ZƐŊ-LƐƐI 31
Le Ɓa Ɣala Ŋɔkaloŋ-laai?
Ŋorɛ-woo mɛni kpanaŋɔɔi Ŋala-kɔlɔi sui pilaŋɔi Ɣala Ŋɔkaloŋ-laai ma. Ziova a pai tii kɛi a Galoŋ-laai ti a gɛɛ e gbɛtɛ-mɛni e pilaŋ nɔii ma ŋaa-see kɛ. Le ɓa Ɣala Ŋɔkaloŋ-laai? Ku gɔlɔŋ leŋ a gɛɛ gaa tii kɛi lonii ma? Le ɓe Galoŋ-laai ti aa gɛ? Nyaŋ le ɓe a pai gɛi tinaa-tuɛ-pere? Kwa pai mare-kɛɛ-ŋai ŋi sukulai kaai zɛŋ-lɛɛi ŋi da bolu ma ŋɔɔ feerɛi su.
1. Le Ɓa Ɣala Ŋɔkaloŋ-laai, nyaŋ gbɛɛ ɓa Galoŋ?
Galoŋ-laai kaa a gɔmɛti nyii Ziova Ɣala e zee. Zisɛ Korai ɓa Galoŋ, nyaŋ zeeɛ kaa ɣala-taa. (Maafiu 4:17; Zɔŋ 18:36) Ŋala-kɔlɔi e mo nyɛɛi: Zisɛ “a pai kɛi a [Kaloŋ] wɔlɔ-wɔlɔ da wɔlɔ wɔlɔ.” (Luu 1:32, 33) Zisɛ nyii gaa a Galoŋ Ɣala Ŋɔkaloŋ-laai mɛi, a pai kɛi nuu kelee mɛi nɔii ma ɓɛ.
2. Zisɛ da gbɛɛ-ni ɓe pai tii kɛi Galoŋ-laai su?
Zisɛ nyaa tɔnɔ fei pai tii kɛi Galoŋ-laai su. Nua da pai kulai “nuu-suu kelee su, sii-woo kelee su, da nuu kelee, e pɛlɛ lɔii-ŋuŋ kelee ma . . . nyaŋ da pai kɛi nɔii mɛi.” (Mɛni-lɛɛi 5:9, 10) Nuu ɣɛɛlu ɓe da Zisɛ-ni da pai kɛi Galoŋ-laai su? E siɣe tãi ma Zisɛ e pa la nɔii mai, nuu ŋɔmilyɔŋ tamaa daa kɛ a bolu-ɓela. Kɛɛ nuu wala ŋuŋ tɔnɔ polu wala buu naaŋ kao naaŋ (144,000) nɔ ɓe pai lii ɣala-taa a gɛɛ da Zisɛ-ni di tii kɛ Galoŋ-laai su. (Mɛni-lɛɛi 14:1-4 [NWT] lono.) Korai-ɓelai kelee pai lɛɛi nɔii mai, da pai kɛi Galoŋ-laai mu.—Ŋule-wooi 37:29.
3. Le ɓe Ɣala Ŋɔkaloŋ-laai kɛ a nɛlɛɛ e tɛɛ nuu-kpune gɔmɛti ma?
A nɛɛ maŋ nuu-kpune gɔmɛti e kɔ a gɛɛ e mɛni lɛlɛɛ-ŋa kɛ, wala-wala-laa fe diyeei a gɛɛ di mɛni-ŋai kelee kɛ da ŋwɛlii. Nyaŋ tãi ta, diai da lɛɛ dipɔɔ-ŋai, da kɛ nɔ a di kpaaŋɔɔ dikpiŋ mɛni ma. Kɛɛ, nuu ta fe pai wɔlɔ Zisɛ nyii a Galoŋ Ɣala Ŋɔkaloŋ-laai mɛi pɔɔ-ŋa siɣei. Ɣala aa “kaloŋ-laa da see [nyii] nuu ta fe pai wɔlɔ pɔrii zu-karai.” (Dania 2:44) Zisɛ a pai kɛi a Kaloŋ nɔii kelee mɛi, nyaŋ ve pai su-ɣɛɛ kɛi. Wɛli-kɛ-maa, ŋɛi-maloŋ-kaa da teniŋ-ɓo-laa kaa nyeei; nyaŋ a pai berei lɛi nua da pɔri tuai la a dikie-ni a bere sii tɔnɔi ti.—Azaya 11:9 lono.
