NLÔ AJÔ 32

Éjôé Zambe é tatéya na ja jôé!

Vô’ôlô nkobô

Éjôé Zambe é nga tebe yôp mbu 1914. Mbu ôte fe ñwô melu ma su’ulan me nga taté. Aval avé bia yeme de? Bi tame zu yene minkulane mejô ya Bible a lat a melu ma su’ulan, a aval avé mi nga tôéban ataté mbu 1914.

1. Jé Kalate Zambe a nga jô?

Kalate Daniel a nga jô na, Éjôé Zambe jé taté na ja jôé éyoñ “biyoñe zañbwa” bi lôteya. (Daniel 4:16, 17) Ntete mimbu ôsu, Yésus a nga loone biyoñ bite na “melu bôt be ne te yeme Zambe.” A nga liti fe na melu mete me ngenane te lôt. (Luc 21:24) Avale bia zu yen, biyoñe zañbwa bite bi nga man mbu 1914.

2. Mame mevé me nga dañe yené ataté mbu 1914?

Beyé’é be Yésus be nga sili nye na: “Za ndem ja ye bo nzuan wo ye zu, a asu’ulane ya si nyô?” (Matthieu 24:3) Ane Yésus a nga kate be abui mame da ye boban éyoñ é taté na a jôé ane Njôô ya Éjôé Zambe. A nga kobô ajô bita, mfumbane ya saé, a mimfô’ôsane mi si. (Lañe’e Matthieu 24:7.) Kalate Zambe a nga jô na mefulu bôte ba ye bi “melu ma su’ulan” ma ye soo “mbia biyoñ.” (2 Timothée 3:1-5) Mam mete me nga tu’a yené ataté mbu 1914.

3. Amu jé mam ma tu’a bo abé nté ane Yésus a nga taté na a jôé?

Éyoñe Yésus a tebeya Njôô ya Éjôé Zambe, ane a nga wosane Satan a mimbia minsisim mié yôp été. Yésus a nga dañe Satan bita bite. Kalate Zambe a jô na Satan “a nga wuaban akui si, a beange bé be nga wuabane si a nye.” (Nlitan 12:9, 10, 12) Satan a wô’ô angôndô ya ôlun amu a yeme na Yéhôva a mbeme zu wôé nye. Jôme te nje a bo na bôte be tôbane minju’u si ése meku’u menyin. Nde ñhe bi nji yiane vembe nge si é ne njalan a minju’u den. Ve Éjôé Zambe ja zu mane vaa minju’u mite mise.

TUKA’A FAK

Yene’ amu jé bia buni na Éjôé Zambe é nga taté na ja jôé mbu 1914, a aval avé jam ete da fombô wo.

4. Minkulane mejô ya Bible mia liti na Éjôé Zambe é nga taté na ja jôé mbu 1914

Futi’i VIDÉO.

VIDÉO: Éjôé Zambe é nga taté mbu 1914 (5:02)

Yéhôva Zambe a nga bo na Nebucadnetsar, Njôô ya Babylone, a yeme biyeyem bia liti nye mam ma ye bobane melu ma zu. Atinane Daniel a nga ve biyeyeme bite da fombô éjôé Nebucadnetsar a Éjôé Zambe.—Lañe’e Daniel 4:17. a

Lañe’e Daniel 4:20-26, mvuse ya valé, bela’ane nkpwas asu na ô yalane minsili mi:

(A) Jé Nebucadnetsar a nga yene biyeyem?—Fombô’ô éfus 20 a 21.
(B) Jé é nga kui élé éte?—Fombô’ô éfus 23.
(C) Jé ja ye boban éyoñ “biyoñe zañgwa” bi lôteya?—Fombô’ô éfus 26.

Nja ôvé ô ne zañ élé ya biyeyem a Éjôé Zambe?

NKULAN AJÔ (Daniel 4:20-36)

Éjôé

(A) Beta élé

Éjôé é nga tebe mone nté

(B) “Baké’ élé éte,” a jô’é na “biyoñe zañgbwa bi lôt”

Éjôé ja beta taté

(C) “Njôane wôé wo ye fo’o bo jôme jôé”

Éyoñ ôsu nkulan ajô ôte ô nga tôéban . . .

