LONGESO 32
Wanangana wa Zambi Kuunayulu Musono!
Wanangana wa Zambi waputukile kuyula mu malilu ha mwaka 1914. Matangwa a kusula no kaputukile ha mwaka wacho. Kuchi tunachinyingika? Tutalenu yize Mbimbiliya yaliangile kwamba, ni yuma yize yinalingiwa hashi ni yitanga yize atu akusolola chize ha mwaka 1914.
1. Yika uprofeto wa mu Mbimbiliya unasolola?
Mukanda wa Daniele wasolwele ngwo, Wanangana wa Zambi te muuputuka kuyula ha mashimbu waze akuvuluka ngwo, “tungonde shimbiali.” (Daniele 4:16, 17) Ha kupalika cha mashimbu, Yesu yavuluka mashimbu jacho ngwenyi, “miaka ya akwa mavungu” ni kulongesa nawa ngwenyi, mashimbu jacho te kanda achihwa. (Luka 21:24) Kashika, ngwe chize mutumona, tungonde shimbiali kahwile ha mwaka 1914.
2. Yuma yika hanji yitanga yika twakumona chize ha mwaka 1914?
Tumbaji twa Yesu kamuhulile ngwo: “Chilayi cha kuheta che chika, ni cha kumanunuka cha miaka?” (Mateu 24:3) Yesu yaaha chilayi cha yuma yize te muyilingiwa muze maputuka kuyula mu Wanangana wa Zambi mu malilu. Yuma yimwe yize ambile yili: Jita, zala ni minyiko yinene. (Tanga Mateu 24:7.) Mbimbiliya yaprofetezele nawa ngwo, ha “matangwa a kusula” yitanga ya atu te muyipwisa “miaka yikalu” chinji. (2 Timoteu 3:1-5) Yuma ni yitanga yacho, yakusoloka zwalala kukatuka ha mwaka 1914.
3. Mumu liaka yuma ya hano hashi yaputukile kupiha chinji muze Wanangana wa Zambi waputukile kuyula?
Muze Yesu amupwishile Mwanangana mu Wanangana wa Zambi, yasa jita ni Satana ni andemoniu jenyi mu malilu. Chocho, Yesu yakumba Satana. Mbimbiliya yinambe ngwo, “amunyashine ndo hashi, ni angelo jenyi hamwe nenyi.” (Usolwelo 12:9, 10, 12) Satana kali ni ufwatulo unji mumu kananyingika ngwenyi, kwasala hakehe amunongese. Kashika anamwesa lamba linji atu eswe hano hashi. Kanda ukomoka ha kumona yuma yipi yize yinalingiwa hano hashi! Wanangana wa Zambi muukahwisa lamba lieswe.
NYINGIKA NAWA
Hengwola hanga unyingike mumu liaka twakwamba ngwetu Wanangana wa Zambi waputukile kuyula ha mwaka 1914, ni chize chino chinakwata hali yetu.
4. Mbimbiliya yinasolola ngwo Wanangana wa Zambi waputukile kuyula ha mwaka 1914
Zambi kalotesele Mwanangana wa Babilonia Nabukanezore. Chilota chacho ni ulumbunwiso uze Daniele ahanyine, te yinatale hali Nabukanezore ni ha Wanangana wa Zambi.—Tanga Daniele 4:17. a
Tanga Daniele 4:20-26, hanyima zachisa kamushete kali mushi mba ukumbulule yihula yino:
-
(A) Yika Nabukanezore amwene mu chilota chenyi?—Tala versu 20 ni 21.
-
(B) Yika te muyilingiwa ku mutondo?—Tala versu 23.
-
(C) Yika te muyilingiwa ha kuhwa cha “tungonde shimbiali”?—Tala versu 26.
Chize Chilota Cha Mutondo Chinakwate ha Wanangana wa Zambi
UPROFETO (Daniele 4:20-36)
Kuyula
(A) Mutondo unene
Kuyula yachikanjisa
(B) “Pakulenu mutondo” ni kwecha hanga kupalike “tungonde shimbiali”
Kuyula yachifunyisa
(C) “Wanangana wenu muukola”
Kumanunuka chitangu cha uprofeto uno . . .
-
(D) Mutondo yika te unalumbunuka?—Tala versu 22.
-
(E) Kuchi kuyula chenyi achikanjishile?—Tanga Daniele 4:29-33.
-
(F) Yika yalingiwile kuli Nabukanezore ha kuhwa cha “tungonde shimbiali”?—Tanga Daniele 4:34-36.
UMANUNUKO UTANGU
Kuyula
(D) Nabukanezore, Mwanangana wa Babilonia
Kuyula yachikanjisa
(E) Kulutwe lia mwaka 606 K.M.J., Nabukanezore yazaluka, chocho yecha kuyula ha miaka shimbiali
Kuyula yachifunyisa
(F) Nabukanezore yapwa cheka ni uhashi wenyi wa kuyula
Kumanunuka chamuchiali cha uprofeto uno . . .
