MWE LUTLUT 32
Tohkohsrahi luhn God Muhtwacwacack in Kol!
Tohkohsrahi luhn God uh muhtwacwacack in kol inkuhsrao in yac 1914. Ke yac sepacna inge, lwen sahflah ke kolyuck luhn mwet uh muhtwacwacack. Kuht etuh fuhkah? Kuht ac fah liye lah meac Bible uh palye, ac ke ma sikyak fin facluh ac ohiyac fuhkah mwet uh ahkkahlwemye muhtwacwacack in yac 1914.
1. Meac Bible uh palye?
Bible uh ahkkahlwemye ke puk luhn Daniel lah tohkohsrahi luhn God uh ac muhtwacwacack in kol ke sahflahiyen “pacl itkohsr.” (Daniel 4:16, 17, BMK) Tukun yac pucspucs, Jesus el pahngon pac puhlanpacl se inge oacna “pacl pakiyucki luhn muhtuhnfacl uh,” ac el luti lah lusen pacl se inge soenna sahflah in pacl lal ah. (Luke 21:24, NW) In oacna ke ma kuht ac fah lotwelah ke mwe lutlut se inge, pacl itkohsr sahflah ke yac 1914.
2. Ma sikyak ac ohiyac fuhkah arlacna kahlwem fin facluh muhtwacwacack in yac 1914?
Mwet tuhma lutlut lal Jesus uh siyuck sel: “Piyac akihlenyacn tuhkuh [“oasr tari,” NW] lom uh ac sahflahiyen facluh?” (Matthew 24:3) Jesus el fahk nuh selos ma pucspucs ma ac sikyak ke pacl se ma el muhtwacwacack in kol inkuhsrao oacna sie Tohkohsrah ke Tohkohsrahi luhn God. Kuhtuh sin ma ac sikyak inge pa mweun, sracl luhlahp, ac kusrusr. (Riti Matthew 24:7.) Bible uh palye pac lah ke srihpen ohiyen mwet ke “lwen sahflah uh ac fah oasr mwe ongaiyac” ac ma upac ke moul. (2 Timothy 3:1-5) Ma sikyak ac ohiyen mwet inge kahlwem na pwacye muhtwacwacack in yac 1914.
3. Efuh ma sikyak fin facluh kuluklac liki na meet ah ke pacl Tohkohsrahi luhn God muhtwacwacack in kol?
Tiac paht tukun Jesus el kol oacna sie Tohkohsrah ke Tohkohsrahi luhn God, el mweun lainuhl Satan ac lipufacn kuluk lal inkuhsrao. Satan el kuf ke mweun se inge. Bible uh fahk lah “sisilac el nuh facluh, wi lipufacn lal nuhkewa.” (Fwackyuk 12:9, 10, 12) Satan el arlacna kasrkuhsrak mweyen el etuh lah el ac fah kuhnahosyucklac. El pa srihpen ma upac ac mwe kweok fin facluh nohfohn. Ma inge kahsre kuht in kahlwem kac lah efuh arlacna kuluk ohiyac ma sikyak fin facluh! Tuhsruhktuh, Tohkohsrahi luhn God ac fah ahkwacngihnyelah ma upac nuhkewa inge.
AHKYOHKYE LUTLUT LOM
Lotwelah ke mwe ahkpwacyeye lah Tohkohsrahi uh muhtwacwacack tari in kol in yac 1914. Kuht ac fah lutlutkihn pac lah kuht ac ahkkahlwemye fuhkah lah kuht luhlahlfongi muh Tohkohsrahi luhn God uh kol ke pacl inge.
