SOMO 32
Mungu dhó pidhinga pinyo kpadjo!
Mungu dhó Pidhinga ngangʉe pinyodha tso ra na cho 1914 na. Ndrŭ dhó pidhinga dzá mwisho tso maddi ngangʉeni fø cho na. Føri ká ko chu ngbaribbai? Anja Biblia d’rangʉe ná unabi ndirigoti 1914 djó ro njini dz’ djó ná lo ndirigoti ngbaribbai ma ndrŭ dhó nyi kʉ nari.
1. Biblia nǎ unabi ká d’rangʉe ngbá lo?
Biblia nǎ Danieli dzá buku dhongʉeri, Mungu dhó Pidhinga ka ndi ngae pinyodha tso “Nyakati saba” tso dyani ró. (Danieli 4:16, 17) Cho mamia goti, Yesu nzingʉe fø ddo “ndrŭ tsɨ dho le bba nga ná saa,” ndirigoti ke pongʉeri nari kʉ fø ddo tso ro nzá d’e dyani ri. (Luka 21:24) Ko si rinja nari bbai, nyakati saba tso dyangʉeni cho 1914 na.
2. Cho 1914 djó ro ká ngbá lo adi njini ndirigoti ndrŭ dhó nyi ka e ngbaribbai?
Yesu unakpa dhungʉeri Yesu tso ɨ: “Ni si ngʉ nari ma, nga sini nari ma na ká le si nja ngbá alama ró?” (Matayo 24:3) Fø logoti ndi ngʉ d’e, Yesu tingʉe lo b’lo ndi sí pinyodha tso nga ra nǎ ró ka ndi sie njini ná bí kʉ ná lo djo. Fø lo kana njari kʉ vita ma, nyo tso vʉni nari ma ndirigoti rì da nari ma na. (Azø Matayo 24:7.) Biblia d’rangʉeri ki godhé, “nga sini ná saa na” ndrŭ nji ná lo si rili maisha nǎ “lo tso ó kpakpa.” (2 Timoteo 3:1-5) Cho 1914 djó ro, fø lo njini nari njani pʉlʉpʉlʉ.
3. Mungu dhó Pidhinga ngangʉe pinyodha tso ná nga djó ro ká lo ngʉ che pli addudho?
Yesu ngʉngʉe Mungu dhó Pidhinga nǎ Pi nari goti, ke njingʉe là Shetani ma, gó ma na tso ró ra nǎ. Shetani djolu fø là singʉe si. Biblia pori nari kʉ, “ke ma le bungʉe dz’ djo ndidhó malaiká ma na.” (Ufunuo 12:9, 12) Shetani nanga kani bbo dhonalo ke churi chu ndi le si sasa. Føri dho ke kpakpalo ma, nzadha ma nanga nya dz’ djolu gble. Føri dzá lo dho, dz’ djó chelo kʉ bbo nari nzá ka ndi ke le nanga ri! Ro Mungu dhó Pidhinga si fø kpakpalo tso krʉ d’ød’ø.
ANE LONANGA BBO
Aneri ni chu ngbaribbai ma ko churi nari kʉ Mungu dhó Pidhinga nga pinyodha tso 1914 na ndirigoti føri na mana ká kʉ ko dho addu ma nari.
4. Ngbaribbai ma le ba cho 1914 nari
Mungu lingʉeri Babiloni nǎ Pi Nebukadneza nyò nyó unabi nǎ lo djo. Fø nyo ma, ri nanga Danieli tungʉe nari ma na ko zø Biblia nǎ ro. Bbʉbbʉ dhé fø nyo loti djo nari kʉ Nebukadneza dhó pidhinga ma, Mungu dhó Pidhinga ma na.—Azø Danieli 4:17. a
Azø Danieli 4:20-26, ndirigoti anjinjí kisanduku nǎ lo na ndiro ni ba i ngadhudha goti d’e:
-
(A) Nebukadneza ká njangʉe ngba lo ndidhó nyo na?—Anja verse 20 ndirigoti 21.
-
(B) Fø tsú dhó lo ká ka ndi sie di ngba?—Anja verse 23.
-
(C) “Nyakati saba” dzá mwisho na ká ngba lo ka ndi njieni”?—Anja verse 26.
Ngbaribbai ma Nebukadneza dhó nyo ma tso nju Mungu dhó Pidhinga na nari
UNABI (Danieli 4:20-36)
Pidhinga
(A) Da dhi ná tsu
Pidhinga nanga d’ɨngʉeni nari
(B) “Akrr tsu” ndirigoti abba “nyakati saba da”
Pidhinga ki ngʉ vi
(C) “Nidzá pidhinga ki si ngʉ vi ni dho na”
Ya kwanza fø unabi njingʉeni nari . . .
-
(D) Tsu na ká le ngʉ ie ddi?—Anja verse 22.
-
(E) Nebukadneza dhó pidhinga nanga ká d’ɨngʉeni ngbaribbai?—Azø Danieli 4:29-33.
-
(F) Nebukadneza dhó lo ká dingʉe ngbà “nyakati saba” tso dyangʉeni ná saa na?—Azø Danieli 4:34-36.
YA KWANZA NJINGɄENI NÁ LO
Pidhinga
(D) Babiloni nǎ Pi Nebukadneza
Pidhinga nanga d’ɨngʉeni nari
(E) Cho 606 goti, Y.G.N. (Yesu Gøni nari Njí) Nebukadneza dhó ngaddidha vivi, ndirigoti ke nzá ka ndi nyopi ki cho saba kana ri
Pidhinga ki ngʉ vi
(F) Nebukadneza dhó ngaddidha ki ngʉ vi ndirigoti ke nga pinyodha tso ki vi
Ya pili fø unabi njingʉeni nari . . .
