AJUMTALÁB 32
¡In Eyaltal a Dios kʼwajatits ti abatnom!
Ti 1914, in Eyaltal a Dios tujey ti abatnom ti éb. Al nixéʼ xi támub, jayej tujey in taltal a kʼicháj abal an eyalchik tu ku abatnaʼ. ¿Jaleʼ ti ulal abal játs antsanáʼ? Xowéʼ, neʼets ki exóbnaʼ jawaʼ in uluw an Biblia abal neʼetsak ka tujey ti tejwamél ti 1914 ani jawaʼ an atiklábchik neʼetsak kin tʼajaʼ.
1. ¿Jantʼoj in okʼxidh uluw an Biblia abal neʼetsak ka watʼey?
An Biblia in okʼxidh ólnaʼ abal in Eyaltal a Dios neʼetsak ka tujey ti abatnom tin taltal an «buk i kʼij» (Daniel 4:16, 17). Yan i támub talbél, a Jesús in uluw abal axéʼ xi bukʼ i kʼij, pelak an kʼij tam kʼeʼat i eyalchik neʼetsak ti abatnom, jayej in uluw abal axéʼ xi kʼij yabayej u talélak (Lucas 21:24). Neʼets ki exóbnaʼ abal axéʼ xi buk i kʼij taley ti 1914.
2. ¿Jantʼoj kʼwajinek ti tejwamél ma ti 1914 ban xeʼtsintaláb, ani kʼal an atiklábchik?
In aykolil a Jesús in léʼak kin exlaʼchik jaykʼiʼ ti neʼetsak ka tujey ti abatnom in Eyaltal a Dios ani in taltal an xeʼtsintaláb. Jaxtám in konoychik: «¿Jantʼoj tam tsuʼbixtaláb ki aychij, abal ki exlaʼ max dhubat neʼets ka taley an xeʼtsintaláb?» (Mateo 24:3). Tam, a Jesús in tujchij kin ólchichik abal neʼetsak ka tejwaméj yan jantʼoj ban xeʼtsintaláb, tam kin tujchij ti abatnom ti éb, in Eyaltal a Dios. Ejtíl, in uluw abal neʼetsak ka waʼtsin i jayil, i pextaláb ani abal neʼetsak ka tʼeleláts an Tsabál (ka ajiy Mateo 24:7). An Biblia biyálits in ulumal abal tam weʼits «ka taley an xeʼtsintaláb», an atiklábchik neʼets ka más pojkaxméj. Nixéʼ neʼetsak kin tʼajaʼ abal «ka waʼtsin yan i kʼibataláb» (2 Timoteo 3:1-5). Ma ti 1914, an atiklábchik lej jalkʼunének ani lej waʼtsinének i kʼibataláb.
3. ¿Jaleʼ ti lej waʼtsinének i kʼibataláb ban Tsabál, ma ti tujey ti abatnom in Eyaltal a Dios?
Wéʼ talbél ti tujey ti eyal a Jesús tin Eyaltal a Dios, waʼtsin jun i pextaláb ti éb, jajáʼ pejéxin kʼal a Satanás ani kʼal an demonios. An Biblia in ulal abal a Satanás in kʼibaʼ, «ani tʼajat jólowat Tsabál [jajáʼ] ani axi pojkax an ángelchik» (Apocalipsis 12:9, 10,12). A Satanás xeʼets watʼadh tsakúl kom in exlál abal wéʼits neʼets ka talabedháj. Jaxtám, kʼwajat in tʼajál abal an atiklábchik axi tin puwél an Tsabál kin yajchiknaʼ. Waʼats yan i kʼibataláb, pero in Eyaltal a Dios wéʼits neʼets kin talabédhaʼ.
ABAL KA EXÓBNAʼ MÁS
Ki tsuʼuw jantʼoj in tejwamedhál abal in Eyaltal a Dios tujey ti abatnom ti 1914. Jayej ki exóbnaʼ jantʼoj in tomnál ki tʼajaʼ wawáʼ.