MƐNI TAMAA MAA-KƆRI
Mɛnii kaa Ɣala Ŋɔkaloŋ-laai kɛ a nɛlɛɛ e tɛɛ la nuu-kpune gɔmɛti mai.
4. Ɣala Ŋɔkaloŋ-laai a pai kɛi nɔii mɛi
Wala-walalaa tamaa kaa Zisɛ yeei a gɛɛ e nua mɛi kaa e tɛɛ la nuu mɛi-nuu kelee ta ma nyii a wɔlɔ kɛ nɔii mai. Maafiu 28:18 lono, gɛ ni ka lono e pilaŋ mare-kɛɛ ŋi ma:
-
Le ɓe Zisɛ ŋɔwala-walalaai tɛɛ nuu-kpune gɔmɛti ŋɔi mai?
Nuu-kpune gɔmɛti maa a faleŋ a tãi kelee, nyaŋ diwala-walalaai a kɛ nɔ nɔii gbua ta mɛi. Kɛɛ bere ɓe Ɣala Ŋɔkaloŋ-laai kaa la? Dania 7:14 lono, gɛ ni ka lono e pilaŋ mare-kɛɛ-ŋai ŋi dia:
-
Le ɓe gɛ a mɛni lɛlɛɛ a gɛɛ nuu ta “fe pai wɔlɔ [Ɣala] Ŋɔkaloŋ-laai su-karai”?
-
Le ɓe gɛ a mɛni lɛlɛɛ a gɛɛ a pai kɛi nɔii gwaa kelee mɛi?
5. Maa nɛ̃ɛi Ɣala Ŋɔkaloŋ-laai e nuu-kpune gɔmɛti pɔɔ-ŋa siɣe
Maa nɛ̃ɛi Ɣala Ŋɔkaloŋ-laai e nuu-kpune gɔmɛti pɔɔ-ŋa siɣe le mɛni ma? VILOI su kaa, gɛ ni ka lono e pilaŋ mare-kɛɛ ŋi ma.
-
Le ɓe nuu-kpune gɔmɛti aa pa lai?
Ikilisiati 8:9 lono, gɛ ni ka lono e pilaŋ mare-kɛɛ-ŋai ŋi dia:
-
I laai la maa nɛ̃ɛi Ɣala Ŋɔkaloŋ-laai e nuu-kpune gɔmɛti pɔɔ-ŋa siɣe? Le mɛni ma?
6. Ɣala Ŋɔkaloŋ-laai mɛi-ɓela di mɛni-ŋai kɔlɔŋ kwa tɛɛi zui
Ee Kukaloŋ Zisɛ e kɛ a nuu-kpune nɔii ma ɓɛi, a pɔri ‘kumaloŋ kaai kufii-kpɛɛi sui.’ (Ibulu 4:15) Ziova e nuu wala ŋuŋ tɔnɔ polu wala buu naaŋ kao naaŋ (144,000) nyii-ŋai da Zisɛ-ni da pai tii kɛi Galoŋ-laai sui, kula “nuu-suu kelee su, sii-woo kelee su, da nuu kelee, e pɛlɛ lɔii-ŋuŋ kelee ma.”—Mɛni-lɛɛi 5:9.
-
I laai la gaa a ŋaa-nɛnɛ mɛni a gɛɛ Zisɛ da nyee mu kaloŋ-ŋai kelee di mɛni-ŋai kɔlɔŋ nuu-kpune a tɛɛi zui? Le mɛni ma?
