LIJIGANYO 31
Ana Uchimwene wa Mlungu Uli Chichi?
M’Baibulo, ngani jakusosekwa mnope jili jakwamba Uchimwene wa Mlungu. Yehofa chachikamulichisya masengo Uchimwenewu pakwanilisya chakulinga chakwe chapandanda chakwamba chilambo chapasi. Nambo ana Uchimwenewu uli chichi? Soni mpaka tumanyilile chamtuli kuti Uchimwenewu ukulamulila apano? Ana ni yindu yapi yawukombwele kutenda? Ana kusogoloku chiwutende yamtuli? Mu lijiganyoli soni gaŵili gakuyichisya chitupate kwanga kwa yiwusyoyi.
1. Ana Uchimwene wa Mlungu uli chichi, soni ana Mwenye jwakwe ali ŵani?
Uchimwenewu jili boma jatamilikasisye Yehofa Mlungu. Mwenye jwakwe ali Yesu Klistu jwakusalamulila ali kwinani. (Mateyu 4:17; Yohane 18:36) Pakwamba ya Yesu Baibulo jikusati: “Tachiŵa Mwenye . . . . mpaka kalakala.” (Luka 1:32, 33) Yesu jwali Mwenye jwa Uchimwene wa Mlungu chachilamulilaga chilambo chosope chapasi.
2. Ana Yesu chachilamulilaga yalumo ni ŵani?
Yesu ngasalamulila jika. Ŵandu ŵa “ngosyo syosope, chiŵecheto chilichose, ni mtundu uliwose. . .tachilamulila pachilambo chapasi.” (Chiwunukuko 5:9, 10) Nambo ana ni ŵandu ŵalingwa ŵachalilamulilaga yalumo ni Yesu? Kutyochela pandaŵi jiŵayiche Yesu pachilambo chapasi, ŵandu ŵajinji aŵele ŵakumkuya ŵakwe. Mwa ŵeleŵa, ŵandupe 144,000 ni ŵakwawula kwinani kukulamulila ni Yesu. (Aŵalanje Chiwunukuko 14:1-4.) Ŵandu ŵane wosope chachiŵa pachilambo chapasi ni kulamulidwaga ni Uchimwenewu.—Salimo 37:29.
3. Ana ligongo chichi Uchimwene wa Mlungu uli wambone mnope kupunda ma boma ga ŵandu?
Atamose ŵakulamulila ŵa chilambochi ali alinjile kutenda yambone, nambo ŵangakola machili gakutenda yiliyose yakusaka. Mkupita kwandaŵi ŵakulamulilaŵa akusatyokaga m’maulamusi gawo. Kaneko akusayikagasoni ŵane ŵele chakulinga chawo ngaŵa kwakamuchisya ŵandu nambo kusaka kulipatila. Mwakulekangana ni jemanjaji, Mwenye jwa Uchimwene wa Mlungu jwali Yesu, ngasajinjilidwa mmalo ni jwine jwalijose. Baibulo jikusati, Mlungu “tachitamilisya uchimwene wele ngisiwujonasika.” (Daniele 2:44) Yesu chachilamulilaga chilambo chosope chapasi, soni ulamusi wakwe uchiŵa wangali lusagu. Yili myoyo ligongo jwalakwe ali jwachinonyelo, jwachanasa soni jwachilungamo. Mwamti chachajiganya ŵandu kuti akole ndamo syelesi.—Aŵalanje Yesaya 11:9.
KULIJIGANYA YEJINJI
Chitulijiganye ligongo lyakwe Uchimwene wa Mlungu uli wambone mnope kupunda maboma ga ŵandu.
4. Boma jamachili jichilamulilaga pachilambo chosope
Yesu Klistu akwete machili ga ulamusi kupunda ŵakulamulila wosope ŵatemi pachilambopa. Aŵalanje Mateyu 28:18, kaneko akambilane chiwusyo achi:
-
Ana ulamusi wa Yesu ukulekangana chamtuli ni ulamusi wa ŵandu?
Maulamusi ga ŵandu gakusachenga ndaŵi ni katema soni jwakulamulila akusagambaga kulamulila kambali kamnono ka chilambochi. Nambi uli pakwamba ya Uchimwene wa Mlungu? Aŵalanje Daniele 7:14, kaneko akambilane yiwusyo ayi:
-
Ana ligongo chichi yili yambone kumanyilila kuti Uchimwenewu “ngasiwujonasika”?
-
Ana ligongo chichi yili yakusangalasya kumanyilila kuti Uchimwenewu uchilamulila pachilambo chosope?
