Nyamɩnlɩ Bulombunlililɛ wɔlɩ yɩ tʋ kɛɛ idii tumi wɔ sʋlɔ wɔ 1914 nu. Ɔzɔ mmɩlɩ nu yɛ enii yi tumililɛ yɩ awielɩyɛ ɩwɔlɩ yɩ tʋ a. Kɛ ɩyɛ mɔɔ yɛnwʋ yɩ ɔzɔ a? Má yezunzu Bayɩbʋlʋ nkɔmɩhyɛ, bʋwabɩlɛ azʋlɔtʋ, nɩɩ subanɩ azʋlɔtʋ mɔɔ ɩkɔlɩɩ ɔzʋlɔ ɔzʋmɩ 1914 mɔɔ ɩbaa nɩ nwʋ.

1. Mɩnla yɛ Bayɩbʋlʋ ɩhanlɩ idianlɩ ɛkɛnɩ a?

Danɩyɛlɩ buuku yi ɩhanlɩ idianlɩ ɛkɛnɩ kɛɛ, Nyamɩnlɩ Bulombunlililɛ ɩkɔwɔ yɩ tʋ ikeli tumi wɔ “mmɩlɩ asunwa” yɩ awielɩyɛ. (Danɩyɛlɩ 4:​16, 17) Alʋbɔ sʋ̃maa mɛda nɩ, Gyisɛsɩ ɩhanlɩ ɔzɔ mmɩlɩ la nwʋ odwokɔ kɛɛ ɩdɩ amanlɩ amanlɩ “bɛ mmɩlɩ,” na ihilehileli kɛɛ nɩ ɩlɛ́balɩ yɩ awielɩyɛ. (Luuku 21:​24) Kɛmɔ yɛbanwʋ yɩ nɩ, mmɩlɩ asunwa ɩɣalɩ yɩ awielɩyɛ wɔ 1914 nu.

2. Ɔzʋmɩ 1914 mɔɔ ɩbaa nɩ, mɩnla bʋwabɩlɛ nɩɩ subanɩ yɛ ɩkɔlɩ ɔzʋlɔ a?

Gyisɛsɩ yɩ adʋwavʋlɔ zianlɩ yɩ kɛɛ: “Kile yɛ sɛnkyɩlɛdɩ mɔɔ ɩkɛma yɛkɔnwʋ kɛɛ wʋ ɛɣalɩyɛ nɩ idwu na oyuwadɩ eyi ɩbaa yɩ awielɩyɛ.” (Matiyu 24:3) Gyisɛsɩ ɩyɩɩ yi munwa nɩ, ɩhanlɩ nninyeni sʋ̃maa mɔɔ sɛ ɩbɔ yɩ tʋ kɛɛ idii Bulombunli wɔ Nyamɩnlɩ Bulombunlililɛ nu wɔ sʋlɔ a, ikezizi nɩ nwʋ odwokɔ. Ɩhanlɩ kɛɛ ɔzɔ nninyeni be yɛ lɛ kʋnɛ, kɔmɩ nɩɩ azɩlɛwʋsʋlɛ. (Kɩnga Matiyu 24:7.) Bayɩbʋlʋ ɩhanlɩ idianlɩ ɛkɛnɩ sʋ̃ kɛɛ, subanɩ mɔɔ mmenii bɛkɛla yɩ ali wɔ “mmɩlɩ mɔ ili awielɩyɛ nɩ nu nɩ,” ɩkɛva “anwʋhyɩlɩlɛ sʋ̃maa ɩkɛɣa.” (2 Timoti 3:​1-5) Ɔzʋmɩ 1914 mɔɔ ɩbaa nɩ, ɔzɔ nninyeni nɩɩ subanɩ azʋlɔtʋ nɩ ile salɛ nu kʋlaa.

3. Mɩnla ti mɔɔ ɔzʋmɩ kɛɛ Nyamɩnlɩ Bulombunlililɛ ɩwɔlɩ yɩ tʋ kɛɛ idii tumi nɩ, nninyeni ile salɛ nu zɛ yɩ a?

Gyisɛsɩ ɩyɛlɩ Bulombunli wɔ Nyamɩnlɩ Bulombunlililɛ yi nu nɩ, ɩákyɛ bela yɛ ɩ nɩɩ Setanɩ nɩɩ yɩ azunzuma tanɩ nɩ bɔhʋnlɩ a. Setanɩ ilili nkugu. Bayɩbʋlʋ ɩkã kɛɛ ‘bovuandinli ɩ nɩɩ yɩ awɔvʋlɔ nɩ mmɔ bogualɩ azɩlɛ yɩ zʋ.’ (Yikile 12:​9, 10, 12) Setanɩ ɩva ɛya kezile paa iluwakɛɛ izi kɛɛ bɛbazɩkɛ yɩ. Meti ɩma ɛyɛkɛ nɩɩ amanɩyɛnwʋnlɛ iwulu ɔzʋlɔ wɔ oyuwadɩ yi nu. Ɩáyɛ nnwʋánlɩ kɛɛ nninyeni ile salɛ nu zɛ! Nyamɩnlɩ Bulombunlililɛ ɩbayɩ atɩɩtɩɩ eyimmɔ munwala wɔ ɛkɛnɩ.

