MSOLO 31
Ko Ufumu wa Mulungu ni chani?
Nkhani ikulu yomwe ichakambiwa mu Baibolo ni yolewa va Ufumu wa Mulungu. Yahova adzakwanilise chakulinga chake choyambirira cha dziko yapasi kudzera mu Ufumu moyu. Ko Ufumu ni chani? Ko tinkudziwa tani kuti Ufumu moyu wayamba kale kutonga manjewuno? Ko ni chani chomwe Ufumu moyu wakwanirisa kale? Ndipo ni viponi vomwe udzachite pomwe kutsogolo? Pfunziro ino na yakutsogolo idzadawire mibvunzo mwaya.
1. Ko Ufumu wa Mulungu ni chani ndipo Mpfumu yake nimbani?
Ufumu ni boma yomwe Yahova Mulungu adaikhazikisa kudzulu. Mpfumu yake ni Yesu Khrisitu yemwe adzatonge ali kudzulu. (Mateyu 4:17; Yohane 18:36) Pakulewa va Yesu, Baibolo ichati: ‘Iye adzatonge ninge Mpfumu . . . mpaka kalekale.’ (Luka 1:32, 33) Ninge Mpfumu ya Ufumu wa Mulungu, Yesu adzatonge padziko yose yapasi.
2. Ko nimbani womwe adzatonge pabodzi na Yesu?
Yesu adzatongelini yekha. Wanthu wochokera ‘ntundu uliwose chiseweredwe chilichose na khaindi iliyose . . . adzatonge ninge mafumu padziko yapasi.’ (Chivumbulutso 5:9, 10) Ko ni wanthu angasi womwe adzatonge pabodzi na Yesu? Pakuti Yesu wenze adabwera padziko yapasi, mamidyau yazinji ya Akhrisitu yadakhala wotewera wake. Koma wa 144 000 wokha ndiwo achayenda kudzulu kuti adzatonge na Yesu. (Lewengani Chivumbulutso 14:1-4.) Akhrisitu anango wose padziko yapasi adzakhale nzika za Ufumu moyu.—Salimo 37:29.
3. Ko ni mwanjira yanyi yomwe Ufumu wa Mulungu ni wapadzulu maninge kuposha maboma ya wanthu?
Olo kuti maboma ya wanthu yachayesesa kuchita vinthu vabwino, kazinjikazinji yachakhala yalibe mphanvu yakuchita vinthu vomwe iwo achada. Ndipo nkuyenda kwa nthawe yachachinjiwa na maboma yanango pomwe yachakwanisalini kuchita vinthu vomwe nzika zawo zichada. Koma Ufumu wa Mulungu womwe Mpfumu yake ni Yesu, udzangenewelini m’malo na munthu aliyese. Mulungu ‘adakhazikisa Ufumu womwe udzadzongewelini mpaka kalekale.’ (Danieli 2:44) Yesu adzatonge padziko yose yapasi ndipo ambadzakonderelini. Iye ni wachikondi, wokoma moyo na wachilungamo ndipo adzapfunzise wanthu kuti ambachitire anzawo mwa njira mweyi, mwachikondi mokoma moyo na mwachilungamo.—Lewengani Yesaya 11:9.
PFUNZIRANI VIZINJI
Onani kuti ndawa chani Ufumu wa Mulungu ni wabwino maninge kuposha maboma ya wanthu.
4. Boma yamphanvu idzatonge padziko yose yapasi
Yesu Khrisitu anamphanvu zizinji zotonga kuposha maboma yose. Lewengani Mateyu 28:18, ndipo patsogolo pake kambiranani mbvunzo uyu:
-
Ko ni mwanjira yanyi momwe Yesu anamphanvu zikulu kuposha maboma ya wanthu?
Maboma ya wanthu yachachinja ndipo wolamulira aliyese achatonga mbali yake basi yochepa padziko yapasi. Ko tani pankhani ya Ufumu wa Mulungu? Lewengani Danieli 7:14, ndipo patsogolo pake kambiranani mibvunzo aya:
-
Ndawa chani ni vabwino kudziwa kuti Ufumu wa Mulungu ‘udzadzongewelini’?
-
Ndawa chani ni vabwino kudziwa kuti Ufumu moyu udzatonge padziko yose yapasi?
