PELAJAREN 32

Kerajan Dibata Enggo Merentah!

MAINKEN

Kerajan Dibata mulai merentah i surga bas tahun 1914. Bas tahun e pe, imulai wari-wari pendungi pemerentahen manusia. Janari siteh kerna si e? Sibahas kari nubuat Pustaka si Badia kerna si e. Sibahas ka kari uga keadan doni enda bage pe sipat kalak mulai tahun 1914.

1. Kai si enggo inubuatken Pustaka si Badia?

Arah buku Daniel, banci siteh maka Kerajan Dibata mulai merentah bas akhir jangka waktu si igelari “pitu masa.” (Daniel 4:16, 17) Piga-piga waktu kenca si e, ikataken Jesus jangka waktu e eme “waktu si itetapken man bangsa-bangsa,” janah sanga Jesus i doni, icidahkenna maka jangka waktu e lenga dung. (Lukas 21:24) Pitu masa e, dung bas tahun 1914 bagi si nandangi sibahas bas pelajaren enda.

2. Uga nge keadan doni enda bage pe sipat-sipat kalak kenca tahun 1914?

Murid-murid Jesus merhat meteh ndigan Kerajan Dibata mulai merentah ras ndigan wari-wari pendungi imulai. Sungkun kalak e Jesus, “Kai nge pagi si jadi tanda kerehenndu ras kedungen jaman enda?” (Matius 24:3) Jawap Jesus alu ngataken kai saja pagi si terjadi kenca ia mulai merentah i surga jadi Raja Kerajan Dibata. Contohna perang, kurang pangan, ras gempa. (Baca Matius 24:7.) Bas Pustaka si Badia pe, inubuatken maka sipat kalak bas “wari-wari pendungi” erban kegeluhen jadi “sulit.” (2 Timotius 3:1-5) Kenca tahun 1914, nubuat kerna keadan doni ras sipat-sipat kalak, enggo reh jelasna teridah.

3. Engkai maka parah kel keadan doni enda kenca Kerajan Dibata mulai merentah?

La ndekah kenca Jesus jadi Raja Kerajan Dibata, imulaina me perang ngelawan Setan ras malekat-malekat jahat. Talu me Setan. Janah ikataken bas Pustaka si Badia, “Isampetken ia ku doni ras kerina malekat-malekatna.” (Ketangkasen 12:9, 10, 12) Merawa kel Setan perban tehna lanai ndekah ia ikernepken. Emaka banna kesusahen ras kiniseran i belang-belang doni. E me sebapna parah kel keadan doni enda! Tapi, kerina masalah e idungi Kerajan Dibata pagi.

PELAJARI TERBAGESEN

Sipelajari kari kai si mbuktiken maka Kerajan Dibata mulai merentah bas tahun 1914. Selain si e, sipelajari ka kari kai si perlu silakoken guna mbuktiken tek kita Kerajan e enggo merentah gundari.

4. Perhitungen waktu menurut Pustaka si Badia ncidahken maka Kerajan Dibata mulai merentah bas tahun 1914

Putar VIDEO.

VIDEO: Kerajan Dibata Mulai Merentah bas Tahun 1914 (5:02)

Raja Nebukadnesar arah Babilon iban Dibata ernipi kerna masa depan. Nipi raja e ras ertina si ijelasken Daniel, itulis bas Pustaka si Badia. Arah Pustaka si Badia, banci siteh maka nubuat bas nipi e terjadi bas pemerentahen Nebukadnesar bage pe bas Kerajan Dibata.—Baca Daniel 4:17. a

Bacalah Daniel 4:20-26, kenca si e bahas penungkunen enda:

(A) Kai nge si idah Nebukadnesar bas nipina?—Nen ayat 20 ras 21.
(B) Kai si terjadi man batang kayu e? —Nen ayat 23.
(C) Kai si terjadi bas pendungi “pitu masa” e?—Nen ayat 26.

Nipi kerna Batang Kayu e Lit Hubungenna ras Kerajan Dibata

NUBUAT (Daniel 4:20-36)

Pemerentahen

(A) Batang kayu si galang

Pemerentahen ngadi sementara

(B) “Tabahlah batang kayu e,” janah pediat “ngasa pitu masa”

Pemerentahen ilanjutken ka mulihi

(C) “Mulihi ka pagi kam jadi raja”

Bas penggenapen si pertama . . .