4. An Biblia tu tejwamédhanchal jawaʼ watʼey ti 1914
A Jehová in tʼajaʼ abal jun i tsʼalej axi ti Babilonia, axi in bij Nabucodonosor, kin wáchibnaʼ jantʼoj axi neʼetsak ka watʼey. A Daniel, in ólnaʼ abal nixéʼ xi wáchib neʼetsak ka putun kʼal in eyaltal a Nabucodonosor ani kʼal in Eyaltal a Dios (ka ajiychik Daniel 4:17). a
Ka ajiychik Daniel 4:20-26, ani talbél ka eyendhaʼchik an diagrama abal ka tókʼtsiy axéʼ xi konowixtalábchik:
-
A) ¿Jantʼoj in wáchibnaʼ a Nabucodonosor? (Ka exóbnaʼchik an versículos 20 ani 21.
-
B) ¿Jantʼoj neʼets ka watʼey kʼal an teʼ? (Ka exóbnaʼchik an versículo 23.
-
C) ¿Jantʼoj neʼetsak ka watʼey tam ka pútunits «an buk i kʼij»? (Ka exóbnaʼchik an versículo 26.
An teʼ axi in wáchibnaʼ a Nabucodonosor ani in Eyaltal a Dios
AN KʼEJ KAW (Daniel 4:20-36)
Jun i eyal
A) Jun i teʼ axi lej tʼekʼat
An eyal in jilál ti abatnom
B) «Ka kótoychik an teʼ» ani «ka jilaʼ antsanáʼ buk i kʼij»
An eyal in áynanchal ti abatnom
C) «Neʼets kit wíchbanchat a éy»
Tam ti kʼaʼál putun an kʼej kaw:
-
D) ¿Jitaʼ u tʼipoyáb kʼal an teʼ? (Ka exóbnaʼchik an versículo 22.
-
E) ¿Jaykʼiʼ tin jilaʼ ti abatnom? (Ka ajiychik Daniel 4:29-33).
-
F) ¿Jantʼoj watʼey kʼal a Nabucodonosor tam ti putun an «buk i kʼij»? (Ka ajiychik Daniel 4:34-36).
TAM TI KʼAʼÁL PUTUN AN KʼEJ KAW
Jun i eyal
D) A Nabucodonosor, an tsʼalej axi ti Babilonia
An eyal in jilál ti abatnom
E) Talbél kʼal an támub 606 a.e.c., b a Nabucodonosor ólman ani in jilaʼ ti abatnom buk i támub
An eyal in áynanchal
ti abatnom
F) A Nabucodonosor tsalpan ani wichiy juníl ti abatnom
Tam ti tsabchíl putun an kʼej kaw:
-
G) ¿Jitaʼchik u tʼipoyáb kʼal an teʼ? (Ka ajiychik 1 Crónicas 29:23).
-
H) ¿Jaykʼiʼ tin jílaʼchik ti abatnom? ¿Jaleʼ ti exlál abal yab kʼwajatak ti abatnom, tam ti a Jesús kʼwajiy tejéʼ ti Tsabál? (Ka ajiychik Lucas 21:24).
-
I) ¿Jaykʼiʼ ti neʼetsak ka waʼtsin kʼeʼat i eyal ani juʼtáj ti neʼetsak ti abatnom?
TAM TI TSABCHÍL PUTUN AN KʼEJ KAW
Jun i eyal
G) I eyal axi ti Israel axi in tʼipoyalak in Eyaltal a Dios
An eyal in jilál ti abatnom
H) A Jerusalén talabedháj; yab waʼtsin i eyal al 2.520 i támub
An eyal in áynanchal
ti abatnom
I) A Jesús in tujchij ti abatnom ti éb tin Eyaltal a Dios
¿Jay neʼetsak ka owey an buk i kʼij?
Talchik i pejach axi ti Biblia tu tólmiyal ki exbay kʼeʼat i pejach. Jun i tʼiplab, ti Apocalipsis in ulal abal ox i kʼij kʼal tsʼejel pel 1.260 a kʼicháj (Apocalipsis 12:6, 14). Tam, buk i kʼij pel 2.520 a kʼicháj. An Biblia, junchikíl in ulal abal jun a kʼicháj in tʼipoyal jun i támub (Ezequiel 4:6). An kʼej kaw axi kʼwajat ban libro in kʼál a Daniel, axi u kaw tin kwéntaj an buk i kʼij, in tʼipoyal 2.520 i támub.
