Ịpyị-Adịrahụ nya Ohe dọmwụ nyọka kpeji e-epwoohe la ẹka nya 1914. Ẹka ọwẹ, ahyẹẹnụ ihyẹẹkpẹ nya eji ọkpakpa nya angịnyị ehe à dọmwụ ịnyịnyị lẹ. Ahị tị́ họ ányị kahị jẹ́? Ahị wẹẹ ka kụ ẹhị yẹ ọmwụ ọyẹyẹ ịlẹpwụ nya ịBayịbụụ, ang ọlẹ kọ jam họ odehe bala abwẹla nya angịnyị, dọmwụ bwu ẹka nya 1914.

1. Ányị ịBayịbụụ à tị́ yọmwụ?

Ụpwụ nya ịDanẹlụ mẹjẹ nyori Ịpyị-Adịrahụ nya Ohe nyị ka dọmwụ nya eji ọkpakpa kori ká ụka ọlẹ kị wụrụ nya “ẹka irwiye” á chịpwụrụ kpá. (ỊDanẹlụ 4:16, 17) Ẹka ohu ịmanyị tị́ ẹ-ẹkpẹ nya ọọwa, iJisọsị wụrụ ụka ọwọwa nya ‘ụka nya eji ọkpakpa nya ala iJentayịlị,’ ọ tị mẹjẹ nyori ụka ọọwa á cheju la oyi nyamwụ lẹka. (ILuku 21:24) Jaabwọ kahị wẹẹ ka yẹ, ụka nya ẹka irwiye ọwẹ cheju la 1914.

2. Ịyẹ à tị́ wẹẹ họ odehe bwu ẹka nya 1914? Ányị abwẹla nya angịnyị à tị́ la?

Angịjụgbẹyị nya iJisọsị tọọ wo yẹkẹẹ: ‘Ịịyẹ a tị́ ka ri ang o-ju ẹjẹẹ ọlẹ kahị ka kpa jẹ́ ụka nya ọwẹwẹ nyang bala ụka ọlẹ ká ọmyịmyị nya odehe ọlẹ ka pwụ eji?’ (ỊMatiyu 24:3) IJisọsị waa bwula ọ-yọmwụ u-uhye nya ang lụmẹ-lụmẹ ịlẹ kị ka họ ụka kọ dọmwụ nya eji ọkpakpa e-epwoohe. Ang ịhyẹ ịlẹ kị ka họ ri ẹwụ ọdada, imyi nya uhi, bala ọpyị ọ-hụ́ jigi-jigi. (Wa ịMatiyu 24:7.) ỊBayịbụụ ya ịnyịnyị nyori “lụka ohyẹẹkpẹ,” ọhịhị nyị ka ‘lujwo’ ọọlajị nya abwẹla nya angịnyị. (2 iTimoti 3:1-5) Iwe-ahụrụ bala abwẹla ịtịpyọ ịwẹ kụ ehe gụ olene dọmwụ bwu ẹka nya 1914.

3. Ịyẹ tị́ du ká odehe tịpyọ ị-ịlẹ bwu ụka ọlẹ ká Ịpyị-Adịrahụ nya Ohe dọmwụ nya eji ọkpakpa?

Ụka ká iJisọsị ri Adịrahụ nya Ịpyị-Adịrahụ nya Ohe bwaa, ọ dẹwụ ta Ohe Onyobyi bala alegu inyibyi ụ-ụwa e-epwoohe. Ọ kụrụ Ohe Onyobyi. ỊBayịbụụ ya nyị “chị ịdịragọn ọọwa abwọ bwu uhye da warị wẹ odehe ọlẹ bala alegu-ẹrụ nyamwụ.” (Ọwụrụụ-wụrụ 12:9, 10, 12) Ohe Onyobyi wẹẹ ju agbama ọtụka-ọtụka chajị ọ jẹ́ nyori nyị ja tọwa ayịreji. Lẹ ọ wẹẹ ju ọmwụ nya ajụjụ bala akama ụpa nya odehe wuu lẹẹlẹẹ. Ọwẹ dahị ụbwọ nyọka jẹ́ ang odudu ká iwe-ahụrụ nya odehe tịpyọ ịịlẹ! Ịpyị-Adịrahụ nya Ohe tị ka chị akama ịwẹ wuu eju.