5. Maboma ya wanthu yadzangenewe m’malo
Ndawa chani Ufumu wa Mulungu udzangene m’malo mwa maboma ya wanthu? Wonesani VIDIYO, ndipo patsogolo pake kambiranani mbvunzo uyu.
-
Ko nchani chachitika ndawa ya utongi wa wanthu?
Lewengani Mlaliki 8:9, ndipo patsogolo pake kambiranani mibvunzo aya:
-
Ko imwepo munkuwona kuti Ufumu wa Mulungu uchadekana kungena m’malo mwa maufumu ya wanthu? Ndawa chani?
6. Boma ya Mulungu inawotonga womwe achatibvesesa
Ndawa yakuti Mpfumu yathu Yesu adakhalako padziko yapasi ninge munthu, iye ‘achabvesesa bwinobwino vofoka vathu.’ (Aheberi 4:15) Amuna na akazi wokhulupirika wokwana 144 000 womwe adzatonge pabodzi na Yesu, adasaluliwa na Yahova ‘kuchokera ku dzinza iliyose, chiseweredwe chilichose, na khaindi iliyose.’—Chivumbulutso 5:9.
-
Ko imwepo munkuwona kuti nivolimbikisa kuwona kuti Yesu na wose womwe adzatonge nawo pabodzi achadziwa momwe vichakhalira kukhala munthu padziko yapasi? Ndawa chani?
Yahova adasalula amuna akazi wochokera m’makhaindi yosiyanasiyana kuti adzatonge pabodzi na Yesu
7. Ufumu wa Mulungu unamalamulo yapadzulu
Maboma yachakonza malamulo yomwe chakulinga chake ni kuphindulisa wanthu na kuteteza nzika zake. Ufumu wa Mulungu nawombo unamalamulo yomwe nzika zake zichadekana kutewedza. Lewengani 1 Akorinto 6:9-11, ndipo patsogolo pake kambiranani mibvunzo aya:
-
Ko munkuganiza kuti dziko idzakhale tani vikadzakhala kuti aliyese ankutewedza malamulo ya Mulungu ya makhalidwe yabwino? a
-
Ko munkuwona kuti nivobveka kuti Yahova ambadikhire kuti nzika za Ufumu wake zimbalemekeza malamulo mwaya? Ndawa chani?
-
Ko nchani chinkuwonesa kuti wanthu womwe achabveralini malamulo mwaya angachinje?—Onani vesi 11.
Maboma yachaikha malamulo kuti yateteze na kuphindulisa nzika zake. Ufumu wa Mulungu unamalamulo yapadzulu yomwe ni yoteteza na yophindulisa nzika zake
WANTHU ANANGO ACHATI: ‘Ko Ufumu wa Mulungu ni chani?’
-
Ko imwepo mungadawire tani?
CHIGWATO
Ufumu wa Mulungu ni boma chaiyo yomwe ili kudzulu ndipo idzatonge padziko yose yapasi.
Kubwerezera
-
Ko nimbani womwe adzatonge mu Ufumu wa Mulungu?
-
Ko Ufumu wa Mulungu ni wapadzulu tani kuposha maboma yanango?
-
Ko ni vinthu vinango viponi vomwe Yahova achadikhira kuti nzika za Ufumu wake zimbachite?
KUTI MUDZIWE VIZINJI
Onani vomwe Yesu adapfunzisa komwe Ufumu wa Mulungu udzakhale.
‘Ku Ufumu wa Mulungu uli muntima mwa munthu?’ (Nkhani ya pa intaneti)
Ndawa chani wa Mboni za Yahova achawona kuti ni vabwino kukhala wokhulupirika kwa Yahova kuposha momwe angakhalire wokhulupirika ku maboma ya wanthu?
Onani vomwe Baibolo ichanena va wa 144 000 womwe adasaluliwa na Yahova kuti adzatonge pabodzi na Yesu.
Ko nchani chidatsimikiza nkazi munango yemwe wenze kudjeri kutsimikiza kuti Mulungu yekha ndiye angabwerese chilungamo padziko yapasi?
‘Momwe nidagumanira midawiro mudziko ilibe chilungamo’ (Galamukani!, Novembro 2011)
a Malamulo yanango ya makhalidwe mwaya tidzayapfunzire muchigawo 3.
