LYNNONG 32
Ka Hima U Blei ka la Synshar Mynta!
Ka Hima U Blei ka la sdang ban synshar ha bneng naduh u snem 1914. Dei ha une u snem ba la sdang ruh ki sngi bakhatduh. Kumno ngi tip ïa kata? Peit ïa ki jingïathuhlypa ba la thoh ha ka Baibl shaphang ki jingjia ha pyrthei, bad kumno ki briew ki long naduh u snem 1914.
1. Ki jingïathuhlypa jong ka Baibl ki thew ïa kaei?
Ka kitab u Daniel ka pyni ba ka Hima U Blei kan sdang ban synshar ha kaba kut jong ka por ba khot ki “hynñiew ki aïom.” (Daniel 4:16, 17) Da ki spah snem hadien, u Jisu u la ong ïa kane kajuh ka por kum “ka ïa ki Jentil,” bad u la batai ruh ba kane ka ïa ka khlem pat kut. (Loukas 21:24) Kumba ngin sa ïa peit, kita ki hynñiew ki aïom ki la kut ha u snem 1914.
2. Naduh u snem 1914 la jia aïu ha ka pyrthei bad kumno ki briew ki long?
Ki synran u Jisu ki la kylli ïa u: “To ïathuh ha ngi, lano ba kine kiei kiei ruh kin long? Bad kaba kumno ka dak ka jingdon jong me, bad kaba wai noh kane ka pyrthei?” (Mathaïos 24:3) U Jisu u la jubab da kaba ïathuhlypa ba kin don shibun kiei kiei kiban sa jia hadien ba un sdang ban synshar kum u Syiem ka Hima U Blei ha bneng. Kita ki kynthup ïa ki thma, ka jingkyrduh bam, bad ki jingkhynñiuh jumai. (Pule Mathaïos 24:7.) Ka Baibl ka ïathuhlypa ruh ba “ha ki sngi kiba khatduh, kin wan ki por bashitom” namar ka jinglong jong ki briew. (2 Timothi 3:1-5) Ka jinglong jingman jong ka pyrthei bad ka jinglong jong ki briew naduh u snem 1914 ki pynshisha ïa kane.
3. Balei ka jinglong jingman jong ka pyrthei ka la sniew haduh katta katta naduh ba ka Hima U Blei ka la sdang ban synshar?
Hadien ba u Jisu u la long u Syiem jong ka Hima U Blei, u la ïaleh thma pyrshah ïa u Soitan bad ki ksuid jong u ha bneng. U Soitan u la rem. Ka Baibl ka ong ba “la shop noh arsut ïa u sha ka khyndew, bad ïa kita ki angel jong u la shop noh arsut lem bad u.” (Jingpynpaw 12:9, 12) U Soitan u la bitar bha namarba u tip ba un sa shah pynjot. Te dei na ka daw jong u ba ka pyrthei ka dap tang da ki jingjynjar suda. Kane ka ïarap ïa ngi ban sngewthuh ba ka jinglong jong ka pyrthei ka la sniew haduh katta katta. Ka Hima U Blei kan sa weng lut ïa kine ki jingeh baroh.
WAD SHUH SHUH
Peit bniah kumno ngi tip ba ka Hima ka la sdang ban synshar naduh u snem 1914 bad kata ka dei ban pynlong ïa ngi ban leh aïu.
4. Ka jingkheiñ jong ka Baibl ka pyni ba ka Hima U Blei ka la sdang ban synshar naduh u snem 1914
U Blei u la pynlong ïa u Syiem Nebukhadnessar jong ka Babilon ban phohsniew ïa kawei ka jingïathuhlypa. Kata ka jingphohsniew bad ka jingbatai jong u Daniel ka pyni ba ka thew ïa ka jingsynshar jong u Nebukhadnessar bad ïa ka Hima U Blei ruh.—Pule Daniel 4:17. a
Pule Daniel 4:20-26, bad nangta pyndonkam ruh ïa ka dur ban jubab ïa kine ki jingkylli harum:
-
(1) U Syiem Nebukhadnessar u la ïohi aïu ha ka jingphohsniew jong u?—Peit ka dkhot 20 bad 21.
