LƐSIN 32
Gɔd in Kiŋdɔm De Rul Naw!
Gɔd in Kiŋdɔm bin bigin fɔ rul na ɛvin insay di ia 1914. Na insay da sem ia de di las dez bin bigin. Aw wi no dat? Wi go lan bɔt wetin di Baybul bin dɔn se, wetin de apin na di wɔl naw, ɛn aw pipul dɛn dɔn de biev frɔm 1914.
1. Wetin di Baybul bin dɔn tɔk?
Di Baybul buk we nem Daniɛl bin dɔn tɔk se Gɔd in Kiŋdɔm go bigin fɔ rul di tɛm we di “sɛvin tɛm” dɔn. (Daniɛl 4:16, 17, NWT) Lɔng tɛm afta dat, Jizɔs bin tɔk bɔt da sem tɛm de as “di tɛm we dɛn gi di neshɔn dɛn,” ɛn i bin tich bak se da tɛm de nɔ dɔn yet. (Lyuk 21:24) As wi go lan, di sɛvin tɛm bin dɔn insay di ia 1914.
2. Wetin dɔn de apin na di wɔl ɛn aw pipul dɛn dɔn de biev frɔm 1914?
Jizɔs in disaypul dɛn bin aks am se: “Ustɛm dɛn tin ya go bi, ɛn us sayn go sho se yu de wit wi ɛn di tɛm want fɔ dɔn?” (Matyu 24:3) We Jizɔs bin de ansa dɛn, i bin se bɔku tin dɛn go apin afta we i bigin fɔ rul na ɛvin as Kiŋ na Gɔd in Kiŋdɔm. Sɔm pan dɛn tin dɛn de na wɔ, atkwek, ɛn tin fɔ it go shɔtin. (Rid Matyu 24:7.) Di Baybul bin tɔk bak se di we aw pipul dɛn de biev insay “di las dez” go mek layf “tranga.” (2 Timoti 3:1-5) Dis we aw tin dɛn de apin na di wɔl ɛn di we aw pipul dɛn de biev bin bigin fɔ apin mɔ insay di ia 1914.
3. Wetin mek tin dɔn rili bad-ɔf na di wɔl frɔm di tɛm we Gɔd in Kiŋdɔm bigin fɔ rul?
Shɔt tɛm afta we Jizɔs bi Kiŋ na Gɔd in Kiŋdɔm, i bin fɛt wit Setan ɛn in dimɔn dɛn na ɛvin. Setan bin lɔs di fɛt. Di Baybul se: “Dɛn ib am dɔŋ na di wɔl, dɛn ib am dɔŋ wit in enjɛl dɛn.” (Rɛvɛleshɔn 12:9,10, 12) Setan rili vɛks bikɔs i no se dɛn go dɔnawe wit am. Na dat mek i de mek pipul dɛn de sɔfa ɔlsay na di wɔl. No wɔnda tin bad-ɔf so na di wɔl! Bɔt Gɔd in Kiŋdɔm go mek ɔl dɛn prɔblɛm dɛn de dɔn.
LAN MƆ
Lan mɔ bɔt aw wi no se Gɔd in Kiŋdɔm bin bigin fɔ rul insay 1914 ɛn wetin dis min fɔ wi.
4. Baybul kalkyuleshɔn sho se Gɔd in Kiŋdɔm bin bigin fɔ rul insay 1914
Gɔd bin mek Kiŋ Nɛbyukadnɛza we bin de rul na Babilɔn drim wan drim we go apin tumara bambay. Di tin we Daniɛl bin intaprit bɔt da drim de sho se i gɛt sɔntin fɔ du wit Nɛbyukadnɛza in Kiŋdɔm ɛn Gɔd in Kiŋdɔm.—Rid Daniɛl 4:17. a
Rid Daniɛl 4:20-26, (NWT) dɔn una yuz di chat fɔ ansa dɛn kwɛstyɔn dɛn ya:
-
(A) Wetin Nɛbyukadnɛza bin si na in drim?—Rid vas 20 ɛn 21.
-
(B) Wetin go apin to di tik?—Rid vas 23.
-
(C) Wetin go apin we di “sɛvin tɛm” dɔn? —Rid vas 26.
Wetin di Drim bɔt di Tik Gɛt fɔ Du wit Gɔd in Kiŋdɔm?
DI PRƆFƐSI (Daniɛl 4:20-36, NWT)
Rul
(A) Wan big tik
Stɔp fɔ rul fɔs
(B) “Kɔt di tik,” ɛn lɛ “sɛvin tɛm pas”
Bigin rul bak
(C) “Yu go gɛt yu Kiŋdɔm bak”
Di fɔstɛm we dis prɔfɛsi apin . . .
-
(D) Udat di tik tinap fɔ?—Rid vas 22.
-
(E) Aw i bin stɔp fɔ rul fɔs?—Rid Daniɛl 4:29-33, NWT.
-
(F) Wetin bin apin to Nɛbyukadnɛza we di “sɛvin tɛm” dɔn?—Rid Daniɛl 4:34-36, NWT.
DI FƆSTƐM WE I APIN
Rul
(D) Nɛbyukadnɛza, Kiŋ na Babilɔn
Stɔp fɔ rul fɔs
(E) Afta di ia 606 bifo Krays, Nɛbyukadnɛza bin kres ɛn i nɔ bin ebul rul fɔ sɛvin ia
Bigin rul bak
(F) Nɛbyukadnɛza bin wɛl ɛn i bigin rul bak
Di sɛkɔn tɛm we dis prɔfɛsi apin . . .