4. Kahs pahluh in Bible ac yac se inge 1914
God el ahkkahlwemye nuh sel Tohkohsrah Nebuchadnezzar luhn acn Babylon sie kahs pahluh ke inkacnek luhn sie mwemwe. Daniel el ahkuhtweyac kalmacn mwemwe se lal inge. El fahk lah ma inge ac fah ahkpwacyeyuck ke kolyuck lal Nebuchadnezzar ac ke Tohkohsrahi luhn God.—Riti Daniel 4:17. a
Riti Daniel 4:20-26, ac tohkohyang orekmakihn chart se in tohpohklah kihsen siyuck ekahsr ten inge:
-
(A) Meac Nebuchadnezzar el liye ke mwemwe se lal ah?—Liye fuhs 20 ac 21.
-
(B) Meac sikyak ke sahk soko ah?—Liye fuhs 23, BMK.
-
(C) Meac ac fah sikyak ke sahflahiyen “pacl itkohsr”?—Liye fuhs 26.
Sahk Soko ke Mwemwe Se ac Tohkohsrahi luhn God
KAHS PAHLUH (Daniel 4:20-36)
Kolyuck
(A) Sahk soko ma arlac fuhlwact
Kolyuck uh tulokihnyucki
(B) “Pakiyac sahk soko,” ac lwelah “pacl itkohsr” ahluhkwelah
Kolyuck uh fohlohkihnyucklac
(C) “Kom ac sifwilpac tohkohsrahlac”
Pacl se meet ma kahs pahluh se inge ahkpwacyeyuck . . .
-
(D) Sahk soko ah luhmweyuck nuh sin suc?—Liye fuhs 22.
-
(E) Kolyuck lal uh tulokihnyucki fuhkah?—Riti Daniel 4:29-33.
-
(F) Meac sikyak nuh sel Nebuchadnezzar ke sahflahiyen “pacl itkohsr”?—Riti Daniel 4:34-36.
PACL SE MEET AHKPWACYEYUCK
Kolyuck
(D) Nebuchadnezzar, Tohkohsrah luhn acn Babylon
Kolyuck uh tulokihnyucki
(E) Tukun 606 B.C.E., kuluklac insifacl Nebuchadnezzar ac el koflah oruh kolyuck lal ke lusen yac itkohsr nohfohn
Kolyuck uh fohlohkihnyucklac
(F) Sifwilpac wolac insifacl Nebuchadnezzar ac tahfwelah in oruh kolyuck lal uh
Ke pacl ahkluo ma kahs pahluh se inge ahkpwacyeyuck . . .
-
(G) Sahk soko ah luhmweyuck nuh sin suc?—Riti 1 Chronicle 29:23.
-
(H) Tohkohsrah luhn Israel elos tui in kol ngac? Kuht etuh fuhkah lah elos srackna tiac kol ke pacl se ma Jesus el oasr fin facluh?—Riti Luke 21:24.
-
(I) Ngac ac oyac kolyuck se inge fohlohkihnyuckyak?
PACL SE AHKLUO AHKPWACYEYUCK
Kolyuck
(G) Tohkohsrah luhn Israel suc luhmweyuck nuhke kolyuck luhn God
Kolyuck uh tulokihnyucki
(H) Jerusalem kuhnanuclac, ac tulokihnyucki sruf luhn tohkohsrah luhn Israel ke lusen yac 2,520
Kolyuck uh fohlohkihnyucklac
(I) Jesus el muhtwacwacack in kol inkuhsrao oacna sie Tohkohsrah ke Tohkohsrahi luhn God
Puhtahkah pacl itkohsr inge?
Kuhtuh puk luhn Bible uh kahsre kuht in kahlwem ke ip sahyac ke ma suhmuhslah uh. Ke sie mwe puhpuhlyuck, puk luhn Fwackyuk ahkkahlwemye lah lusen pacl se ke tolu tahfuh oasr ke lwen 1,260. (Fwackyuk 12:6, 14) Tolu tahfuh pacl luo ac oraclah pacl itkohsr, pwacnacng lusen pacl itkohsr inge oasr ke lwen 2,520. Oasr pacl, Bible uh orekmakihn kahs se inge lwen in luhmweyuck nuhke yac. (Ezekiel 4:6) Pwacnacng, pacl itkohsr ma sihmlac in puk luhn Daniel oasr ke lusen yac 2,520.
