XNAQʼTZBʼIL 31
¿Tiʼ aju Tkawbʼil Dios?
Mas in yolin Biblia tiʼj Tkawbʼil Dios. Kʼajbʼel Kawbʼil lu tuʼn Jehová tuʼn tjapun twi t-ximbʼetz at tiʼj Txʼotxʼ atxix ojtxe. ¿Tiʼ aju Tkawbʼil Dios? ¿Tiquʼn ojtzqiʼn quʼn qa ya in kawin? ¿Tiʼ in bʼant tuʼn toj ambʼil jaʼlo ex tiʼ kbʼantel tuʼn toj ambʼil tzul? Che xel tzaqʼwet xjel lu toj xnaqʼtzbʼil lu ex kyoj kabʼetl xnaqʼtzbʼil che ul.
1. ¿Tiʼ aju Tkawbʼil Dios ex alkye kkawil toj?
A Jehová kubʼ qʼonte kawbʼil moqa gobierno lu. A Jesús aj Kawil toj ex atz in kawin toj kyaʼj (Mateo 4:17; Juan 18:36). In tzaj tqʼamaʼn Tyol Dios jlu tiʼj Jesús: «Kkawil [...] te jumajx» (Lucas 1:32, 33). Tuʼnju a Jesús aj Kawil toj Tkawbʼil Dios, kkawil kyibʼaj kykyaqil xjal twitz Txʼotxʼ.
2. ¿Alkyeqe che kawil tukʼil Jesús?
Nya tjunalx Jesús kkawil. In tzaj tqʼamaʼn Tyol Dios jlu: «Te tkyaqil kʼloj kyiyjil xjal ex te tkyaqil kʼloj xjal junxilchaq kyyol, ex kye kykyaqil tnam, ex kye kykyaqil nasyon [...] che kawil kyibʼaj xjal twitz txʼotxʼ» (Apocalipsis 5:9, 10). ¿Jteʼ xjal che kawil tukʼil Jesús? Atxix tej tul Jesús tzalu twitz Txʼotxʼ, o che ok lepeʼ nim millón xjal tiʼj moqa o che okslan. Noqtzun tuʼnj, oʼkx 144,000 xjal che kawil tukʼil toj kyaʼj (uʼjinktza Apocalipsis 14:1-4). Atzun kye txqantl okslal che anqʼil tzalu twitz Txʼotxʼ ex che tel tjaqʼ Tkawbʼil Dios (Salmo 37:29).
3. ¿Tiquʼn mas tbʼanel Tkawbʼil Dios twitz kykawbʼil xjal?
Ateʼ junjun aj kawil kyaj tuʼn kyonin kyiʼj txqantl, noqtzun tuʼnj, mintiʼ in japun tkyaqilju in kubʼ kyximen. Ex aj tbʼet ambʼil, in nok juntl aj kawil te kyxel ex bʼalo nya ax t-ximbʼetz at. Atzunte Jesús, aju aj Kawil toj Tkawbʼil Dios, mlay tzʼok juntl te t-xel. Ex in tzaj tqʼamaʼn Biblia qa o kubʼ tqʼoʼn Dios «jun kawbʼil mlay naj» (Daniel 2:44). Kkawil Jesús kyibʼaj kykyaqil xjal ex ax tmod kbʼel tyekʼin kyukʼil kykyaqil. Ax ikx, in kubʼ tyekʼin tkʼujlabʼil, at tbʼanel tmod ex in xi tbʼinchaʼn qe tiʼchaq toj tumel. Ex kxel tyekʼin kye xjal tuʼn kyten tbʼanel kymod ik tzeʼn te (uʼjinktza Isaías 11:9).
QO JYON MAS TQANIL
Qo xnaqʼtzan tiʼj tiquʼn mas tbʼanel Tkawbʼil Dios twitz kykawbʼil xjal.
4. Kkawil jun kawbʼil nim tipumal kyibʼaj kykyaqil xjal
Mas at tipumal ex tnabʼil Jesucristo tuʼn tkawin twitz alkyexku juntl aj kawil o ten. Kyuʼjinktze Mateo 28:18 ex che yoline tiʼj xjel lu:
-
¿Tiquʼn mas nim toklen Jesús twitz alkyexku juntl aj kawil?
Oʼkx in che kawin xjal toj kytnam ex in pon ambʼil tuʼn kyetz. ¿Axpe jlu kbʼajel tiʼj Tkawbʼil Dios? Kyuʼjinktze Daniel 7:14 ex che yoline kyiʼj xjel lu:
-
¿Tiquʼn tbʼanel tuʼnju kkawil Tkawbʼil Dios te jumajx?
-
¿Tiquʼn tbʼanel tuʼnju kkawil kyibʼaj kykyaqil xjal?
5. Il tiʼj tuʼn tten juntl aj kawil te t-xel kykawbʼil xjal
¿Tiquʼn il tiʼj tuʼn tkawin Tkawbʼil Dios te t-xel kykawbʼil xjal? Kyqʼonke kywitze tiʼj VIDEO ex che yoline tiʼj xjel lu:
-
¿Tiʼ nya bʼaʼn o tzaj tuʼn kykawbʼil xjal?