 SUMÁ SƲ̃MAA

4. Bayɩbʋlʋ nu ngʋndawulɛ ma yɛnwʋ kɛɛ 1914 yɛ Nyamɩnlɩ Bulombunlililɛ yɩ ɩwɔlɩ tʋ kɛɛ idii tumi a

Kezimɔ nkɔmɩhyɛ yɩ ilili bɔmʋnlɩ ɩɣalɩ nu . . .

• (E) Nɩ owudo yɩ igyĩ ɛkɛnɩ ɩma aninyia a? ​—Kilá nkyɩkyɛmi 22.

• (Ɛ) Kɛ ɩyɛlɩ mɔɔ begyinanlɩ yi tumililɛ yi nu a?​—Kɩnga Danɩyɛlɩ 4:​29-​33.

• (F) Mɩnla yɛ ɩdʋlɩ Nebukadineza wɔ “mmɩlɩ asunwa” yɩ awielɩyɛ a?​—Kɩnga Danɩyɛlɩ 4:​34-​36.

Kezimɔ nkɔmɩhyɛ yɩ ɩɣalɩ numɔ aɣinzi yi . . .

• (G) Nɩ owudo yɩ igyĩ ɛkɛnɩ ɩma aninyia a?​—Kɩnga 1 Mmɩlɩzʋdwokɔ 29:23

• (H) Kɛ ɩyɛlɩ mɔɔ begyinanlɩ yi tumililɛ yi nu a? Kɛ ɩyɛ mɔɔ yɛnwʋ kɛɛ nɩ begyina numɔ wɔ mmɩlɩ po mɔɔ nɩ Gyisɛsɩ ɩwɔ azɩlɛ yɩ zʋ nɩ a?​—Kɩnga Luuku 21:24.

• (I) Mɩnla mmɩlɩ nɩɩ dɩka yɛ bezia bɔwɔlɩ tumililɛ yɩ tʋ dɔkʋ̃ a?

 6. Yɛ́ dɩyɛ be fa kile kɛɛ ede edi kɛɛ Nyamɩnlɩ Bulombunlililɛ idii tumi

Kɩnga Matiyu 24:​3, 14, na akʋ̃ bozunzú ndwokɔɣizialɛ eyimmɔ nwʋ:

• Mɩnla egyima titili yɛ ɩkɔlɩɩ ɔzʋlɔ mɔɔ ɩma yɛnwʋ kɛɛ Nyamɩnlɩ Bulombunlililɛ idii tumi nnɛ a?

• Kɛ ɩkɛyɛ na wʋayɛ egyima eyi be a?

Nyamɩnlɩ Bulombunlililɛ idii tumi sikalɛyɩ, na ɩlɛ́kyɛ sa ɩba idi azɩlɛ yɩ munwala zʋ tumi. Kɩnga Hibulumaa 10:​24, 25, na akʋ̃ bozunzú odwokɔɣizialɛ eyi nwʋ:

• Mɩnla yɛ ɩsɛ kɛɛ ye nu ɔkʋ̃ bela ɩyɛ mmɩlɩ mɔ ‘yɛnwʋ kɛɛ eɣile nɩ ibikee’ nɩ a?

 YƖ DƆKƆWƆLƐ

Bayɩbʋlʋ nkɔmɩhyɛ nɩɩ nninyeni mɔɔ isizii wɔ oyuwadɩ nu nɩ idi dasɩlɛ kɛɛ Nyamɩnlɩ Bulombunlililɛ idii tumi nnɛ. Sɛ yɛbɔ nwʋmɔ ɛlawulo na yɛkɔ dɩyɛzumanlɛ a, nɩ yɛdaa yɩ ali kɛɛ yede yedi kɛɛ idii tumi.

Kɛ Okowuwa Ekeze a?

• Mmɩlɩ asunwa mɔɔ Danɩyɛlɩ buuku yi ɩhanlɩ nwʋmɔ odwokɔ yɩ ɩɣalɩ awielɩyɛ nɩ, mɩnla yɛ izili a?

• Mɩnla yɛ ɩma ede edi kɛɛ Nyamɩnlɩ Bulombunlililɛ ɩwɔlɩ yɩ tʋ wɔ 1914 a?

• Kɛ ɩkɛyɛ na wʋahile kɛɛ ede edi kɛɛ Bulombunlililɛ yɩ idii tumi nnɛ a?