-
(2) Kaei kaban jia ïa uta u dieng?—Peit ka dkhot 23.
-
(3) Kaei kaban jia ha kaba kut jong ki “hynñiew ki aïom”?—Peit ka dkhot 26.
Kumno ka Jingphohsniew shaphang u Dieng ka Don Jingïadei bad ka Hima U Blei
KA JINGÏATHUHLYPA (Daniel 4:20-36)
Ka Jingsynshar
(1) U dieng bah
La pynsangeh ïa ka jingsynshar
(2) “To khet noh ïa uta u dieng,” bad to ai ‘haduh ba hynñiew ki aïom kin kut’
Ka jingsynshar ka la sdang biang
(3) ‘Ka hima jong me kan skhem biang ha me’
Ha ka jingpyndep kaba nyngkong jong kane ka jingïathuhlypa . . .
-
(4) U dieng u thew ïano?—Peit ka dkhot 22.
-
(5) Balei la pynsangeh noh ïa ka jingsynshar jong u?—Pule Daniel 4:29-33.
-
(6) Kaei kaba la jia ïa u Nebukhadnessar ha kaba kut jong ki “hynñiew ki aïom”?—Pule Daniel 4:34-36.
KA JINGPYNDEP KABA NYNGKONG
Ka Jingsynshar
(4) U Nebukhadnessar, u Syiem jong ka Babilon
La pynsangeh ïa ka jingsynshar
(5) Hadien u snem 606 B.C.E., u Nebukhadnessar u la kylla bieit bad u khlem lah shuh ban synshar haduh hynñiew snem
Ka jingsynshar ka la sdang biang
(6) U Nebukhadnessar u la tip briew bad u la sdang ban synshar biang
Ha ka jingpyndep kaba ar jong kane ka jingïathuhlypa . . .
-
(7) U dieng u thew ïano?—Pule 1 Khronikl 29:23.
-
(8) Balei la pynsangeh ïa ka jingsynshar jong ki? Kumno ngi tip ba ka jingsynshar ka dang sangeh ha ka por ba u Jisu u don ha ka pyrthei?—Pule Loukas 21:24.
-
(9) Mynno bad hangno la sdang biang ïa kane ka jingsynshar?
KA JINGPYNDEP KABA AR
Ka Jingsynshar
(7) Ki syiem Israel ki thew ïa ka jingsynshar U Blei
La pynsangeh ïa ka jingsynshar
(8) La pynjot ïa ka Jerusalem, bad kane ka la pynsangeh ïa ki syiem Israel ban synshar kumba 2,520 snem
Ka jingsynshar ka la sdang biang
(9) U Jisu u la sdang ban synshar ha bneng kum u Syiem jong ka Hima U Blei
Ki hynñiew ki aïom ki shim por haduh katno?
Kawei ka bynta jong ka Baibl ka ïarap ïa ngi ban sngewthuh ïa kiwei pat ki bynta jong ka Baibl. Ka kitab Jingpynpaw ka ong ba ki lai ïa shiteng ki dei 1,260 sngi. (Jingpynpaw 12:6, 14) Te ar shah ki lai ïa shiteng ki long hynñiew ki ïa ne hynñiew ki aïom, kaba mut 2,520 sngi. Ha ka Baibl, shi sngi ka mut shi snem. (Esekiel 4:6) Te ki hynñiew ki aïom ba la thoh ha ka kitab u Daniel ki long 2,520 snem.
