UYONO 31
Me Yẹ Uvie Osolobrugwẹ?
Urhomu-ẹmro rọ mai ghanren kparobọ uvuẹn i Baibol na yẹ ọro sekpahen Uvie Osolobrugwẹ. Jehova ọnọ ha Uvie ọrana ruẹ akpọ na rhiẹ i paradais, jerẹ oborẹ ọ guọlọre nẹ akpọ na o rhirhiẹ nẹ ọtonrhọ rhe. Me yẹ Uvie na? Marhẹ ọwan i ru rhe taghene o suẹn ne? Me yo ru phia ne? Me yo no ji ru obaro na? Uyono ọnana ọrhẹ eva ri ha kpahiẹn ina kpahenrhọ enọ erana.
1. Me yẹ Uvie Osolobrugwẹ, ọrọmo yẹ Orodje Uvie na?
Uvie na igọmẹti ri Jehova Osolobrugwẹ ọ ha mwu. Jesu Kristi yẹ Orodje ro no suien, ono suon nẹ odjuwu rhe. (Matthew 4:17; John 18:36) Baibol na nọ tare kpahen i Jesu: “Ọye no no suon uvuẹn ẹrhẹ Orodje bẹmẹdẹ.” (Luke 1:32, 33) Ri Jesu o rhiẹ Orodje Uvie Osolobrugwẹ na, ono suẹn ihworho ephian ri ha uvuẹn otọrakpọ na.
2. Ayọmo yi ne lele i Jesu sun?
Orhiẹ i Jesu ọvo yo no suo-on. Ihworho ri ‘nẹ ivwiẹ ephian, ọrhẹ edjadjẹ, kugbe ihworho ọrhẹ egbamwa rhe . . . ine rhiẹ irodje ri ne suẹn otọrakpọ na.’ (Revelation 5:9, 10) Awanmwa yi ne lele i Kristi sun? Nẹ ọke i Jesu ọ rhiẹ otọrakpọ na me te ọke ọnana, iduduru ihworho i rhiẹ idibo enẹyen ne. Aye ephian yi ne lelie sun? Ẹjo. Awan 144,000 ọvo yi ne riẹ odjuwu, jeghwai lele i Jesu sun. (Se Revelation 14:1-4.) Uvie na no no suẹn Ilele Kristi ri hẹrhẹre uvuẹn otọrakpọ na.—Psalm 37:29.
3. Mesoriẹ Uvie Osolobrugwẹ o rhomu ghwẹ igọmẹti ituakpọ?
Dedevwo ituakpọ re suẹn a damoma ruẹ oborẹ orhomurun, aye e vwo omẹgbanhon rẹ aye ine ruẹ i kemru kemru rẹ aye i guọlọre-e. Orho ru, ne wene aye rhẹ awọrọ ri vwa tobọ vwo ọdamẹ ihworho rẹ aye e suẹn. Ọrẹn, o vwo ohworho rọ nọ sabu wene i Jesu ro rhiẹ Osun ọrẹ Uvie Osolobrugwẹ-ẹ. Osolobrugwẹ ọ “ha Uvie owu mwu ra na ja sabu ghwọghọ.” (Daniel 2:44) Jesu ono suẹn otọrakpọ na ephian, ono suẹn ọwan abẹdẹre. Ọye o vwo ẹguọlọ ọrhẹ uruemru esiri, ọ jeghwai brorhiẹn izede ọsoso, ọnọ jeghwai yono ihworho nẹ aye i hẹrokelie vwo ẹguọlọ, uruemru esiri, jeghwai rhe brorhiẹn izede ọsoso.—Se Isaiah 11:9.
YONO KODO RHỌ
Yono oborẹ ọsoriẹ Uvie Osolobrugwẹ o rhomu ghwẹ igọmẹti ituakpọ.
4. Igọmẹti ọgbogbanhon ono suẹn otọrakpọ na ephian
Jesu Kristi o vwo omẹgbanhon ghwẹ ihworho ri sun vrẹn ne ọrhẹ ere suẹn vwana. Se Matthew 28:18, orho ru, are i gba kpahenrhọ onọ ọnana:
-
Marhẹ i Jesu o ru vwo omẹgbanhon ghwẹ ituakpọ re suẹn?
Ọgbọ buebun, igọmẹti ituakpọ o wene, habaye, osuinsuensun owuowu o suẹn ibiẹ okogho ezẹko ọvo uvuẹn akpọ na. Uvie Osolobrugwẹ vwo? Se Daniel 7:14, orho ru, are i gba kpahenrhọ enọ enana:
-
Mesoriẹ o rhomu taghene ‘a vwa samọ ghwọghọ’ Uvie Osolobrugwẹ-ẹ?