-
(G) Tsu na ká le ngʉ ie ddi?—Azø 1 Mambo ya Nyakati 29:23.
-
(H) Kpadhó pidhinga nanga ká d’ɨngʉeni ngbaribbai? Yesu singʉe dz’ djo nari ma ngʉe b’lo ddí fø pidhinga nanga d’ini ri nari ká ko chu ngbaribbai?—Azø Luka 21:24.
-
(I) Fø Pidhinga ká ngʉngʉe ngba saa na ndirigoti ngbaga?
YA PILI NJINGɄENI NÁ LO
Pidhinga
(G) Mungu dhó Pidhinga le ngʉ ddi na ná Waizraeli bbá pikpa
Pidhinga nanga d’ɨngʉeni nari
(H) Yerusalemu ba sadha, Waizraeli dhó pidhinga nanga d’ɨni cho 2 520 dho
Pidhinga ki ngʉ vi
(I) Yesu nga pinyodha tso Mungu dhó Pidhinga nǎ ra nǎ
Nyakati saba ká le ba ngbaribbai?
Biblia nǎ nja kʉ ná ngana lo adi ko tsotso kó ndiro ko famu nja ngana kʉ ná lo d’e. Loroji na, Biblia nǎ Ufunuo dzá buku ripo, nyakati tatu na nusu kʉ ddo 1 260. (Ufunuo 12:6, 14) Nyakati saba kʉ fø ddo 1 260 le dzi aro ina nari inga le dzi ddo 2 520 nari. Nja saa na, Biblia adi ddo ddi (1) nzi cho ddi (1). (Ezekieli 4:6) Fø lo dho Danieli dzá buku nǎ nyakati saba na le ddi nari kʉ cho 2 520.
5. Ngø djó lo thika øni ø 1914 djó ro
Yesu d’rangʉe Pi ndi ngʉ nari goti ka ndi njieni ngø djó ná lo d’ra. Azø Luka 21:9-11, ndirigoti anitilo i ngadhudha djo:
-
Fø lo kana, ni ro ni adi nja inga ni ro ni adi rr nari ká kʉ ngba lo?
Mutume Paulo dhongʉe ndrŭ dhó pidhinga ra ndidzá mwisho na ná saa na, ngbaribbai ma ndrŭ dhó nyi ka ndi é nari. Azø 2 Timoteo 3:1-5, ndirigoti anitilo i ngadhudha djo:
-
Ni ká rinja fø lo kana ro, ndrŭ ngba lo ro mai nji njʉ?
6. Mungu dhó Pidhinga pinyo nari ko ronga cho njí dho
Azø Matayo 24:3, 14, ndirigoti anitilo i ngadhudha djo:
-
Ri ká kʉ ngbá bbo na mana kʉ ná njí ridho Mungu dhó Pidhinga pinyo nì njʉ ri?
-
Fø njí na ká ni ka ni gba ni tso ngbaribbai?
Kpadjo Mungu dhó Pidhinga pinyo, ndirigoti karr nga goti ri si pinyo dz’ djolu gble. Azø Waebrania 10:24, 25, ndirigoti anitilo i ngadhudha djo:
-
Ko “rinja ddo kʉ chøchø” nari bbai, ko krʉ dho ká ringani ko njí addu?
Njati ni chu ndrŭ tsotso ka ndi koe ná lo ndirigoti ngba ka ndi gøe ndrŭ dhó shinga ná lo ró, ri ká ka ndi choe ni ronga ni njí addu?
NJA NDRŬ KA NDIMA DHU RI: “Ká addudho Yova dzá Dimu adi ripo nari kʉ, 1914 kʉ bbo na mana kʉ ná cho?”
-
Ni ká ka ni ngʉ fø logoti ngbaribbai?
LO DZÁ DɄNGA
Biblia nǎ unabi ma, ri tilo djo ná wakati ma, dz’ djó njini ná lo ma na ridho Mungu dhó Pidhinga pinyo ni kpadjo. Ko u fø lo u nari ko adi dho fø lo djo ko lod’ra ndirigoti njudha dhi ngana ko si nari chulu.
Lo djolu le ngʉ nari
-
Danieli dzá buku nǎ le tilo djo ná nyakati saba dzá mwisho na ká ngba lo njingʉeni?
-
Addui ká liri ni uri u nari kʉ, Mungu dhó Pidhinga nga pinyodha tso 1914 na?
-
Ni uri u Mungu dhó Pidhinga pinyo nì kpadjo nari ká ni ka ni dho ngbaribbai?
NI KA NI CHU NÁ NJA LO
Anja Historia dhi kpa ma, nja ndrŭ ma na ká adi ngba lo po dz’ djó lo thika øni 1914 djó ro nari djo nari.
“Wakati Tabia za Watu Ziliharibika Kabisa” (Amuka! Mwezi wa 4, 2007)
Azø ngbaribbai ma Matayo 24:14 nǎ kʉ ná unabi lengʉe ddikpa ke dhó maisha thika nari.
“Nilipenda Besiboli Kuliko Kitu Kingine!” (Munara wa Mulinzi Na. 3 2017)
Ko ká churi ngbaribbai nari kʉ, Danieli sura 4 nǎ kʉ ná unabi loti Mungu dhó Pidhinga djo?
Addui ká ridho nari kʉ, Danieli sura 4 nǎ le tilo djo ná “nyakati saba” tso dyangʉeni 1914 na?
a Anja i somo nǎ, Ni ka ni chu ná nja lo tsena kʉ ná aro kʉ ná ya mwisho kʉ ná lo.