-
(G) Udat di tik tinap fɔ? —Rid Fɔs Kronikul 29:23.
-
(H) Aw dɛn bin stɔp fɔ rul? Aw wi no se dɛn nɔ bin de rul di tɛm we Jizɔs bin de na di wɔl? —Rid Lyuk 21:24.
-
(I) Ustɛm dɛn bin bigin rul bak ɛn usay?
DI SƐKƆN TƐM WE I APIN
Rul
(G) Izrɛlayt kiŋ dɛn we bin tinap fɔ Gɔd in rul
Stɔp fɔ rul fɔs
(H) Dɛn bin dɔnawe wit Jerusɛlɛm, ɛn dat mek Izrɛlayt kiŋ dɛn bin stɔp fɔ rul fɔ 2,520 ia
Bigin rul bak
(I) Jizɔs bigin rul na ɛvin as Kiŋ na Gɔd in Kiŋdɔm
Aw lɔng na di sɛvin tɛm?
Sɔm pat dɛn na di Baybul de ɛp wi fɔ ɔndastand sɔm ɔda pat dɛn. Fɔ ɛgzampul, di Baybul buk we nem Rɛvɛleshɔn se tri ɛn af tɛm ikwal to 1,260 dez. (Rɛvɛleshɔn 12:6, 14) So sɛvin tɛm na we yu dɔbul da nɔmba de, ɔ 2,520 dez. Sɔntɛnde, di Baybul kin yuz wan de fɔ min wan ia. (Izikɛl 4:6) Na di sem tin apin na di prɔfɛsi insay Daniɛl bɔt di sɛvin tɛm. Di sɛvin tɛm min 2,520 ia.
5. Di wɔl dɔn chenj frɔm 1914
Jizɔs bin dɔn tɔk bɔt tin dɛn we go apin na di wɔl afta i bi Kiŋ. Rid Lyuk 21:9-11, dɔn una tɔk bɔt dis kwɛstyɔn:
-
Uswan pan dɛn tin dɛn ya yu dɔn si ɔ yɛri bɔt?
Di apɔsul Pɔl bin tɔk bɔt aw pipul dɛn go biev insay di las dez we mɔtalman de rul. Rid 2 Timoti 3:1-5, dɔn una tɔk bɔt dis kwɛstyɔn:
-
Uswan pan dɛn we dɛn ya yu dɔn si pipul dɛn de biev tide?
6. Wi fɔ du sɔntin bikɔs Gɔd in Kiŋdɔm de rul
Rid Matyu 24:3, 14, dɔn una tɔk bɔt dɛn kwɛstyɔn dɛn ya:
-
Us impɔtant wok sho se Gɔd in Kiŋdɔm de rul naw?
-
Aw yu go tek pat pan dis wok?
Gɔd in Kiŋdɔm de rul naw, ɛn i nɔ go te igen i go bigin rul oba di wɔl. Rid Ibruz 10:24, 25, dɔn una tɔk bɔt dis kwɛstyɔn:
-
Wetin wi ɔl fɔ du as wi “de si se di de de kam nia”?
If yu lan bɔt sɔntin we go ɛp ɔda pipul dɛn ɛn sev dɛn layf, wetin yu go du?
IF PƆSIN AKS YU: “Wetin mek Jiova Witnɛs dɛn de tɔk se 1914 na impɔtant ia?”
-
Wetin yu go se?
WETIN YU DƆN LAN?
Di tin dɛn we di Baybul bin dɔn tɔk, Baybul kalkyuleshɔn, ɛn di tin dɛn we de apin na di wɔl sho se Gɔd in Kiŋdɔm de rul naw. Wi go sho se wi biliv dis bay we wi de prich bɔt di Kiŋdɔm ɛn atɛnd mitin dɛn.
Rivyu
-
Frɔm wetin di Baybul buk we nem Daniɛl bin tɔk, wetin bin apin we di sɛvin tɛm dɔn?
-
Wetin mek yu rili biliv se Gɔd in Kiŋdɔm bin bigin rul insay 1914?
-
Aw yu go sho se yu biliv se di Kiŋdɔm de rul naw?
DU MƆ RISACH
Lan bɔt wetin sɔm pipul dɛn we rayt istri ɛn ɔda pipul dɛn dɔn se bɔt aw tin dɔn chenj na di wɔl frɔm 1914.
Rid bɔt aw di prɔfɛsi na Matyu 24:14 bin afɛkt wan man.
“A Bin Lɛk Besbɔl pas Ɛni Ɔda Tin!” (Di Wachtawa No. 3 2017)
Aw wi no se di prɔfɛsi we de na Daniɛl chapta 4 gɛt sɔntin fɔ du wit Gɔd in Kiŋdɔm?
“Ustɛm Gɔd in Kiŋdɔm Bigin fɔ Rul? (Pat 1)” (Di Wachtawa, Ɔktoba 1, 2014)
Wetin sho se di “sɛvin tɛm” we Daniɛl chapta 4 tɔk bɔt bin dɔn insay 1914?
“Ustɛm Gɔd in Kiŋdɔm Bigin fɔ Rul? (Pat 2)” (Di Wachtawa, Novɛmba 1, 2014)
a Rid di las tu atikul dɛn we de na di say we se “Du Mɔ Risach” insay dis lɛsin.
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
