32 NU GÈ NÒ
Boǹ Méné Bàrì A Daamà Togó Gè Bẹ̀l!
Boǹ Méné Bàrì beè dààà togó gè bẹ̀l gbẹá káála mm̀ gbáá 1914. Níà tṍó e dee deè nvée ea di ló bẹbẹ̀l gbò nen beè dààà nàgé togó é. À náàà vaá è nyimá ẽ́? Èé ló bel boo kọ́ọ̀ bùlà Bàrì ea kil ló gbò nú ea gé nááá bàlà booí, nè bé e gbò nen gé lábví láb naa lọ̀l gé mm̀ gbáá 1914 na.
1. Éé ní e kọ́ọ̀ bùlà Bàrì tẹ́lẹ bàlà kẽ ẽ́?
Kpá Dániẹ̀l tẹ́lẹ bàlà kẽ kọọ̀ Boǹ Méné Bàrì é daamà togó gè bẹ̀l tṍó e “àlàbà tṍó” ni íná kùbmà. (Dániẹ̀l 4:16, 17) Gã́bug gbáá aa ló tṍóá, Jíízọ̀s beè ló bel kilma ló áá kà tṍóá kọ à dú “tṍó ea beè dú gè íbá ló nè gbò dóá,” vaá a beè noòmà kọọ̀ tṍóá gáà beè ina kùbmà. (Lúùk 21:24, NW ) Dì belí bé eé beè mòn naa, àlàbà tṍóá beè iná kùbmà mm̀ gbáá 1914.
2. Lọ̀l gé mm̀ gbáá 1914, gbò éé ní ea gé nááá bàlà booí é, vaá gbò nen gé lábví láb naa vàẹ?
Gbò e bà ólò nyoone nvéè Jíízọ̀s beè kọ́ nèe kọọ̀: “Ni kọ́ tṍó e nuí é nááá nèi, vaá ò kọ́ nágé nu ea é zógè tṍó eo é dú nè kùbmà nvéè tṍó nèi.” (Máátìù 24:3) Jíízọ̀s beè gbóó kọ́ gã́bug nú ea é nááá tṍó e ẹlẹ é daamàè togó gè bẹ̀l boo Boǹ Méné Bàrì gbẹá káála. Sìgà nú ea beè kọ àé nááá dú bé gím, kíì gyã́á, nè fùlà kunukẽ̀. (Bugi Máátìù 24:7.) Kpá Káí beè kọ nágé kọọ̀ láb gbò e bàé dí mm̀ “gbò deé e tṍó é gé tà” é náa kọọ̀ dùm á “tàvàlà.” (2 Tímotì 3:1-5) Gbò dìtõ̀ò nè lábví beè palàge dọ bàlà kẽ lọ̀l gé mm̀ gbáá 1914.
3. Éé ní ea náa vaá dìtõ̀ò bàlà booí à kpáá dú pọ́lọ́ lọ̀l gé tṍó e Boǹ Méné Bàrì beè dààmà togó gè bẹ̀l ẹ?
Pọ́ì ńkem̀ tṍó aa ló tṍó e Jíízọ̀s beè dú Méné boo Boǹ Méné Bàrì, a beè bé Sétàn nè gbò zọ gbẹá káála. A beè èlbá Sétàn. Kpá Káí kọ́ọ̀, “ba beè tãa bá [Sétàn] nè dénè pá a gbò nyómá tóm lọl káála uulá kẽ.” (Kùùà Nù 12:9, 10, 12) Nyíè Sétàn gé palàge bììlà boo béè kọ à nyímá kọọ̀ Bàrì é kyọẹ̀ẹ sĩ́. Níà nú ea náa vaá à gé náa kọọ̀ gbò e bà di boo kunukẽ̀í á tení bá nyaa ló nè mòn tã̀àgã̀ ẽ. Vó ní ea náa vaá dìtõ̀ò bàlà booí à palàge dú pọ́lọ́ ẹ́. Boǹ Méné Bàrì é nveè kùbmà ló dénè gbò tã̀àgã̀í.
KPÁÁ NÓ BỌ̀Ọ̀VẸ̀
Nó nú ea náa vaá è nyimá kọọ̀ Boǹ Méné Bàrì beè dààà togó gè bẹ̀l mm̀ gbáá 1914 nè bé ea bọ́ló kọ á tọáí ló naa.
4. Gbò tṍó ea di mm̀ Kpá Káí zógè kọọ̀ Boǹ Méné Bàrì beè dààà togó gè bẹ̀l mm̀ gbáá 1914
Bàrì beè naa kọọ̀ Méné Nèbúkadnezà ea géè bẹ̀l Bábilọ̀n deè kéléá á mòà gyáálá ea zógè nú ea é nááá dì deèsĩ́. Gyááláá nè bé e Dániẹ̀l beè tàb naa zógè kọọ̀ à géè loá bel nyòòmà bẹbẹ̀l Nèbúkadnezà nè Boǹ Méné Bàrì.—Bugi Dániẹ̀l 4:17. a
Bugi Dániẹ̀l 4:20-26, vaá ò tú gbò nú ea di mm̀ tã́à nuá aamai gbò bíbví:
-
(A) Éé ní e Nèbúkadnezà beè mon mm̀ a gyáálá ẹ́?—Ẹ̀b 20 nè 21 gã́bel.
