BAG I 32
Nufen Nsi yà nke ntôô!
Nufen Nsi toʼde netô mve kamànyam num nguʼ 1914. A bʼa be yen ngelañ nà ze ba miagde léʼnjù toʼde là. Be lèn yennʼà ndùke? Bag bin aʼ ziʼde ntshob ndamnjù Ñwaʼni Nsi, njen ba tshu tsʼa tshwèt ntôg ntùm njù là, mbèn njen ngùninu benntùn fe nguʼ 1914.
1. Ntshob ndamnjù Ñwaʼni Nsi nke ndaʼdʼà ke?
Ñwaʼni Daniel naʼ soñ mbe Nufen Nsi aʼ toʼde netô à num miagde taʼ ngelañ bo nke ntsiañ mbe “zwiañ njù sammbàa” là. (Daniel 4:16, 17) Nguʼnjù yàm naʼ be tôge, Yésu bèn ntshob mfà num yen ngelañ nà mba “miagde ngelañ ngôngô” là; a naʼ bèn ntswide mbe yen ngelañ nà naʼ ke yoñ mii. (Lukas 21:24) Mba bag bin aʼ yen nà, zwiañ njù sammbàa naʼ mi à num nguʼ 1914.
2. Fe nguʼ 1914, tsit tshu bèn nke ntôg ntùm njù, benntùn bèn ngù à tsit mal à?
Ghaziʼde nu Yésu naʼ bèttʼé mbe: “Soñ yag ngelañ tshen tshu là nsi bumde là, mba lèn zʼa nsi laʼde ngelañ zʼo nsi seʼ ntùm ghamdʼo mba miagde njù là.” (Matio 24:3) Yésu bùnde bo, nsoñ tshu tsʼa nsi tôg ngelañ a toʼde netô mve kamànyam mba Mven Nufen Nsi là. A naʼ tshob mfà num ba ntsho, nzikuʼu, mba tshaʼ nenyiʼde. (Siañ Matio 24:7.) Ñwaʼni Nsi naʼ bèn nsoñ mbe, mba benntùn nsi ghù ba mat kebwô ntùm ba miagde léʼnjù là, “ngelañ kebwô nsi [be].” (2 Timôtio 3:1-5) Njoñ tshen tshu là fa toʼdʼà num nguʼ 1914.
3. Numke tshu kebwô bèn nkwiʼde ntùm njù fe mba Nufen Nsi toʼde netô à?
Ngelañ bo te Yésu mba Mven Nufen Nsi mve kamànyam nà, a leʼ Satan bo ba bebùn ntsho. Satan bi yen ntsho là. Ñwaʼni Nsi mbe, “bo maʼ i num nsitshaʼa, maʼ i bwe boa angél tse.” (Apokalipse 12:9, 12) Satan dun yantù nummbe a lèn mbe boaʼ biagdʼé. A num bwe zʼa tshwèt ngù mbe njoñ benntùn fa num nsitshaʼ nke njen ngeʼ là. A keʼ bʼa ju netshàm neyen mba nukebwô dun ntùm njù là! Nufen Nsi nsi biagde njoñ tshen nukebwô là fa.
TSWEʼ NTUN MI
Yen mba bag ghù kà ndèn mbe, Nufen Nsi toʼde netô à num nguʼ 1914, mbèn njen mbʼa tshwèt ndôde ben nà.
4. Ntshob ndamnjù Ñwaʼni Nsi tshwèt ndaʼde mbe, Nufen Nsi toʼde netô à num nguʼ 1914
Nsi naʼ ghù mbe Nébukanetsar, mven Babilon, yen tshu tsʼa tôg ndùmànyam nà ntùm taʼ njem. Be kuʼni nesiañ yen njem nà, bo mbagde mi Daniel naʼ mfà là ntùm Ñwaʼni Nsi. Magde ke bwe mbe, yen njem nà naʼ nke ndôdʼà netô Nébukanetsar mba Nufen Nsi.—Siañ Daniel 4:17. *
Siañ Daniel 4:20-26, mbèn ndôde diañbume kà mbùnde tshen mbètte li:
-
(A) Ke ze Nébukanetsar naʼ njen ntùm ze njem à?—Lôde nka 20 bo 21.
-
(B) Ke zʼa naʼ mbe boaʼ ghù yen tù lʼà?—Lôde nka 23.
-
(C) Ke zʼa naʼ mbe aʼ tôg ngelañ “zwiañ njù sammbàa” mi à?—Lôde nka 26.
Ntamde netèt tù ndùb ze Nébukanetsar yen ntùm njem nà bo Nufen Nsi bʼa zile?
NTSHOB NDAMNJÙ (Daniel 4:20-36)
Netô
(A) Taʼ tù ndùb
Netô zʼa tsin nà
(B) “Bin keʼ tù, mbagdʼé,” mbèn mfañ “zwiañ njù sammbàa . . . tôg”
Netô bùʼde
(C) “Nufen o nsi tùʼù”
Ntùm mbwe bumde yen ntshob ndamnjù li . . .
-
(D) Tù nke ndaʼdʼà we?—Lôde nka 22.
-
(E) A naʼ tsin netô à zit ngelañ à?—Siañ Daniel 4:29-33.
-
(F) Ke zʼa naʼ ntum Nébukanetsar ngelañ “zwiañ njù sammbàa” naʼ mi à?—Siañ Daniel 4:34-36.