(D) Ise si igambarken batang kayu e? —Nen ayat 22.
(E) Ndigan pemerentahenna ngadi sementara? —Baca Daniel 4:29-33.
(F) Kai si terjadi man Nebukadnesar bas pendungi “pitu masa” e? —Baca Daniel 4:34-36.

PENGGENAPEN SI PERTAMA

Pemerentahen

(D) Raja Nebukadnesar arah Babilon

Pemerentahen ngadi sementara

(E) Kenca 606 SM, Nebukadnesar lanai waras janah lanai banci ia merentah pitu tahun dekahna

Pemerentahen ilanjutken ka mulihi

(F) Nebukadnesar waras ka mulihi janah merentah mulihi

Bas penggenapen si peduaken . . .

(G) Ise si igambarken batang kayu e? —Baca 1 Kronika 29:23.
(H) Ndigan pemerentahen kalak e ngadi? Janari siteh maka pemerentahen e lenga merentah mulihi sanga Jesus i doni? —Baca Lukas 21:24.
(I) Ndigan janah i ja pemerentahen e merentah mulihi?

PENGGENAPEN SI PEDUAKEN

Pemerentahen

(G) Raja-raja Israel si nggambarken pemerentahen Dibata

Pemerentahen ngadi sementara

(H) Jerusalem ihancurken, emaka la lit raja keturunen Israel 2.520 tahun dekahna

Pemerentahen ilanjutken ka mulihi

(I) Jesus mulai merentah i surga jadi Raja Kerajan Dibata

Asa kai dekahna pitu masa e?

Banci siangkai sada ayat bas Pustaka si Badia adi sipereksa ayat-ayat si debanna. Contohna, bas buku Ketangkasen ikataken maka telu setengah masa seri ras 1.260 wari. (Ketangkasen 12:6, 14) Emaka pitu masa seri ras dua kali 1.260 wari eme 2.520 wari. Mon-mon bas Pustaka si Badia, sada wari maksudna sada tahun. (Esekiel 4:6) Emaka pitu masa bas buku Daniel maksudna 2.520 tahun.

5. Keadan doni enda berubah mulai tahun 1914

Putar VIDEO.

VIDEO: Keadan Doni Enda Berubah Mulai Tahun 1914 (1:10)

Enggo nubuatken Jesus uga keadan doni enda kenca ia jadi Raja. Bacalah Lukas 21:9-11, kenca si e bahas penungkunen enda:

Arah kai si iceritaken bas ayat-ayat ndai, kai nge si idahndu ntah pe si begindu enggo terjadi?

Ikataken Rasul Paulus uga sipat-sipat kalak bas wari-wari pendungi pemerentahen manusia. Bacalah 2 Timotius 3:1-5, kenca si e bahas penungkunen enda:

Lit nge idahndu kalak si bage sipatna gundari?

6. Buktikenlah maka tek kam Kerajan Dibata enggo merentah

Bacalah Matius 24:3, 14, kenca si e bahas penungkunen enda:

Pendahin penting kai si mbuktiken Kerajan Dibata enggo merentah?
Uga carana gelah banci kam ikut bas dahin e?

Kerajan Dibata enggo merentah, janah lanai ndekah Kerajan e pe merentah seh ku doni enda. Bacalah Heber 10:24, 25, kenca si e bahas penungkunen enda:

Kai si arus silakoken perban “siidah wari e enggo reh deherna”?

Kai nge si lakokenndu adi tehndu banci sampatindu kalak janah banci selamatkenndu geluhna?

LIT SI NUNGKUN: “Engkai maka kataken Saksi Jahwe tahun 1914 e tahun si penting?”

Uga nindu njawapsa?

KESIMPULEN PELAJAREN ENDA

Nubuat ras perhitungen waktu menurut Pustaka si Badia bage pe keadan doni enda, mbuktiken maka Kerajan Dibata enggo merentah. Sibuktiken tek kita kerna si e, alu mberitaken Kerajan Dibata ras reh ku perpulungen.