SOMO LYA 32
Obwami bwa Mungu Yibwarhegeka!
Obwami bwa Mungu bwarhonderaga kurhegeka omu 1914. Amola mango yi n’esiku zizinda z’oburhegesi bw’abantu zarhonderaga. Bichi birhuyerekere oku ntyo kubili? Rhulole obulebi bwe Biblia, ehali zarhengerere, n’engeso z’abantu; bili byabonekana bwinja kurhenga omu mwaka gwa 1914.
1. Bichi obulebi bwe Biblia buyerekene?
Echitabu cha Daniyeli ch’omu Biblia chiyerekene ok’Obwami bwa Mungu bwakarhondere kurhegeka oku buzinda bw’esiku ziyirikirwe “bihe mushanvu.” (Danieli 4:16, 17) Amagana m’emyaka enyuma w’aho, Yesu ashuba kuyirika ezola siku “bihe by’amashanja byahirirweho,” anayigiriza oku birhaliza kuhwa mw’amola mango. (Luka 21:24) Nk’okurhwabona, ebyola bihe mushanvu byahwaga omu 1914.
2. Bichi Byabere, na ngeso zihe z’abantu zabonekene bwenene kurhenga 1914?
Entumwa za Yesu zalilonzeze zimenye amango Obwami bwakarhondere kurhegeka n’amango esiku zizinda zakarhondere. Bamubaza: “Bichi nji chaba chimenyeso ch’okubaho kwawe, n’obuzinda bw’elila gulu?” (Matayo 24:3) Omu kubashubiza, Yesu aderha bintu binene byalikwanene birhengerere, amango akarhondere kurhegeka omu mbingu nka Mwami w’Obwami bwa Mungu. Ebyaderhaga bihirirwe mw’evita, echibula ch’ebilyo, n’emisisi y’egulu. (Osome Matayo 24:7.) Ebiblia yalishubire kuba yaderha okw’engeso abantu bakagwarhire omu “siku zizinda” zakarhumire akalamo ‘kakomera oku kalembera.’ (2 Timoteo 3:1-5) Ezola hali, n’engeso z’abantu zabonekene bwenene kurhangira omu 1914.
3. Nka gurhe ebintu byakaja byabiha bwenene kurhangira Obwami bwa Mungu burhondera kurhegeka?
Omu kucha bufi, Yesu anamalire kuba Mwami w’Obwami bwa Mungu, alwa evita na Shetani n’abazimu bage. Shetani ahimwa. Ebiblia ederhere oku “akabulwa oku gulu, na bamalayika bage haguma naye.” (Ufunuo 12:9, 10, 12) Shetani akalihire bwenene bulala ayinji okw’alimbulwa. Che chirhumire ali alerhera abantu amalumwa n’amalibuko oku gulu lyoshi. Nta ngangane, ebintu byabihire bwenene! Obwami bwa Mungu bwamala ebyola bibazo byoshi.
HUMBA BWENENE
Lola ebirhuyerekere ok’Obwami bwarhonderaga kurhegeka omu 1914 na bibichi byakakumalira.
4. Oluganjo lw’ebihe luyimangire oku bulebi bwe Biblia luyerekene ok’Obwami bwa Mungu bwarhonderaga kurhegeka omu 1914
Mungu alilorheseze Mwami Nebukadeneza w’omu Babiloni ya mira ebilorho by’obulebi. Ebyola bilorho n’amafasiriyo mabyo Daniyeli ahaanaga byalilolere oburhegesi bwa Nebukadeneza n’Obwami bwa Mungu.—Osome Danieli 4:17. a
Osome Danieli 4:20-26, naho okolese etabulo eyerekenwe oku paje ekulikire, omu kushubiza kw’ebila bibazo:
-
(A) Bichi Nebukadeneza alibwene omu bilorho byage? (Olole omustari gwa 20, 21.)
-
(B) Bichi byalikwanene bihikire ogola murhi? (Olole omustari gwa 23.)
-
(C) Bichi byakahikire oku buzinda bw’ebyola “bihe mushanvu”? (Olole omustari gwa 26.)
Okuntu ebilorho by’omurhi bibuganene n’Obwami bwa Mungu
OBULEBI (Danieli 4:20-36)
Oburhegesi
(A) Omurhi guzibuzibu
Oburhegesi bwachikizwa
(B) “Mukube omurhi,” munaleke “bihe mushanvu bigere”
Obwami bwamashuba kugalulwa
(C) “Obwami bwawe nji bwashuba kukugalukira”
Okuyenera k’oburhanzi k’obula bulebi . . .
-
(D) Omurhi gwalishushanyize nde? (Olole omustari gwa 22.)
-
(E) Gurhe obwami bwage bwalichikizwe? (Osome Danieli 4:29-33.)
-
(F) Gurhe byaliberere Nebukadeneza oku buzinda bwa “bihe mushanvu”? (Osome Danieli 4:34-36.)