MBWE BUMDE
Netô
(D) Nébukanetsar,Mven Babilon
Netô zʼa tsin nà
(E) Ngelañ nguʼ 606 K.Z.N. tôg là, bà tshùb Nébukanetsar, a tsin netô num nguʼnjù sammbàa.
Netô bùʼde
(F) Nébukanetsar yade, mbèn ntoʼde netôô
Ntùm mbatte bumde yen ntshob ndamnjù li . . .
-
(G) Tù nke ndaʼdʼà we?—Siañ 1 Kronika 29:23.
-
(H) Bo naʼ tsin netô à zit ngelañ à? Be lèn à ndùke mbe yen netô là naʼ ke yoñ bèn ntoʼde netô ngelañ Yésu naʼ nkeʼ num nsitshaʼ à?—Siañ Lukas 21:24.
-
(I) Yen netô là naʼ bèn ntoʼde netô à se, mbèn mbʼa yà?
MBATTE BUMDE
Netô
(G) Fenfen ngô Israél tse bo tshwèt ndaʼde ze netô Nsi là
Netô zʼa tsin nà
(H) Bo biagde ngô Israél, sàm mèn ke bèn ntô num ngô Israél num nguʼnjù 2520
Netô bùʼde
(I) Yésu toʼde netô mve kamànyam mba mven Nufen Nsi là
Zwiañ njù sammbàa tswe à nguʼ siʼi?
Tsemoʼ bag Ñwaʼni Nsi num njwimde ben nejuʼ tsemoʼo. Mba mfiʼ là, ñwaʼni Apokalipse tshwèt ntshob mbe zwiañ njù tat ghab, nke mbʼa léʼnjù 1260. (Apokalipse 12:6, 14) Zwiañ njù tat ghab yoñ bàa, nke mbʼa zwiañ njù sammbàa ke léʼnjù 2520 lo. Tsemoʼ ngelañ, ntùm Ñwaʼni Nsi, taʼ léʼnjù nke mbʼa taʼ nguʼnjù. (Ezékia 4:6) Ndùlà, zwiañ njù sammbàa zʼa be ntùm ñwaʼni Daniel là—nke ndaʼdʼà nguʼnjù 2520.
5. Fe nguʼ 1914, njù bade
Yésu naʼ yà soñ mba njù nsi be ngelañ zʼa koʼ num diañfen nà. Siañ Lukas 21:9-11, mbèn mbùnde yen bètte li:
-
Ke ze Yésu naʼ nsoñ ndù o tshwèt njen mbèn nke njuʼ sènni à?
Ngantum Paulo naʼ bagde mat benntùn ntùm ba miagde léʼnjù. Siañ 2 Timôtio 3:1-5, mbèn mbùnde yen bètte li:
-
O tshwèt njen tshen mat là num benntùn sènni ké?
6. Laʼde mbʼo lèn ke magde mbe Nufen Nsi yà nke ntôô
Siañ Matio 24:3, 14, mbèn mbùnde tshen mbètte li:
-
Zit faʼ ndùb bèn nke ndaʼde mbe Nufen Nsi yà nke ntô à?
-
Bʼo loʼ bag ntùm sen faʼ lʼà ndùke?
Nufen Nsi yà nke ntôô, léʼ zʼa nsi tô num njoñ nsitshaʼ fa là yà ghebte. Siañ Héber 10:24, 25, mbèn mbùnde yen bètte li:
-
Mba sen léʼ là yà ghebte là, ke zʼa bètte mba we lo ghù à?
O ziʼde taʼ ju zʼa kuʼni neywimde mbèn njôg tsemoʼ là, mba oaʼ ghù à ndùke?
BE MÈNNTÙN BÈTTE MBE: “Ke zʼa ghù ghakwénta Yaweh Nsi nke ntshob yàm mfà num Nufen Nsi à?”
-
Oaʼ bùndʼà ndùke?
JU NETSHÙBE
Ntshob ndamnjù Ñwaʼni Nsi bo tshu tsʼa tshwèt ntôg ntùm njù là tshwèt ndaʼde mbe Nufen Nsi yà nke ntôô. Be nke nsoñ nkùn mebwô Nufen Nsi mbèn nke nèn ba ntseʼde, mba bag bin aʼ laʼde mbe be lèn yennà ke magde.
Mbètte nekwimde
-
Ke zʼa naʼ ntôg ngelañ zwiañ njù sammbàa a be ntùm ñwaʼni Daniel là naʼ mi à?
-
Ke zʼa tshwèt njwimdʼo nelèn ke magde mbe Nufen Nsi toʼde netô à num nguʼ 1914 à?
-
Bʼo laʼdʼà ndùke mbʼo lèn ke magde mbe Nufen Nsi yà toʼde netô à?
DIAGE
Yen ju ze ghakide tshô mba tsemoʼ benntùn tshob mfà num mba njù bade fe nguʼ 1914 là.
“Depuis quand ce déclin brutal?” (Réveillez-vous !, avril 2007)
Yen mba ntshob ndamnjù zʼa be ntùm Matio 24:14 naʼ mbade yôg taʼ mandum nà.
“Jʼaimais le baseball plus que tout au monde!” (La Tour de garde no 3 2017)
Be lèn à ndùke mbe ntshob ndamnjù a be ntùm Daniel nkam 4 là nke ntshob mfà à num Nufen Nsi à?
Ke zʼa tshwèt ndaʼde mbe “zwiañ njù sammbàa” a be ntùm Daniel nkam 4 là mi à num nguʼ 1914 à?
^ Lôde ba ñwaʼni bàa tsʼa be ntùm bag Diage yen bag i li là.