-
(G) Mutondo yika te unalumbunuka?—Tanga 1 Sango ja Mianangana 29:23.
-
(H) Ha shimbu lika o echele kuyula? Kuchi tunanyingika ngwetu, kuyula cho chapwile mu ukanjiso muze Yesu apwile hano hashi?—Tanga Luka 21:24.
-
(I) Ha shimbu lika, nawa kuliko Wanangana wenyi aufunyishine?
UMANUNUKO WAMUCHIALI
Kuyula
(G) Mianangana A-Izalele waze anamanyinako unguvulu wa Zambi
Kuyula yachikanjisa
(H) Yerusaleme kayinongesene, chino yichikanjisa kuyula cha mianangana A-Izalele ha miaka 2.520
Kuyula yachifunyisa
(I) Yesu yaputuka kuyula mu malilu ngwe Mwanangana mu Wanangana wa Zambi
Tungonde shimbiali kanalumbunuka miaka yingahi?
Mikanda yimwe ya mu Mbimbiliya yakutukwasa kunyingika ulumbunwiso wa mikanda yikwo. Chakutalilaho, mukanda wa Usolwelo wakwamba ngwo, miaka yitatu ni chipinji yinalumbunuka matangwa 1.260. (Usolwelo 12:6, 14) Chino chinalumbunuka ngwo, mu uprofeto wa mu Mbimbiliya, mwaka umuwika unalumbunuka matangwa 360. Kashika, “tungonde shimbiali” hanji ngwetu miaka shimbiali yinalumbunuka matangwa 2.520. Ha mashimbu amwe, muze Mbimbiliya yakuzachisa liji tangwa, mulihasa kulumbunuka mwaka umuwika.—Ezekiele 4:6.
5. Hashi halumuka chinji chize ha mwaka 1914
Yesu kasolwele yuma yize te muyilingiwa muze mapwa Mwanangana. Tanga Luka 21:9-11, mba nushimutwine chihula chino:
-
Yuma yika yize wakumona hanji wakwivwa musono?
Postolo Paulu kasolwele chize atu te mapwa ha matangwa a kusula a kuyula cha atu. Tanga 2 Timoteu 3:1-5, mba nushimutwine chihula chino:
-
Yitanga yika yize wakumona kuli atu musono?
6. Kuyula cha Wanangana wa Zambi chatamba kututakamisa
Tanga Mateu 24:3, 14, mba nushimutwine yihula yino:
-
Mulimo uka ulemu uze unasolola musono ngwo, Wanangana wa Zambi unayulu?
-
Kuchi muhasa kukwasa mulimo wacho?
Wanangana wa Zambi hiunaputuka kuyula, kashika kwasala hakehe hanga uputuke kuyula hashi heswe. Tanga A-Hepreu 10:24, 25, mba nushimutwine chihula chino:
-
Yika mutu ni mutu atamba kulinga amu “lie tangwa linakundama”?
Yika mulinga nyi wanyingika chuma chize muchihasa kukwasa hanji kulamwina akwenu?
ATU AMWE KAKULIHULA NGWO: “Mumu liaka Yela ja Yehova akuhanjika chinji hakutwala ku mwaka 1914?”
-
Kuchi muhasa kukumbulula?
YIZE WALILONGESA
Uprofeto wa mu Mbimbiliya, mashimbu ni yuma yize yinalingiwa musono, yinasolola ngwo, Wanangana wa Zambi hiwaputuka kuyula. Twakusolola ngwetu tunafuliela ha umwenemwene wacho, muze twakwambujola ni kupwa ha kukunguluka cha chikungulwila.
Kuhitulula
-
Yika yalingiwile ha kuhwa cha tungonde shimbiali ngwe chize mukanda wa Daniele waprofetezele?
-
Yika yinakwehe shindakenyo ngwe, Wanangana wa Zambi waputukile kuyula ha mwaka 1914?
-
Kuchi mutuhasa kusolola ngwetu, twakufuliela ngwo Wanangana wa Zambi unayulu musono?
HENGWOLA NAWA
Nyingika yize akwa-kuhengwola ni atu akwo akwamba hakutwala ku kwalumuka chize chakulingiwa hashi putu ha mwaka 1914.
“Mashimbu Waze Manyonga ja Atu Apihile Chinji” (Laulenu!, Abril 2007)
Tala chize uprofeto uli ha Mateu 24:14 walumwine mwono wa umwe lunga.
“Yami Te Nakuzanga Chinji Beisebol Kuhiana Yuma Yeswe!” (Kaposhi wa Kutalila No. 3 2017)
Kuchi tunanyingika ngwetu, uprofeto uli ha mukanda wa Daniele kapitulu 4, unahanjika ha Wanangana wa Zambi?
Yika yinasolola ngwo, “tungonde shimbiali” anatongola ha mukanda wa Daniele kapitulu 4, kahwile ha mwaka 1914?
a Tala chikuma “Hengwola Nawa” ha mitwe yaali ya kasula ya mukanda uno.