-
(B) Éé ní ea é nááá ló téá ẹ́?—Ẹ̀b 23 gã́bel.
-
(C) Éé ní ea é nááá tṍó e ‘àlàbà tṍóá’ ni íná kùbmà ẽ?—Ẹ̀b 26 gã́bel.
Bé E Gyáálá Ea Kil Ló Téá Lóá Bel Kilma Ló Boǹ Méné Bàrì Naa
KỌ́Ọ̀ BÙLÀ BÀRÌ (Dániẹ̀l 4:20-36)
Bẹbẹ̀l
(A) Gbele gàlà té
Kùbmà zẹ́ẹ́ bã ló bẹbẹ̀la
(B) “Kẽe téá,” vaá ò aa ló kọọ̀ “àlàbà tṍó á tení”
Bẹbẹ̀la kpáá bã kẽ
(C) “Òé kpáá lẹ̀ẹ̀là bel ló o boǹ méné”
Mm̀ túá kà m̀m̀-meè kọ́ọ̀ bùlà Bàrìí . . .
-
(D) Mée ní e téá tõó dọ̀ ẹ?—Ẹ̀b 22 gã́bel.
-
(E) Mó tṍó ní e kùbmà beè zẹ́ẹ́ bã ló a bẹbẹ̀l ẹ?—Bugi Dániẹ̀l 4:29-33.
-
(F) Éé ní ea beè naaá ló Nèbúkadnezà tṍó e ‘àlàbà tṍóá’ ni íná kùbmà ẽ?—Bugi Dániẹ̀l 4:34-36.
TÚÁ TṌÓ EA BEÈ MM-MÁ
Bẹbẹ̀l
(D) Nèbúkadnezà ea dú Méné Bábilọ̀n
Kùbmà zẹ́ẹ́ bã ló bẹbẹ̀la
(E) Tṍó e 606 B.C.E. ni téní, Nèbúkadnezà beè gbóó bọ̀ dáa vaá náa beè láá bẹ̀lnà mm̀ àlàbà gbáá
Bẹbẹ̀la kpáá bã kẽ
(F) Dáa beè tá dẽè Nèbúkadnezà, vaá a beè gbóó kpáá dààmà togó gè bẹ̀l
Mm̀ ní ea égè bàà kà m̀m̀-meè kọ́ọ̀ bùlà Bàrìí . . .
-
(G) Mée ní e téá tõó dọ̀ ẹ?—Bugi 1 Krónikòl 29:23.
-
(H) Mó tṍó ní e kùbmà beè zẹ́ẹ́ bã ló ba bẹbẹ̀l ẹ? Éé ní ea náa vaá è nyimá kọọ̀ kùbmà beè zẹ́ẹ́ bã ló bẹbẹ̀la tṍó e Jíízọ̀s beè di boo kunukẽ̀í ẽ́?—Bugi Lúùk 21:24.
-
(I) Mó tṍó ní e bẹbẹ̀lí beè kpáá bã kẽé, vaá gbẹá ãàe?
NÍ EA ÉGÈ BÀÀ TÓM EA BEÈ MM-MÁ
Bẹbẹ̀l
(G) Gbò méné pá Ízràẹ̀l e bà tõó dọ̀ bẹbẹ̀l Bàrì
Kùbmà zẹ́ẹ́ bã ló bẹbẹ̀la
(H) A beè dú gè kyọ̀sĩ́ Jèrúsalẹ̀m vaá zẹ́ẹ́ nvèè kùbmà ló bẹbẹ̀l gbò méné pá Ízràẹ̀l mm̀ 2,520 gbáá
Bẹbẹ̀la kpáá bã kẽ
(I) Jíízọ̀s daamà togó gè bẹ̀l dú Méné boo Boǹ Méné Bàrì gbẹá káála
Àlàbà tṍóá tóólá kuù gbáá ẹ́?
Sìgà dọ̀ Kpá Káí ólò nvèè bá nèi kọ é dã́tẽ́ ló dõòna kà dọ̀ Kpá Káí. Dì belí nu dòòmà bá, kpá Kùùà Nù kọ́ọ̀ taà tṍó nè báàsĩ́ tóólá 1,260 dee. (Kùùà Nù 12:6, 14) Vóà naa, be ò túù taà tṍó nè báàsĩ́ tẹlẹ ló dõòna kà taà tṍó nè báàsĩ́, àé dú àlàbà tṍó àbèè 2,520 dee. Sìgà tṍó mm̀ Kpá Káí, enè dee ólò loá bel nyòòmà enè gbáá. (Èzíkiẹ̀l 4:6) Níà bé ea dú gè bugi àlàbà tṍó ea di mm̀ kpá Dániẹ̀la naa ẽ́—à tóólá 2,520 gbáá.
