CAWN DINGMI 32
Pathian Pennak Nih A Uk Cang
1914 ah Pathian Pennak nih vancung in uk hram a thawk cang. Mah cu minung uknak ni hmanung bik aa thawk caan zong a si. Zeitindah kan hngalh khawh? Baibal chimchungbia le 1914 thawkin vawlei ah a cangmi thil sining le minung nih an ngeihmi ziaza kong hna kha ruathmanh.
1. Baibal nih zei kong dah a chimchung?
Daniel Baibal ah “kum sarih” a donghnak ah Pathian Pennak nih uk hram a thawk lai tiah a ti. (Daniel 4:16, 17) Kumzabu tampi hnuah Jesuh nih mah caan kha ‘ram dang mi hna caan’ in a langhter i atu ah mah caan cu a dong rih lo tiah a ti. (Luka 21:24) 1914 ah kum sarih cu a dong ti kha kan theih lai.
2. Vawlei ah 1914 thawkin zei hna dah a cang i mi pawl nih zei ziaza hna dah an ngeih?
Jesuh kha a zultu pawl nih hitin an hal: “Na ratnak ding hmelchunhnak le atu chan donghnak ding hmelchunhnak ah zei thil hna dah a um lai?” (Matthai 24:3) Jesuh nih a lehmi hna ah Pathian Pennak Siangpahrang in vancung in a uk hnuah a cang dingmi thil sining kong chimchungbia aa tel. Mah lakah cheukhat cu raltuknak, mangṭam le lihnin hna an si. (Matthai 24:7 rel.) Baibal nih “ni hmanung bik” i mi pawl ngeihmi ziaza ruangah nunnak cu ‘a har’ lai ti zongin a chimchung. (2 Timote 3:1-5) Mah thil sining le ziaza hna cu 1914 thawkin kan hun hmuh.
3. Pathian Pennak nih a uk thawkin vawlei thil sining hna cu zeicah a hun chiat chin?
Pathian Pennak Siangpahrang a si tlawmpal ah Jesuh cu Satan le khuachia pawl he vancung ah ral an i do i Satan cu a sung. Baibal nih “amah cu a vancungmi vialte hna he vawlei ah an thlak hna” tiah a ti. (Biathlam 12:9, 10, 12) Satan cu hrawh ka si cang lai ti kha a hngalh caah a thin a hung tuk. Cucaah vawleicung pumpi ah sifah harnak kha a chuahter. Cucaah vawlei thil sining cu mah tlukin a chiatnak a si. Pathian Pennak nih mah buaibainak vialte kha a tawnghtham dih cang lai.
TAM DEUH IN HLATHLAI
Pathian Pennak nih 1914 in a uk cang ti kha zeitindah kan hngalh khawh timi kong le mah cu kan caah zei sullam dah a ngeih timi kong kha hlathlai.
4. Pathian Pennak nih 1914 in a uk cang ti a langhtermi Baibal chimchungbia hna
Pathian nih Siangpahrang Nebukhadnezzar kha hmailei ah a cang dingmi kong kha a mang ah a rak hmuhsak. Mah mang le Daniel lehmi sullam ningin mah cu Nebukhadnezzar uknak he Pathian Pennak he aa pehtlai.—Daniel 4:17 rel. a
Daniel 4:20-26 rel. Cun hmanthlak kha zoh law a tanglei i biahalnak hna hi phi:
-
(A) Nebukhadnezzar nih a mang ah zeidah a hmuh?—Caang 20 le 21 ah zoh.
-
(B) Thingkung cu zeitindah tuah a si lai?—Caang 23 ah zoh.
-
(C) “Kum sarih” a dih tikah zeidah a cang lai?—Caang 26 ah zoh.
Thingkung Kong Mang Le Pathian Pennak Aa Pehtlaih Ning
CHIMCHUNGBIA (Daniel 4:20-36)
Uknak
(A) Thingkung nganpi
Uknak cahnak
(B) “Thingkung kha hau u” law ‘kum sarih chung liam seh’
Uknak dirh ṭhannak
(C) “Nangmah cu siangpahrang na si ṭhan te lai”
A pakhatnak mah chimchungbia a tlinnak . . .
-
(D) Mah thingkung nih ahodah a aiawh? —Caang 22 zoh.
-
(E) A uknak cu zeitindah a cah?—Daniel 4:29-33 rel.
-
(F) “Kum sarih” a dongh tikah Nebukhadnezzar cungah zeidah a rak cang?—Daniel 4:34-36 rel.
A PAKHATNAK CHIMCHUNGBIA A TLINNAK
Uknak
(D) Babilon Siangpahrang Nebukhadnezzar
Uknak cahnak
(E) BC 606 hnuah Nebukhadnezzar a lung a tlaunak le kum sarih chung uktu a ṭuan lonak
Uknak dirh ṭhannak
(F) Nebukhadnezzar a lung a fim ṭhannak le uktu a ṭuan ṭhannak
A pahnihnak mah chimchungbia a tlinnak . . .