5. Maulamusi ga ŵandu gakusosekwa kwinjilidwa mmalo
Ana ligongo chichi Uchimwene wa Mlungu ukusosekwa kwinjila mmalo mwa maulamusi ga ŵandu? Alolele FIDIYO, kaneko akambilane chiwusyo achi.
-
Ana ulamusi wa ŵandu uyikasisye yindu yamtuli?
Aŵalanje Jwakulalichila 8:9, kaneko akambilane yiwusyo ayi:
-
Ana akuganisya kuti Uchimwene wa Mlungu ukusosekwa kwinjila mmalo mwa maboma ga ŵandu? Ligongo chichi akuganisya myoyo?
6. Ŵakulamulila ŵa mu Uchimwene wa Mlungu Akusatupikanichisya
Pakuŵa Mwenye jwetu Yesu, pakwete payiche pachilambopa ni kuŵa mundu, jwalakwe ‘akusatutendela chanasa ligongo lya kulepetala kwetu’ kapena kuti yakulepela yetu. (Ahebeli 4:15) Achalume ni achakongwe ŵa 144,000 ali ŵakulupichika ŵachachilamulila yimpepe ni Yesu. Soni Yehofa ŵasagwile jemanjaji kutyochela mwa ŵandu “ŵa ngosyo syosope, ŵa chiŵecheto chilichose ni mtundu uliwose.”—Chiwunukuko 5:9.
-
Ana ngakusangalala kumanyilila kuti Yesu soni achimjakweŵa akusamanyilila mwawukusaŵelaga umi wa ŵanduwe? Ligongo chichi?
Yehofa asagwile achalume ni achakongwe ŵakutyochela kwakulekanganalekangana kuti chalamulile ni Yesu
7. Uchimwene wa Mlungu ukwete malamusi gambone mnope
Ma boma ga ŵandu gakusakolaga malamusi gele chakulinga chakwe chili kwakamuchisya soni kwachenjela ŵandu. Nombe nawo Uchimwene wa Mlungu ukwete malamusi gele ŵandu ŵakwe akusosekwa kugakuya. Aŵalanje 1 Akolinto 6:9-11, kaneko akambilane yiwusyo ayi:
-
Ana akuganisya kuti jwalijose pachachikuyaga malamusi ga Mlungu, yindu yichiŵa uli pachilambopa? a
-
Ana akuganisya kuti Yehofa akusaka kuti ŵandu ŵa mu Uchimwene wakwe apikanileje malamusi ga palilembali? Ligongo chichi?
-
Ana ni chichi chachikulosya kuti yili yakomboleka ŵandu ŵangapikanila malamusi kutanda kugapikanila?—Alole vesi 11.
Maboma ga ŵandu gakusapanganya malamusi gakwakamuchisya soni kwachenjela ŵandu ŵawo. Myoyosoni, Uchimwene wa Mlungu ukwete malamusi gambone mnope gakwakamuchisya soni kwachenjela ŵandu ŵakwe
JWINE MPAKA ŴAWUSYE KUTI: “Ana Uchimwene wa Mlungu uli chichi?”
-
Ana mpaka ajanje uli?
YALIJIGANYISYE
Uchimwene wa Mlungu jili boma jisyesyene jajili kwinani jele jichilamulilaga pachilambo chosope chapasi.
Yiwusyo Yakuwilisya
-
Ana ŵani ŵachachilamulilaga mu Uchimwene wa Mlungu?
-
Ana ligongo chichi Uchimwene wa Mlungu uli wambone mnope kupunda maboma ga ŵandu?
-
Ana ni yindu yapi yakusajembecheya Yehofa kuti ŵandu ŵa mu Uchimwene wakwe ayitendeje?
YAKULINGA YINESONI
Alole yaŵajiganyisye Yesu yakwamba kwawuchiŵa Uchimwene wa Mlungu.
“Ana Uchimwene wa Mlungu Uli mu Mtima Mwawo?” (Ngani ja pa intaneti)
Ana ligongo chichi ŵa Mboni sya Yehofa akusaŵa ŵakulupichika mnope ku Uchimwene wa Mlungu kulekangana ni ku maulamusi ga ŵandu?
Awungunye kuti amanyilile yajikusalondesya Baibulo pakwamba ya ŵa 144,000 ŵachachilamulilaga ni Yesu.
Ana jwamkongwe juŵaliji mu ukayidi jwasimichisye uli kuti Mlungupe, ni jwampaka ayikasye chilungamo pachilambopa?
“Yayangamuchisye Kumanyilila Juchachimasya Ungali Chilungamo” (Ajimuche!, Nofemba 2011)
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