5. Ti 1914 lej jálkʼun an xeʼtsintaláb
A Jesús in uluw jantʼoj neʼetsak ka watʼey ban xeʼtsintaláb talbél tam jajáʼ kin tujchij ti abatnom. Ka ajiychik Lucas 21:9-11 ani ka tsálpaychik kʼal axéʼ:
-
Kʼal jawaʼ in ulal axéʼ xi versículos, ¿jantʼoj a tsuʼumal o a atsʼámal abal kʼwajat ti watʼel?
An abatwálej Pablo in dhuchaʼ jantʼiniʼ ti neʼetsak ka xeʼtsin an atiklábchik tin taltal an xeʼtsintaláb. Ka ajiychik 2 Timoteo 3:1-5 ani ka tsálpaychik kʼal axéʼ:
-
Kʼal jawaʼ in ulal axéʼ xi versiculos, ¿jantʼoj a tsuʼumal abal in tʼajál an atiklábchik?
6. Ka tejwamédhaʼ abal a belál abal in Eyaltal a Dios kʼwajatits ti abatnom
Ka ajiychik Mateo 24:3, 14 ani ka tsálpaychik kʼal axéʼ:
-
¿Jantʼoj tam tʼojláb in tejwamedhál abal in Eyaltal a Dios kʼwajat ti abatnom?
-
¿Jantʼiniʼ a éjtowal ki tólmixin kʼal axéʼ xi tʼojláb?
In Eyaltal a Dios kʼwajatits ti abatnom, ani lej wéʼits neʼets kin abatnaʼ patal an Tsabál. Ka ajiychik Hebreos 10:24, 25 ani ka tsálpaychik kʼal axéʼ:
-
¿Jantʼoj in tomnál ki tʼajaʼ «kom wéʼits neʼets kin bajuw a kʼicháj»?
Max tatáʼ a exlálak jantʼoj axi in éjtowal kin kʼaninchij in ejatal kʼeʼat i atikláb, ¿jantʼoj neʼets ka tʼajaʼ?
JAWAʼ TALCHIK WALÁM TI KONOY: «¿Jaleʼ ti an ólchixchik kʼal a Jehová u lej kaw tin kwéntaj an támub 1914?».
-
¿Jantʼoj neʼets ka uchaʼ?
JAWAʼ I EXOBNÁMAL
Patal jawaʼ u watʼel xowéʼ, in tejwamedhál abal an kʼej kaw axi ti Biblia kʼwajatits ti putnal ani abal in Eyaltal a Dios kʼwajatits ti abatnom. Wawáʼ i lej belál axéʼ, jaxtám u ólnom ani u kʼalel ti tamkuntaláb.
Ki tʼilaʼ jawaʼ i exóbnaʼ
-
¿Jantʼoj watʼey tam ti putun an buk i kʼij axi in olnál an libro in kʼál a Daniel?
-
¿Jaleʼ ta lej belál tatáʼ abal in Eyaltal a Dios tujey ti abatnom ti 1914?
-
¿Jantʼiniʼ a éjtowal ka tejwamédhaʼ abal a lej belál abal in Eyaltal a Dios kʼwajatits ti abatnom?
KA EXÓBNAʼ JANTʼOJ ÍT
Ka tsuʼuw abal talchik i atikláb axi exoblámadh, in ulal abal an xeʼtsintaláb lej jalkʼunének ma ti 1914.
Ka tsuʼuw jantʼiniʼ ti jálkʼunchat in ejatal jun i inik, tam ti in exbay jantʼiniʼ ti kʼwajat ti putnal Mateo 24:14.
¿Jaleʼ ti exlál abal an kʼej kaw axi kʼwajat ti Daniel capítulo 4, u kaw tin kwéntaj in Eyaltal a Dios?
«¿Jaykʼiʼ ti tujey ti abatnom in Eyaltal a Dios? (Kʼaʼál pejach)» (La Atalaya, 1 de octubre de 2014)
¿Jantʼoj in tejwamedhál abal an «buk i kʼij» taley ti putnal ti 1914?
a Ka ajiy tsablom an artículos axi kʼwajat tin taltal an pejach «Ka exóbnaʼ jantʼoj ít».
b I eyendhál an kaw a.e.c. abal ki ólnaʼ jawaʼ watʼey okʼxidh ka waʼtsin a Cristo. Ani i eyendhál an kaw e.c. abal ki ólnaʼ jawaʼ watʼey talbél ti waʼtsin a Cristo.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