5. Facluh eklac muhtwacwacack in yac 1914
Jesus el palye ke ma ac fah sikyak fin facluh ke pacl se ma el eklac Tohkohsrah. Riti Luke 21:9-11, ac tohkohyang sramsramkihn kihsen siyuck se inge:
-
Piyac kac ma sikyak inge kom nuh liye kuh lohng tari?
Mwet sap Paul el fahk ke ohiyac ma mwet uh ac fah ahkkahlwemye ke lwen sahflah uh. Riti 2 Timothy 3:1-5, ac tohkohyang sramsramkihn kihsen siyuck se inge:
-
Piyac kac ohiyac inge kom liye mwet uh ahkkahlwemye ke pacl inge?
6. Ahkkahlwemye lah kom luhlahlfongi lah Tohkohsrahi luhn God kol tari
Riti Matthew 24:3, 14, ac tohkohyang sramsramkihn kihsen siyuck inge:
-
Orekma yohk srihpac fuhkah ahkkahlwemye lah Tohkohsrahi luhn God muhtwacwacack tari in kol?
-
Kom ac kahsruh nuhke orekma se inge fuhkah?
Tohkohsrahi luhn God uh kol ke pacl inge, ac apkuhran na pacl ma inge ac fah kol facluh nohfohn. Riti Hebrew 10:24, 25, ac tohkohyang sramsramkihn kihsen siyuck se inge:
-
Meac kuht enenuh in oruh ke kuht “liye tuh Lwen luhn Leum apkuhran me”?
Kom fin lotwelah sie ma ma ac kuh in kahsruh ac molwelah mwet sahyac, meac kom ac oruh?
KUHTUH MWET UH FAHK: “Efuh kuh Mwet Loh luhn Jeova uh fahk muh yohk srihpac na pwacye yac 1914?”
-
Meac kom ac fah fahk?
MA KUHT LOTWELAH
Kahs pahluh in Bible ac ma sikyak fin facluh ahkpwacyeye lah Tohkohsrahi luhn God muhtwacwacack in kol ingena. Kuht ahkkahlwemye lah kuht luhlahlfongi kac kuht fin fahkwack pweng wo ac wi ke toeni.
Kalweni
-
In fal nuhke kahs pahluh in puk luhn Daniel, meac ac sikyak ke sahflahiyen pacl itkohsr?
-
Meac oruh kom in luhlahlfongi muh Tohkohsrahi luhn God muhtwacwacack in kol in yac 1914?
-
Kom ac ahkkahlwemye fuhkah lah kom luhlahlfongi muh Tohkohsrahi luhn God kol ingena?
LIYE PAC MA INGE
Lotwelah ke ma mwet suc suhmuhslah history ac mwet sahyac uh fahk ke ma eklac pucspucs sikyak fin facluh muhtwacwacack in yac 1914.
Riti lah moul luhn sie mukul eklac fuhkah ke pacl se el lotwelah ke kahs pahluh in Matthew 24:14.
“I Loved Baseball More Than Anything!” (The Watchtower No. 3 2017)
Kuht etuh fuhkah lah kahs pahluh ma sihmlac in Daniel sapta 4 kalmackihn nuhke Tohkohsrahi luhn God?
“When Did God’s Kingdom Begin Ruling? (Part 1)” (The Watchtower, October 1, 2014)
Meac ahkkahlwemye lah “pacl itkohsr” ma sihmlac in Daniel sapta 4 sahflah in yac 1914?
“When Did God’s Kingdom Begin Ruling? (Part 2)” (The Watchtower, November 1, 2014)
a Liye mwe lutlut sahflah luo ke section se inge Liye Pac Ma Inge ke mwe lutlut se inge.
