipangujo:
-
Le lupusa lwa Yesu i lupite namani lolwa ludi na bantu bonso baludika?
Imbikalo ya bantu ishintanga kyaba ne kyaba, kadi muludiki ne muludiki uludikanga’tu kipindi kya ntanda. Le bidi namani pa Bulopwe bwa Leza? Tangai Danyele 7:14, ne kwisambila pa bino bipangujo:
-
Bulopwe bwa Leza “kebukonakanibwapo.” Mwanda waka uno i mwanda muyampe?
-
Bulopwe bwa Leza bukaludika ntanda yonso. Mwanda waka ne uno nao i mwanda muyampe?
5. Buludiki bwa bantu bufwaninwe kupingakanibwa
Mwanda waka Bulopwe bwa Leza bufwaninwe kupingakana imbikalo ya bantu? Talai VIDEO, ne kwisambila pa kipangujo kilonda’kya.
-
Lelo i bika bilupukile ku muludikilo wa bantu?
Tangai Musapudi 8:9, ne kwisambila pa bino bipangujo:
-
Le ulanga i biyampe Bulopwe bwa Leza bupingakane imbikalo ya bantu? Mwanda waka?
6. Boba bendeja mu Bulopwe bwa Leza i bantu bayukile kwivwana bakwabo
Yesu, Mulopwe wetu, byawāikele bu muntu, uyukile “kwitūla pa kyetu kyaba mu bukōkekōke bwetu.” (Bahebelu 4:15) Bana-balume ne bana-bakaji 144 000 bakaludika na Yesu, Yehova webatongele “ku bisaka byonso ne ndimi ne bantu ne mizo.”—Kusokwelwa 5:9.
-
Mwanda waka ubasengwe pa kuyuka’mba Yesu ne boba bakabikala nabo bayukile mwikadile būmi bwa bu muntu?
Yehova i mutonge bana-balume ne bana-bakaji ba koku ne koku bakaludike na Yesu
7. Bijila bya Bulopwe bwa Leza i bipite kulampe bya bantu
Imbikalo itūlanga’ko bijila amba i bya kulama ne kukinga nabyo babikalwa. Bulopwe bwa Leza nabo budi na bijila bifwaninwe kulondwa na babikalwa. Tangai 1 Bene Kodinda 6:9-11, ne kwisambila pa bino bipangujo:
-
Molangila, le ntanda ikekala namani shi bantu bonso abalonda bijila bya mu būmi bitūdile’ko Leza? a
-
Le ulanga i byendele’mo Yehova kulomba babikalwa ba Bulopwe balēmeke bino bijila? Mwanda waka?
-
Le i bika bilombola’mba bantu ba kubulwa kukōkela bino bijila babwanya kushinta?—Tala vese 11.
Imbikalo itūlanga’ko bijila bya kulama ne kukinga babikalwa. Bulopwe bwa Leza budi na bijila bilama kadi bikinga babikalwa babo ne bipite kulampe bya bantu
MUNTU UBWANYA KWIPANGULA’MBA: “Le Bulopwe bwa Leza i bika?”
-
Lelo ukamulondolola namani?
MU KĪPI
Bulopwe bwa Leza i umbikalo wa binebine udi momwa mūlu usa kuludika ntanda yonso.
Pitulukai’mo
-
Le i bāni bakaludika mu Bulopwe bwa Leza?
-
Bulopwe bwa Leza i bupite kulampe bwa bantu namani?
-
I bintu’ka bimo Yehova byasakila babikalwa ba Bulopwe bwa Leza balonge?
KIMBA
Tala byobya byāfundije Yesu pa kwine kudi Bulopwe.
“Le Bulopwe bwa Leza Budi mu Mutyima Obe?” (Kishinte kya pa Entelenete)
Mwanda waka Batumoni ba Yehova i batonge kulamata ku Bulopwe bwa Leza kupita’ko ku imbikalo ya bantu?
Bandaula byobya binena Bible pa bantu 144 000 bene batongelwe na Yehova kukaludika na Yesu.
I bika byalengeje mwana-mukaji umo wadi mukutwe etabije amba enka Leza kete ye ubwanya kuleta ntanda idi’mo boloke?
“Monasokwedile Malondololo pa Mwanda Utala Bukondame” (Langukai!, Kweji 11, 2011)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