-
(G) Mah thingkung nih ahodah a aiawh? —1 Chanrelnak 29:23 rel.
-
(H) An uknak cu zeitindah a cah? Jesuh vawleicung a um lioah an uknak cu a cat rih ti kha zeitindah kan hngalh khawh?—Luka 21:24 rel.
-
(I) Mah uknak cu zeitikah le khoika ah dah dirh ṭhan a rak si?
A PAHNIHNAK CHIMCHUNGBIA A TLINNAK
Uknak
(G) Pathian uknak a aiawhtu Israel siangpahrang hna
Uknak cahnak
(H) Jerusalem cu hrawh a si, kum 2,520 chung Israel siangpahrang uknak cu a cat
Uknak dirh ṭhannak
(I) Jesuh nih vancung ah Pathian Pennak Siangpahrang in uk hram a thawk
Kum sarih cu zei can dah a rauh?
Baibal caang cheukhat nih a dang Baibal caang hna kha hngalhthiam awkah a kan bawmh. Tahchunhnak ah, Biathlam Baibal ah caan thum le a cheu cu ni 1,260 he aa tluk tiah a ti. (Biathlam 12:6, 14) A sullam cu Baibal chimchungbia chung i kumkhat cu ni 360 he aa tluk tinak a si. Cucaah “kum sarih” cu ni 2,520 he aa tluk. A caan ah Baibal nih nikhat timi bia kha kumkhat in a langhter. (Ezekiel 4:6) Cucaah Daniel Baibal ah langhtermi kum sarih cu kum 2,520 he aa tluk.
5. Vawlei cu 1914 thawkin aa thleng
Jesuh nih Siangpahrang a si tikah vawlei ah zeidah a cang lai timi kong kha a rak chimchung. Luka 21:9-11 rel law mah biahalnak hi i ruah u:
-
Mah Baibal caang chung i zei thil sining dah na hmuh asiloah na theih?
Lamkaltu Paul nih ni hmanung bik ah mi pawl cu zei bantuk minung dah an si lai timi kong kha a chim. 2 Timote 3:1-5 rel law mah biahalnak hi i ruah u:
-
Tuchan ah mi nih mah ziaza hna an ngeihmi kha na hmu maw?
6. Pathian Pennak nih a uk cang ti na zumh kha langhter
Matthai 24:3, 14 rel law mah biahalnak hna hi i ruah u:
-
Zei a biapimi rian nih dah Pathian Pennak nih a uk cang ti kha a langhter?
-
Mah rian ah zeitindah naa tel khawh?
Atu ah Pathian Pennak nih a uk cang i vawleicung pumpi a uk lai caan zong a nai cang. Hebru 10:24, 25 rel law mah biahalnak hi i ruah u:
-
Mah ni cu “a naih deuh chin lengmang” ti kha kan hngalh caah zeidah kan tuah awk a si?
Na hngalhmi thil cheukhat nih midang kha a bawmh khawh hna i an nunnak a khamh khawh hna ti kha na hngalh ahcun zeidah na tuah lai?
MI PAKHAT HALMI: “Jehovah Tehte Hna nih 1914 cu a biapi tukmi kum a si tiah zeicah an chim?”
-
Zeitindah na leh lai?
A TAWINAK
Baibal chimchungbia le vawlei thil sining hna nih atu ah Pathian Pennak nih a uk cang ti kha an langhter. Mah kong kan zumh kha midang sinah kan chimnak thawngin le kan i pumhnak thawngin kan langhter.
I Ruahṭi Ṭhannak
-
Daniel Baibal cauk chungah chimchungmi kum sarih a dongh tikah zeidah a cang?
-
1914 in Pathian Pennak nih a uk cang ti kha zeinihdah aan zumhter?
-
Atu ah Pathian Pennak nih a uk cang ti na zumh kha zeitindah na langhter khawh?
HLATHLAI CHAP
1914 thawkin vawlei thil sining aa thlen ning kong, tuanbialei mifim hna nih an chimmi kong le midang nih an chimmi kong kha hlathlai.
Matthai 24:14 i chimchungbia nih pa pakhat a nunnak a thlen ning kong kha rel.
“Zeidang Vialte Nakin Baseball Celh Kha Ka Duh Bik” (2017, Vennak Innsang No. 2)
Daniel dal 4 i chimchungbia cu Pathian Pennak he aa pehtlaimi a si ti kha zeitindah kan hngalh khawh?
“Pathian Pennak Nih Zeitikah Dah Uk Hram A Thawk? (Ṭhen 1)” (Vennak Innsang capar)
Daniel dal 4 ah langhtermi “kum sarih” cu 1914 ah a dong ti kha zeinihdah a langhter?
“Pathian Pennak Nih Zeitikah Dah Uk Hram A Thawk? (Ṭhen 2)” (Vennak Innsang capar)
a Mah cawn dingmi chung i “Hlathlai Chap” timi ṭhen ah a ummi a donghnak capar pahnih ah zoh.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
