LESEN 32
Mwúún Kot A Nemenem Iei!
Mwúún Kot we a poputá le nemenem lón láng lón ewe ier 1914. Pwal ina ewe atun a poputá muchúlóón án aramas nemenem. Pwata sia silei ena? Sipwele ppii met Paipel a eáni oesini, me met a kan fiffis wóón fénúfan me féfférún aramas seni ewe ier 1914.
1. Met Paipel a fen oesini?
Sia kúna seni puken Taniel pwe ewe Mwúún Kot epwe poputá le nemenem atun muchúlóón ewe fansoun mi iteni “fisu ier.” (Taniel 4:16, 17) Fitepúkú ier mwirin, Jesus a eita ngeni ena fansoun, ewe “fansoun än chon lükün Israel nemenem,” me a erá pwe esaamwo much. (Lukas 21:24) Iei sipwele káé pwe ena fisu ier a much lón ewe 1914.
2. Met a kan fiffis wóón fénúfan me ifa féfférún aramas seni ewe ier 1914?
Néún Jesus kewe chón káé ra ereni: “Kopwe pwäri ngenikem asisilen fansoun om wareto me ewe fansoun sopolan.” (Mateus 24:3) Jesus a pélúweniir ren an ereniir chómmóng mettóch repwe fis mwirin an wiliti King lón án Kot we Mwú lón láng. A oesini usun fisin maun, lengita, me chechchechin fénú. (Álleani Mateus 24:7.) Ewe Paipel a pwal oesini pwe féfférún aramas lón “ekewe ränin lesopolan” epwe efisi “fansoun weires.” (2 Timoty 3:1-5) Fisin ekkena mettóch me ngawolóón féfférún aramas a ákkáeúin pwápwááló seni ewe 1914.
3. Pwata a ngangngawoló fénúfan seni ewe atun Mwúún Kot a poputá nemenem?
Ekiseló mwirin án Jesus wiliti Kingen án Kot we Mwú lón láng, a maunei Satan me ekkewe timon. Satan a kkuf. Paipel a erá pwe “a koturutiu won fanüfan, i me nöün kewe chon läng.” (Pwärätä 12:9, 10, 12) A fókkun song pún a silei pwe epwele ninniiló. Ina popun a efisi weires me riáfféú wóón unusen fénúfan. Ach silei ena, a álisikich le weweiti pwata nónnómun ei fénúfan a fókkun ngaw! Án Kot we Mwú epwe pwákini meinisin ekkena osukosuk.
KÚTTAFICHI
Ppii ifa usun sia silei pwe ewe Mwúún Kot a poputá le nemenem lón ewe ier 1914 me ifa aúchean ngenikich.
4. Án Paipel kewe oesini mi weneiti ewe ier 1914
Kot a efisi án King Nepukatnesar seni Papilon lóóm epwe eáni eú ttan mi pwári met epwe fis lón mwachkkan. Ena ttan me minne Taniel a áweweei ngeni, a pwári pwe a weneiti án Nepukatnesar nemenem me án Kot we Mwú.—Álleani Taniel 4:17. a
Álleani Taniel 4:20-26, me mwirin áeá ewe chart le pélúweni ekkeei kapas eis:
-
(A) Ikkefa ekkewe mettóch Nepukatnesar a kúna lón an we ttan?—Ppii wokisin 20 me 21.
-
(B) Met epwe fis ngeni ewe irá?—Ppii wokisin 23.
-
(C) Met epwe fis atun muchúlóón ekkewe “fisu ier”?—Ppii wokisin 26.
Ifa Usun ewe Ttan Usun ewe Irá A Weneiti án Kot we Mwú?
EWE OESINI (Taniel 4:20-36)
Nemenem
(A) Efóch wakkatteen irá
A mwo kaúló an nemenem
(B) “Oupwe ukufi ewe irä,” me epwe ina usun “lon ükükün fisu ier”
A nemenemsefál
(C) “Kopwe nemenisefäli mwum”
Áeúin pwénútáán ei oesini . . .
-
(D) Ié ewe irá a liosuetá?—Ppii wokisin 22.
-
(E) Ineet a mwo kaúló le nemenem?—Álleani Taniel 4:29-33.
-
(F) Met a fis ngeni Nepukatnesar atun a muchúló ekkewe “fisu ier”?—Álleani Taniel 4:34-36.
ÁEÚIN PWÉNÚTÁÁN
Nemenem
(D) Nepukatnesar, Kingen Papilon
A mwo kaúló an nemenem
(E) Mwirin ewe ier 606 mwen Kraist, Nepukatnesar a umwesiló me ese tongeni nemenem ren úkúkún fisu ier
A nemenemsefál
(F) Nepukatnesar a miritsefál me a poputá le nemenemsefál
Lón oruuen pwénútáán ei oesini . . .