-
Mesoriẹ o rhomu taghene ono suẹn ọsoso akpọ na ephian?
5. Ene vi wene usuon ituakpọ
Mesoriẹ Uvie Osolobrugwẹ ono vi wene igọmẹti ituakpọ? Kporo IVIDIO na, orho ru, are i gba kpahenrhọ onọ ọnana.
-
Me yo nerhumu usuon ituakpọ rhe ne?
Se Ecclesiastes 8:9, orho ru, are i gba kpahenrhọ enọ enana:
-
Wu rorori taghene ofori nẹ Uvie Osolobrugwẹ o wene igọmẹti ituakpọ? Mesoriẹ?
6. Uvie Osolobrugwẹ o vwo isuinsuensun re vwẹruọ ọwan
Fọkime i Jesu ro rhiẹ Orodje ọwan o nyerẹnren jerẹ onyakpọ dẹ ne, o rhe ‘ekete ọwan e seriotọre.’ (Hebrews 4:15) Awan 144,000 ri rhiẹ ehworhare ọrhẹ emẹse ri fuevwan, ri ne lele i Jesu sun na, Jehova ọ djẹrẹ aye “nẹ ivwiẹ ephian, ọrhẹ edjadjẹ, kugbe ihworho ọrhẹ egbamwa.”—Revelation 5:9.
-
Ẹhẹn ọnọ ọ dabu totọre ru we rhe taghene i Jesu ọrhẹ eri ne lelie sun i dabu vwẹruọ oborẹ o mevirhọ re ne nyerẹn jerẹ onyakpọ? Mesoriẹ?
Jehova ọ djẹ ehworhare ọrhẹ emẹse nẹ ekete sansan rhe, nẹ aye i lele i Jesu sun
7. Uvie Osolobrugwẹ o vwo irhi irhorhomu
Igọmẹti e jurhi ri na rhua erere vwe erẹ aye e suẹn, jeghwai sẹrorẹ aye. Uvie Osolobrugwẹ ọ jeghwai vwo irhi rẹ ero suẹn ina vi huvwele yi. Se 1 Corinthians 6:9-11, orho ru, are i gba kpahenrhọ enọ enana:
-
Marhẹ wu rorori taghene otọrakpọ na ono rhirhiẹ ọke ihworho ephian arha huvwele irhi Osolobrugwẹ? a
-
Wu rorori taghene o dje ọhọ phia ri Jehova ọnọ guọlọ taghene erẹ Uvie na ono suon i vi huvwele irhi enana? Mesoriẹ?
-
Me yo djerie phia taghene ihworho ra vwa huvwele irhi enana ina sabu wene?—Se oghwẹmro 11.
Igọmẹti e jurhi re simi erẹ aye e suẹn, jeghwai rhua erere vwe aye. Uvie Osolobrugwẹ o ji vwo obọdẹn irhi re simi ero suẹn, jeghwai rhua erere vwe aye
OHWORHO ỌNỌ SABU NỌ: “Me Yẹ Uvie Osolobrugwẹ?”
-
Marhẹ wu na kpahenrhọ ye lele?
ME WU YONORIN?
Uvie Osolobrugwẹ obọdẹn igọmẹti obẹ odjuwu ro no suẹn akpọ na ephian.
Ẹzẹkoko
-
Ayọmo yi ne suẹn Uvie Osolobrugwẹ?
-
Marhẹ Uvie Osolobrugwẹ o ru gbanhon ghwẹ igọmẹti ituakpọ?
-
Me yẹ ekwakwa ezẹko ri Jehova ọ guọlọre nẹ erẹ Uvie na ono suon i ru?
GUỌLỌ IYẸNRẸN ERỌRỌ
Yono kpahen oborẹ i Jesu o yonirin ọwan kpahen ekete Uvie na ọ havwọ.
“Uvie Osolobrugwẹ ọ ha Uvuẹn Ọmuduo?” (Urhomu-ẹmro rọ ha uvuẹn itanẹti)
Mesoriẹ Iseri Jehova e vwo atamwu kpahen Uvie Osolobrugwẹ, ukperẹ ono rhiẹ usuon ituakpọ?
Roro kpahen oborẹ i Baibol na o dje kpahen awan 144,000 ri Jehova ọ djẹre ni lele i Jesu sun.
Me yọ lẹrhẹ ọmase owu rọ ha uvuẹn ekanron vwo imwẹro na taghene Osolobrugwẹ ọvo yọ nọ sabu ti osehiẹn nẹ akpọ na?
“Oborẹ Mi Ru Mẹrẹn Ẹkpahenrhọ Kpahen Osehiẹn” (Awake!, November 2011)
a Ene yono kpahen ezẹko usuẹn irhi enana uvuẹn Oghọn ọrẹ 3.