Ziova aa sinaa da nɛyaa siɣe nyii-ŋai kula lɔii ŋuŋ takpɛni-ŋa su a gɛɛ da Zisɛ-ni di tii kɛ Galoŋ-laai su
7. Ɣala Ŋɔkaloŋ-laai maa tɔŋ-ŋai lɛlɛɛi e tɛɛ nuu-kpune gɔmɛti ŋɔi ma
Gɔmɛti-ŋa da tɔŋ-ŋa see nyii maa nɛ̃ɛi e kpɔŋ maa tɛɛ nɔii su-ɓela pɔ e dimaa kɔ̃ɔ. Bere sii tɔnɔi ti su, tɔŋ-ŋa kaa Ɣala Ŋɔkaloŋ-laai su nyii maa nɛ̃ɛi mu-ɓela di sia lai. 1 Kɔleŋtiɛŋ 6:9-11 lono, gɛ ni ka lono e pilaŋ mare-kɛɛ-ŋai ŋi dia:
-
I laai la ŋeniɛi a pai kɛi leŋ a kɛ nuu kelee a sia a Ziova ŋɔtɔŋ-ŋai? a
-
I laai la nɛlɛɛi a gɛɛ Ziova e mo a gɛɛ maa nɛ̃ɛi Ŋɔkaloŋ-laai mu-ɓela di sia a dɔŋ-ŋai ŋi? Le mɛni ma?
-
Le ɓe nɛ a gɛɛ nuai difa dɔŋ-ŋai ŋi mɛi kaai, da pɔri dimaa falenii?—Ŋoo-kpua 11 kaa.
Gɔmɛti-ŋa da tɔŋ-ŋa see a gɛɛ e dinuai maa kɔ̃ɔ, e kpɔŋ maa tɛɛ dipɔ. Tɔŋ lɛlɛɛ-ŋa kaa Ɣala Ŋɔkaloŋ-laai su nyii a mu-ɓela maa kɔ̃ɔ e kpɔŋ maa tɛɛ dipɔ
NUU TA A PƆRI I MARE KƐI: “Le ɓa Ɣala Ŋɔkaloŋ-laai?”
-
Ya pɔri mare-kɛɛ ti sukulai leŋ?
MƐNI-ŊUŊ-ŊAI YAA MAA-KƆRII
Ɣala Ŋɔkaloŋ-laai kaa a gɔmɛti kpɔɔi ɣala-taa nyii pai kɛi nɔii gwaa kelee mɛi.
Gili-too-ŋa mare-kɛɛ-ŋai
-
Gbɛɛ-ni ɓe pai kɛi Ɣala Ŋɔkaloŋ-laai mɛi?
-
Le ɓe Ɣala Ŋɔkaloŋ-laai kɛ a nɛlɛɛ e tɛɛ la nuu-kpune gɔmɛti ma?
-
Le ɓa mɛni-ŋai taŋa nyii Ziova a ŋwɛlii Galoŋ-laai mu-ɓela di gɛ?
MƐNI TAKPƐNI-ŊA MAA-KƆRI
Mɛnii kaa Zisɛ e mo e pilaŋ ɓɛi Galoŋ-laai kaa naai ma.
“I Laai La Ɣala Ŋɔkaloŋ-laai Kaa Ilii Su?” (Zɛŋ-lɛɛi ŋi kaa jw.org fãai ŋa)
Le mɛni ɓe Ziova Ŋɔsere-faa Kɛ-ɓelai da tɔɔ la a gbanaŋɔɔ Ɣala Ŋɔkaloŋ-laai polu e tɛɛ la nuu-kpune gɔmɛti mai?
Mɛni maa-kɔri e pilaŋ mɛnii ma Ŋala-kɔlɔi e mo e pilaŋ nuu wala ŋuŋ tɔnɔ polu wala buu naaŋ kao naaŋ (144,000) ma nyii Ziova aa di siɣe zu a gɛɛ da Zisɛ-ni di tii kɛ Galoŋ-laai su.
“Gbɛɛ-ni Ɓe Pai Lii Ɣala-taai?” (Zɛŋ-lɛɛi ŋi kaa jw.org fãai ŋa)
Le ɓe gɛ nɛni tɔnɔ nyii kɛ kpiniŋ pɛrɛ mui kɛ laa la a gɛɛ Ɣala nɔ ɓe a pɔri fili-mɛni kperai ŋeniɛi sui?
“Berei Ŋa Ŋamare-kɛɛ-ŋai E Pilaŋ Fili-mɛni Mai Sukulai Kaa Lai” (Kɛ-a-iŋɛi!, Bɔrɔŋ-kpalai 2011)
a Kwa pai lonoi e pilaŋ dɔŋ-ŋai ŋi taŋa dia Gɔlɔ-kpiniŋ 3 su.