Kyuʼjinktze Eclesiastés 8:9 ex che yoline kyiʼj xjel lu:
-
¿In kubʼpe t-ximen teya qa il tiʼj tuʼn tkawin Tkawbʼil Dios te t-xel kykawbʼil xjal? ¿Tiquʼn?
6. In nel kynikʼ xjal che tel toj Tkawbʼil Dios tiʼjju in bʼaj kyiʼj xjal
Tuʼnju anqʼin aj Kawil Jesús tzalu twitz Txʼotxʼ ik tzeʼn jun xjal, in tzaj «qʼaqʼan tkʼuʼj qiʼj» (Hebreos 4:15). Ex o che jaw tskʼoʼn Jehová 144,000 xinaq ex xuʼj tuʼn kykawin junx tukʼil Jesús. Atz tzajni qe xjal lu toj «tkyaqil kʼloj kyiyjil xjal ex te tkyaqil kʼloj xjal junxilchaq kyyol, ex kye kykyaqil tnam, ex kye kykyaqil nasyon» (Apocalipsis 5:9).
-
¿In tzajpe qʼuqbʼaʼn tkʼuʼja aj tel tnikʼa tiʼj qa ojtzqiʼn kyanqʼibʼil xjal tuʼn Jesús ex qeju che kawil junx tukʼil? ¿Tiquʼn?
O che jaw tskʼoʼn Jehová xinaq ex xuʼj toj junxichaq ambʼil ex te junxichaq tnam tuʼn kykawin tukʼil Jesús.
7. Mas tbʼanel qe ley in kubʼ tqʼoʼn Tkawbʼil Dios twitzju in kubʼ kyqʼoʼn xjal
In kubʼ kyqʼoʼn aj kawil ley tuʼntzun kyonin ex tuʼn kykwentin kyiʼj xjal. Ax ikx, o kubʼ tqʼoʼn Tkawbʼil Dios junjun ley ex il tiʼj tuʼn tjapun kyuʼn xjal che anqʼil tjaqʼ kawbʼil lu. Kyuʼjinktze 1 Corintios 6:9 a 11 ex che yoline kyiʼj xjel lu:
-
¿Tzeʼn kyanqʼibʼil xjal ktel aj t-xi kybʼiʼn qe tley Dios? a
-
¿In kubʼpe t-ximana qa toj tumel aj ttzaj tqʼamaʼn Jehová tuʼn kyjapun ley lu kyuʼn xjal che anqʼil tjaqʼ Tkawbʼil? ¿Tiquʼn in kubʼ t-ximana jlu?
-
¿Tzeʼn ojtzqiʼn quʼn qa jaku chʼexpaj kymod xjal kyuʼn ley lu? (Kyqʼonke kywitze tiʼj versículo 11).
In kubʼ kyqʼoʼn aj kawil junjun ley tuʼntzun kyxqʼuqin kyiʼj xjal ateʼ tjaqʼ kykawbʼil. Pero mas tbʼanel qe ley in kubʼ tqʼoʼn Tkawbʼil Dios twitzju kye xjal, tuʼnju in nonin kyiʼj xjal ateʼ tjaqʼ tkawbʼil ex in xqʼuqin kyiʼj.
AJU IN TZAJ KYQʼAMAʼN JUNJUN XJAL: «Atz taʼ Tkawbʼil Dios toj qanmi».
-
¿Tiʼ teya jaku t-xi ttzaqʼweʼn?
TOJ CHʼIN YOL
Axix tok aju Tkawbʼil Dios ex atz taʼ toj kyaʼj, ex kkawil kyibʼaj xjal twitz tkyaqil Txʼotxʼ.
Aju ma qo yolin tiʼj
-
¿Alkyeqe che kawil toj Tkawbʼil Dios?
-
¿Tiquʼn mas tbʼanel Tkawbʼil Dios twitz kykawbʼil xjal?
-
¿Tiʼ taj Jehová tuʼn tbʼant kyuʼn xjal che tel tjaqʼ Tkawbʼil?
OJTZQINKA CHʼINTL
Uʼjinktza aju tqʼama Jesús tiʼj jatumel ktel Tkawbʼil Dios.
«¿Atzpe taʼ Tkawbʼil Dios toj kyanmi xjal?» (Xnaqʼtzbʼil toj jw.org)
¿Tiquʼn kyaj testigos de Jehová tuʼn kyonin tiʼj Tkawbʼil Dios ex nya tiʼj kykawbʼil xjal?
Ojtzqinka tiʼ in tzaj tqʼamaʼn Biblia kyiʼj qeju 144,000 xjal o che jaw tskʼoʼn Jehová tuʼn kykawin tukʼil Jesús.
¿Tiʼ onin tiʼj jun xuʼj okx qʼoʼn toj cárcel tuʼn tel tnikʼ tiʼj qa oʼkx Tkawbʼil Dios jaku txi bʼinchante tiʼj tkyaqil nya bʼaʼn?
«El nnikʼe tiʼj alkye tten kxel bʼinchaʼn tiʼj nya bʼaʼn» (¡Weʼktza!, noviembre te 2011)
a Toj toxin kʼloj xnaqʼtzbʼil, qo xnaqʼtzal kyiʼj junjun tley Jehová tuʼntzun tel qnikʼ tiʼj tzeʼn taj tuʼn qanqʼin.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