 JẸ́ GỤ ỌỌWA

4. Ang ọ-kụ achụ bwu ọmwụ ọyẹyẹ ịla ịBayịbụụ mẹjẹ nyori Ịpyị-Adịrahụ nya Ohe dọmwụ nya eji ọkpakpa la 1914

Ọ-họ jịra ọhọhẹ

• (D) Okoji ọwẹ tị́ ku ọmwakpa nya owo?—Yẹ ọgba 22.

• (E) Ányị ọ tị́ ba la o-kpeji lụka o-kpii?—Wa ịDanẹlụ 4:29-33.

• (F) Ịyẹ à tị́ họ ta iNebukadinesa la ocheju nya “ẹka irwiye”?—Wa ịDanẹlụ 4:34-36.

Ọ-họ jịra oheeye

• (G) Okoji ọwẹ tị́ ku ọmwakpa nya owo anyị?—Wa 1 Ego Ogbegbe 29:23.

• (H) Ụka oyina ị tị́ ba la eji ọkpakpa nyaa? Ahị tị́ họ ányị kahị jẹ́ nyori ị-ịwa à kpeji ụka ká iJisọsị jam odehe ka?—Wa iLuku 21:24.

• (I) Lụka oyina eji ọkpakpa nyaa à tị́ wẹ ka yeji myịmyị? Ale tị́?

 6. Eji ọkpakpa nya Ịpyị-Adịrahụ nya Ohe ka guhi gbịla nyọka họ ụkụrwọ

Wa ịMatiyu 24:3, 14, kanụ ya ẹla u-uhye nya ịtọ ẹla ịlẹ:

• Ụkụrwọ ọkpọnchị oyina à tị́ mẹjẹ nyori Ịpyị-Adịrahụ nya Ohe wẹẹ kpeji lẹ?

• Ányị a tị́ ka bwu la ụbwọ ẹ-ẹpwụ nya ụkụrwọ ọwẹ?

Ịpyị-Adịrahụ nya Ohe wẹẹ kpeji lẹẹlẹẹ lẹ, ọ tị hi pyịnyẹng kọ ka ye odehe wuu kpa lẹ. Wa Ala iHiburu 10:24, 25, kanụ ya ẹla u-uhye nya ịtọ ẹla ọlẹ:

• Ịyẹ ahị wuu à tị́ ka họ nyọlẹ kahị “yẹ, jaabwọ ká ẹnụtụrụ [ọwẹ wẹẹ] ju chwẹẹ”?

 ẸLỊYẸ A TỊ́ JẸ́?

Ọmwụ ọyẹyẹ ịla ịBayịbụụ, ang ọ-kụ achụ bwu ẹpwụ nyaa, bala iwe-ahụrụ nya odehe mẹjẹ nyori Ịpyị-Adịrahụ nya Ohe wẹẹ kpeji lẹ. Ahị kaa mẹjẹ nyori ahị myị ju ẹlẹwẹ bwula o-ya je angịnyị bala ọ-ka ọjịra-jịra.

Ẹlịyẹ A Tị́ Yụbwọ Chị?

• Ẹlịyẹ à tị́ họ la ocheju nya ẹka irwiye ọlẹ ká ụpwụ nya ịDanẹlụ yọmwụ u-uhye nyamwụ?

• Ịyẹ tị́ du ká jẹ́ myị̀myị̀ nyori Ịpyị-Adịrahụ nya Ohe dọmwụ nya eji ọkpakpa la 1914?

• Ányị a tị́ ka bwu mẹjẹ nyori à myị nyori Ịpyị-Adịrahụ nya Ohe wẹẹ kpeji lẹẹlẹẹ?