OKUYENERA K’OBURHANZI
Oburhegesi
(D) Nebukadeneza, Mwami we Babiloni
Oburhegesi bwachikizwa
(E) Enyuma w’omwaka gwa 606 M.K.Y., Nebukadeneza asireha aba eyi arhakachigala kurhegeka myaka mushanvu nk’okurhunaganja emyaka
Obwami bwamashuba kugalulwa
(F) Nebukadeneza afuma ashuba rhondera kurhegeka
Okuyenera kwa kabiri k’obula bulebi . . .
-
(G) Bande ogola murhi gushushanyize? (Osome 1 Mambo ya Nyakati 29:23.
-
(H) Gurhe oburhegesi bwabo bwachikiraga? Bichi birhuyerekere oku bwanalichichikire amango Yesu aliri oku gulu? (Osome Luka 21:24.
-
(I) Mangochi na ngahe obola burhegesi bwashubire kugalulwa?
OKUYENERA KWA KABIRI
Oburhegesi
(G) Abami be Izraeli baliri barhumwa b’oburhegesi bwa Mungu
Oburhegesi bwachikizwa
(H) Yerusalemu yalimbulwa n’echola chachikiza omukololo gw’abami be Izraeli mu myaka 2520
Obwami bwamashuba kugalulwa
(I) Yesu amarhondera kurhegeka nka Mwami w’Obwami bwa Mungu
Ebyola bihe mushanvu biherhe bule bungana gurhe?
Bigabi biguma bye Biblia binarhurhabala kuyunva ebindi bigabi. Omufano, echitabu cha Ufunuo chiderhere ku bihe bisharhu n’enusu biherhe siku 1 260. (Ufunuo 12:6, 14) Bihe mushanvu kuli kukuba kabiri olola luganjo, zanaba siku 2 520. Hali okwe Biblia enakolesa olusiku omu kuderha omwaka. (Ezekieli 4:6) Intyo kubili oku bilolere obulebi bwa Daniyeli buderheere bihe mushanvu nabo —bihinganire myaka 2 520.
5. Egulu lyahindamukire kurhenga omu 1914
Yesu alibere aderha ebyakabonekene oku gulu ayusa kuba Mwami. Osome Luka 21:9-11, muje mwaganira kw’echila chibazo:
-
Ihali zihe ziguma mw’ezila wachibwenere, changwa wayunvirhe?
Entumwa Paulo alifasiriye engeso abantu bakagwarhire omu siku zizinda z’oburhegesi bw’abantu. Osome 2 Timoteo 3:1-5, muje mwaganira kw’echila chibazo:
-
Ngeso zihe mw’ezila onabona omu bantu zene?
6. Oburhegesi bw’Obwami bwa Mungu bunarhushunika oku bijiro
Osome Matayo 24:3, 14, muje mwaganira kw’ebila bibazo:
-
Kasi kahe k’akamaro bwenene kayerekene k’Obwami bwa Mungu yi bwarhegeka?
-
Gurhe nawe wakagwasa kw’akola kasi?
Obwami bwa Mungu buli bwarhegeka, n’olusiku bwarhondera kurhegeka egulu lyoshi luli hofi. Osome Waebrania 10:24, 25, muje mwaganira kw’echila chibazo:
-
Bichi buli muguma werhu akwanene kujira “nk’okurhuli rhwabona olusiku lwayegereza”?
Nka hali echintu wayunvirhe chakarhabala awo chakayokola abandi, wakachiyunva oku bikuhemere ojire gurhe?
HALI OWAKABAZA: “Chirhuma Abahamirizi ba Yehova banaderha bwenene oku mwaka gwa 1914?”
-
Bichi wakamubwira?
OKU BUGEKE
Obulebi bwe Biblia, oluganjo lw’ebihe (chronologie), n’ehali zili omu gulu biyerekene oku kweri Obwami bwa Mungu yibwarhegeka. Rhunayerekana oku rhuchizerere ntyo omu kuhubiri, n’okuhika oku mbuganano z’echibaga.
Rhuchiyibusye
-
Bichi byalibere oku buzinda bwa bihe mushanvu biderherwe omu chitabu cha Daniyeli ch’omu Biblia?
-
Bichi bikuyemezeze ok’Obwami bwa Mungu bwarhonderaga kurhegeka omu 1914?
-
Gurhe wakayerekana ok’ochizerere k’Obwami bwa Mungu yibwarhegeka?
EYINDI MYAZI
Lola eby’abanayandika engani, n’abandi bantu baderhere oku bilolere ebyahindamukire omu gulu kurhangira omu mwaka gwa 1914.
Lola gurhe obulebi buli omu Matayo 24:14 bwahindamulaga akalamo ka mulume muguma.
“Nalisimire Amasharha m’Akabumbu ke Baseball Kulusha Byoshi!” (Omunara g’Omulanzi Ni. 3,2017)
Bichi birhuyerekere ok’obulebi buli omu Danieli sura 4 buderheere Obwami bwa Mungu?
Bichi biyerekene oku “bihe mushanvu” biderherwe omu Danieli sura 4 byahwaga omu 1914?
a Olole myazi ebiri y’obuzinda omu chigabi “Eyindi Myazi” mulinola Somo.