5. Ka pyrthei ka la kylla naduh u snem 1914
U Jisu u la ïathuhlypa ba ka pyrthei kan long kumno hadien ba u la long u Syiem. Pule Loukas 21:9-11, bad nangta sa ïa peit lang ïa kane ka jingkylli harum:
-
Kano na kine ki jingïathuhlypa kaba phi la ïohi ne ïohsngew mynta?
U apostol Paul u la batai ba ki briew kin long kumno ha ki sngi kiba khatduh. Pule 2 Timothi 3:1-5, bad nangta sa ïa peit lang ïa kane ka jingkylli harum:
-
Kano na kine ki jinglong kiba phi ïohi ha ki briew mynta?
6. Pyni ba phi ngeit ba ka Hima U Blei ka la synshar mynta
Pule Mathaïos 24:3, 14, bad nangta sa ïa peit lang ïa kine ki jingkylli harum:
-
Kaei ka kam kaba kongsan ba ngi dang leh mynta kaba pyni ba ka Hima U Blei ka la synshar mynta?
-
Kumno phi lah ban don bynta lang ha kane ka kam?
Ka Hima U Blei ka la sdang ban synshar ha bneng, bad shen kan sa shimti ban synshar ïa ka pyrthei baroh kawei. Pule Hebru 10:24, 25, bad nangta sa ïa peit lang ïa kane ka jingkylli harum:
-
Kaei kaba iwei pa iwei na ngi ngi dei ban leh haba ngi “ïohi ïa kata ka sngi ba ka la nang jan”?
Lada phi tip shaphang kaei kaei kaba lah ban ïarap bad ïada ïa kiwei, kan pynlong ïa phi ban leh aïu?
DON KIBA LAH BAN KYLLI: “Balei ki Nongsakhi U Jehobah ki kren bha shaphang u snem 1914?”
-
Kumno phin ong?
KI MAT BAKONGSAN
Ki jingïathuhlypa bad ki jingkheiñ jong ka Baibl, bad ka jinglong jingman jong ka pyrthei mynta ki pyni ba ka Hima U Blei ka la sdang ban synshar. Ngi pyni ba ngi ngeit ïa kane da kaba kaba ïalap bad leit sha ki jingïalang.
Peit Biang
-
Kaei kaba la jia ha kaba kut jong ki hynñiew ki aïom kumba la ïathuhlypa ha ka kitab u Daniel?
-
Kaei kaba pynlong ïa phi ban ngeit ba ka Hima U Blei ka la sdang ban synshar naduh u snem 1914?
-
Kumno phin pyni ba phi ngeit ba ka Hima U Blei ka la synshar mynta?
PULE SHUH SHUH
Peit kumno ka histori bad kiwei ki briew ki ong shaphang ki jingkylla ha ka pyrthei naduh u snem 1914.
“Ka Akor ka Burom jong ki Briew ka la Hiar Dor Bak-la-bak” (To Sharai!, Ïaïong 2007, Phareng)
Pule kumno ka jingïathuhlypa ba la thoh ha Mathaïos 24:14 ka la ktah ïa ka jingim jong uwei u briew.
“Nga la Ieid ïa ka Jingïalehkai Baseball Ban ïa Kaei Kaei ruh!” (Ka Kutphira No. 3 2017, Phareng)
Kumno ngi tip ba ka jingïathuhlypa ba la thoh ha ka kitab u Daniel lynnong 4 ka thew ïa ka Hima U Blei?
“Mynno ka Hima U Blei ka la Sdang ban Synshar? (Bynta 1)” (Ka Kutphira, Risaw 1, 2014, Phareng)
Kaei kaba pyni ba ki “hynñiew ki aiom” ba la thoh ha ka kitab u Daniel lynnong 4 ka la kut ha u snem 1914?
“Mynno ka Hima U Blei ka la Sdang ban Synshar? (Bynta 2)” (Ka Kutphira, Naiweing 1, 2014, Phareng)
a Peit ïa ki ar tylli ki jingthoh ha kaba kut jong ka bynta Pule Shuh Shuh jong kane ka lynnong.