-
(G) Ié kewe ewe irá a liosuetá?—Álleani 1 Kronika 29:23.
-
(H) Ineet a mwo kaúló ar nemenem? Pwata sia silei pwe rese nemenem atun Jesus a nóm fénúfan?—Álleani Lukas 21:24.
-
(I) Ineet Kot a seikaatá emén mineféén King an epwe nemenem, me ia a fis ie?
ORUUEN PWÉNÚTÁÁN
Nemenem
(G) Ekkewe kingen Israel mi tupuni án Kot nemenem
A mwo kaúló an nemenem
(H) Jerusalem a taló, ese wor kingen Israel ren úkúkún 2,520 ier
A nemenemsefál
(I) Jesus a poputá le nemenem lón láng, i Kingen án Kot we Mwú
Ifa úkúkún ttamen ekkewe fisu ier?
Ekkewe ekkóch kinikin lón ewe Paipel, ra álisikich le weweiti pwal ekkóch kinikinin. Áwewe chék, ewe puken Pwärätä a apasa pwe úlúngát esopw ier, a wewe ngeni 1,260 rán. (Pwärätä 12:6, 14) Weween pwe eú ier lón án Paipel kewe oesini, a wewe ngeni 360 rán. Iwe ekkewe “fisu ier,” ra wewe ngeni 2,520 rán. Fán ekkóch, me ren Paipel, eú rán a wewe ngeni eú ier.—Isikiel 4:6.
5. A poputá le siwil ei fénúfan seni ewe ier 1914
Jesus a oesini usun napanapen ei fénúfan mwirin an wiliti King. Álleani Lukas 21:9-11, me mwirin pwóróusfengen wóón ei kapas eis:
-
Menni lein ekkeei mettóch ka kúkkúna an fis, are rorrong usun?
Aposel Paulus a affata napanapen aramas lón ekkewe ránin lesópwólóón án aramas nemenem. Álleani 2 Timoty 3:1-5, me mwirin pwóróusfengen wóón ei kapas eis:
-
Menni lein ekkeei mettóch ka kúna án aramas féfféri lón ei fansoun?
6. Pwári óm lúkú pwe ewe Mwúún Kot a nennemenem iei
Álleani Mateus 24:3, 14, me mwirin pwóróusfengen wóón ekkeei kapas eis:
-
Menni angang mi aúchea a pwári pwe ewe Mwúún Kot a nemenem iei?
-
Ifa usun ka tongeni fiti ei angang?
Ewe Mwúún Kot a nemenem iei, me a fókkun arapoto ránin an epwele nemenaló unusen fénúfan. Álleani Ipru 10:24, 25, me mwirin pwóróusfengen wóón ei kapas eis:
-
Met a lamot emén me emén kich sipwe féri pokiten “sia silei pwe Ränin ach Samol a arapoto”?
Ika ka silei och mettóch epwe tongeni álisi me seláni emén, met kopwe féri?
ELI EMÉN EPWE EIS: “Pwata Chón Pwáraatá Jiowa ra erá pwe 1914 ina eú ier mi fókkun aúchea?”
-
Met kopwe erá?
MENLAPAN
Ekkewe oesini lón Paipel, álleaan tettelin fansoun, me nónnómun ei fénúfan, ra affata pwe ewe Mwúún Kot a nennemenem iei. Sipwe pwári pwe sia lúkú ena ren ach afalafala ngeni aramas me fiffiti ekkewe mwich.
Enniwili
-
Met a fis atun muchúlóón ekkewe fisu ier ewe puken Taniel a oesini usun?
-
Met a alúkúlúkú ngonuk pwe ewe Mwúún Kot a poputá le nemenem lón ewe ier 1914?
-
Ifa usun kopwe pwári pwe ka lúkú pwe ewe Mwúún Kot a nemenem iei?
PWAL EKKÓCH PWÓRÓUS
Ppii met ekkewe soumakken uruwo, me pwal ekkóch aramas ra apasa ren met a siwil wóón ei fénúfan seni ewe 1914.
Álleani ifa usun ewe oesini lón Mateus 24:14 a achchúngú letipen emén mwán.
“I Loved Baseball More Than Anything!” (The Watchtower No. 3 2017)
Pwata sia silei pwe ewe oesini lón Taniel sópwun 4 a weneiti ewe Mwúún Kot?
“Ineet án Kot we Mwú A Poputá le Nemenem? (Kinikin 1)” (Ach Angangen Afalafala ewe Mwú, October 2014)
a Ppii ekkewe ruu sáingo lesen lón ewe kinikin Pwal Ekkóch Pwóróus.