5. Bàlà booí beè nyaaá lọ̀l gé mm̀ gbáá 1914
Jíízọ̀s beè kọ́ gbò nú ea é nááá bàlà booí lọl tṍó e ẹlẹ é dúè Méné. Bugi Lúùk 21:9-11, vaá ò gbóó aalai nakà bíbví:
-
Mókà gbò dìtõ̀òí ní eo ni mon àbèè ge dã́ nú ea kil ló é?
Neǹ tóm Pọ́ọ̀l beè baatẽ́ bé e gbò nen é lábví láb naa mm̀ gbò deé e tṍó é gé tà. Bugi 2 Tímotì 3:1-5, vaá ò gbóó aalai nakà bíbví:
-
Mókà gbò lábví ní eo ni mon mm̀ gbò nen deè nieí é?
6. Gè kọọ̀ Boǹ Méné Bàrì gé bẹl bọ́ló kọ á sièi kpóó ló
Bugi Máátìù 24:3, 14, vaá ò gbóó aalai gbò bíbví:
-
Mókà tóm ea palàge dú bíi ní ea zógè kọọ̀ Boǹ Méné Bàrì dì ea gé bẹl kátogóí é?
-
Mósĩ́ deè ní eo é láá sí nakà tómí ẽ́?
Boǹ Méné Bàrì dì ea gé bẹl kátogóí, vaá tṍó ea é lẹẹlà bel ló dénè nú ea gé nááá boo kunukẽ̀í a íná kuló. Bugi Híbrù 10:24, 25, vaá ò gbóó aalai nakà bíbví:
-
Éé ní ea bọ́ló kọọ̀ buù bẹ̀ì é naa kátogóí e moǹ kọọ̀ deeá a dũuà “iná ku ló” é?
Be ò nyímà nú ea é láá nvèè bá nè gbò nen vaá kpènà ba dùm, éé ní eo é náa ẽ́?
NEN É LÁÁ BĨINÁ KỌỌ̀: “Éé ní ea náa vaá Gbò Neǹ Ditõ̀ò Jìhóvà ólò bọọgẹ̀ ló bel ea kil ló gbáá 1914 ẽ?”
-
Òó láá aalá naa vàẹ?
NÚ E NI NÓ
Kọ́ọ̀ bùlà Bàrì, gbò tṍó e Kpá Káí kọ́ nú ea kil ló, nè gbò nú ea gé nááá bàlà booí zógè kọọ̀ Boǹ Méné Bàrì dì ea gé bẹl kátogóí. È zógè kọọ̀ è zigà naa vó tení dú ló gè olòó kọ́ kpẹ̀a nè ge sí nònù.
Ge Òòa Boo
-
Éé ní ea beè naaá tṍó e àlàbà tṍó e kpá Dániẹ̀l beè kọ́ nú ea kil lóá íná kùbmà ẽ?
-
Éé ní ea náa kọ ó àgala boo kọọ̀ Boǹ Méné Bàrì beè dààà togó gè bẹ̀l mm̀ gbáá 1914 ẽ?
-
Mósĩ́ deè ní eo é láá zogè kọ ò agàlàẹ̀ boo kọọ̀ Boǹ Méné Bàrì dì ea gé bẹl kátogóí é?
KPÁÁ GBĨ́ TẼ́ LÓ
Nyimá nú e gbò e bà ólò emí nú ea kil ló nú ea beè naaá, nè nú e dõòna gbò kọ́ ea kil ló bé e dìtõ̀ò bàlà booí gé nyááá naa lọ̀l gé mm̀ gbáá 1914.
Bugi nú ea kil ló bé e kọ́ọ̀ bùlà Bàrì ea di mm̀ kpá Máátìù 24:14 beè nyaaná dùm ene kà gbálà naa.
“I Loved Baseball More Than Anything!” (Kpá Tọ Kùdẽe Ló No. 3 2017)
Éé ní ea náa vaá è nyimá kọọ̀ kọ́ọ̀ bùlà Bàrì ea di mm̀ kpá Dániẹ̀l 4 togó lóá bel kilma ló Boǹ Méné Bàrì e?
“When Did God’s Kingdom Begin Ruling? (Part 1)” (Kpá Tọ Kùdẽe Ló, October 1, 2014)
Éé ní ea zógè kọọ̀ “àlàbà tṍó” ea di mm̀ kpá Dániẹ̀l 4 togóá beè iná kùbmà mm̀ gbáá 1914 ẽ?
“When Did God’s Kingdom Begin Ruling? (Part 2)” (Kpá Tọ Kùdẽe Ló, November 1, 2014)
a Bugi Kpá Tọ Kùdẽe Ló e bà kólí mm̀ bàà kà dee deè nvéè kpò ea di kè kẽè Kpáá Gbĩ́ Tẽ́ Ló mm̀ nakà nu gè nòí.