(D) Za a ne élé ya biyeyem?—Fombô’ô éfus 22.
(E) Aval avé éjôé jé é nga tebe mone nté?—Lañe’e Daniel 4:29-33.
(F) Jé é nga kui Nebucadnetsar éyoñ “biyoñe zañbwa” bi lôteya?—Lañe’e Daniel 4:34-36.

ÉYOÑ ÔSU NKULAN AJÔ ÔTE Ô NGA TÔÉBAN

Éjôé

(D) Nebucadnetsar, Njôô ya Babylone

Éjôé é nga tebe mone nté

(E) Mvuse mbu 606 Ô.É.J., Nebucadnetsar a nga taté na a so’o akut, teke fe ngule ya jôé tañe mimbu zangbwa

Éjôé ja beta taté

(F) Nebucadnetsar a beta bo mvo’é, a bulan ke nyoñ éto njôô jé

Éyoñe baa nkulan ajô ôte ô nga tôéban . . .

(G) Za a ne élé ya biyeyem?—Lañe’e 1 Minkañete 29:23.
(H) Aval avé éjôé jap é nga tebe mone nté? Aval avé bia yeme na to’o éyoñe Yésus a mbe si va, teke môt éziñ a mbe a too éto njôô Yéhôva?—Lañe’e Luc 21:24.
(I) Éyoñ évé a vé nye Éjôé Zambe é nga beta taté?

NKULAN AJÔ ÔTE WO TÔÉBAN ÉYOÑE BAA

Éjôé

(G) Bejôô bôte Yéhôva a nga telé Israël

Éjôé é nga tebe mone nté

(H) Éyoñe Jérusalem a nga tyameban, Israël a nga bo mimbu 2 520 teke njôô bôt

Éjôé ja beta taté

(I) Yésus a nga nyoñ éto Njôô ya Éjôé Zambe yôp été

“Biyoñe zañbwa” bi ne mimbu tañeya?

Bifuse biziñe ya Bible bia volô bia na bi tu’a wô’ô bi bivok. Éve’an é ne na, kalate Nlitan a jô na biyoñe bilal a étun bia bo melu 1 260. (Nlitan 12:6, 14) Nalé a tinane na biyoñe zañbwa bii bo melu 2 520. Biyoñe biziñ, Kalate Zambe a wô’ô belan éfia “melu” asu na a kobô ajô mimbu. (Ézéchiel 4:6) Ajô te, “biyoñe zañbwa” kalate Daniel a jôô bie bia bo mimbu 2 520.

5. Émo é nga tyendé ataté mbu 1914

Futi’i VIDÉO.

VIDÉO: Émo é nga tyendé ataté mbu 1914 (1:10)

Yésus a nga kobô ajô mam ma ye bobane si nyi éyoñ é tebe Njôô bôt. Lañe’e Luc 21:9-11, mvuse ya valé, yala’ane nsili wu:

Mam mevé ya mame Yésus a nga jôô me wo yene me boba’ane den?

Nlômane Paul ô nga kobô ajô mefulu bôte ba ye bi melu ma su’ulan. Lañe’e 2 Timothée 3:1-5, mvuse ya valé, yala’ane nsili wu:

Mefulu mevé ya bifuse bi wo yene bôte be bili den?

6. Liti’i na wo buni na Éjôé Zambe é nga jôé

Lañe’e Matthieu 24:3, 14, mvuse ya valé, yala’ane minsili mi:

Beta ésaé mbé a liti na Éjôé Zambe é nga jôé éyoñe ji?
Aval avé ô ne nyoñe ngab ésaé éte?

Éjôé Zambe é nga jôé éyoñe ji. Ana’ana, ja zu fe jôé si ése. Lañe’e Behébreu 10:24, 25, mvuse ya valé, yala’ane nsili wu:

Jam avé môt ase ya be bia a yiane bo nté bia “yene môs ôte ô za’a bebé”?

Nge wo te yé’é jam éziñ e ne bo bôte bevo’o mfi, nge na e ne nyii be, nga wé kate be de?

MÔT ÉZIÑ A NE SILI NA: “Amu jé Bengaa be Yéhôva ba nye’e be kobô’ ajô mbu 1914?”

Wo ye yalan aya?

ÔBALEBAS

Minkulane mejô ya Kalate Zambe, a mam ma boban émo ji den, ma kôme bo’olô na Éjôé Zambe é nga jôé. Bia liti na bia buni jam ete éyoñ bia kañete mbamba foé ya Éjôé Zambe, a éyoñ bia tabe bisulane mban.