DILONGESHA DIA 32
Bukalenge bua Nzambi bukadi bukokesha mpindieu!
Bukalenge bua Nzambi buakatuadija kukokesha mu diulu mu 1914. Ke tshidimu tshiakatuadija kabidi matuku a ku nshikidilu a bukokeshi bua bantu. Bua tshinyi tudi tuamba nanku? Tuakulabi bua mêyi a buprofete a mu Bible, bua malu adi enzeka pa buloba, ne bua bikadilu bidi nabi bantu katshia ku 1914.
1. Mêyi a buprofete a mu Bible adi amba tshinyi?
Mukanda wa Danyele uvua muleje ne: Bukalenge bua Nzambi buvua ne bua kutuadija kukokesha ku ndekelu kua tshikondo tshidibu babikila bu: “bikondo muanda mutekete.” (Danyele 4:16, 17) Bidimu nkama ya bungi pashishe, Yezu wakabikila tshikondo atshi bu: “bikondo bisungula bia bisamba,” kuambaye kabidi ne: kabivua bianji kujika to. (Luka 21:24) Anu mutuabimona, bikondo 7 abi biakajika mu 1914.
2. Mmalu kayi adi enzeka pa buloba katshia ku 1914?
Bayidi ba Yezu bakamuebeja ne: “Ntshinyi tshikale tshimanyinu tshia dikalaku diebe ne tshia nshikidilu wa ndongoluelu wa malu eu?” (Matayi 24:3) Yezu wakabandamuna, kubalejaye malu a bungi avua ne bua kuenzeka pavuaye ulua Mukalenge wa Bukalenge bua Nzambi mu diulu. Mu malu au mudi mvita, biyole bia nzala, ne dikanka dia buloba. (Balayi Matayi 24:7.) Bible ukavua muambe pende ne: bikadilu bia bantu mu “matuku a ku nshikidilu” nebivuije nsombelu ‘mukole mua kupita nende.’ (2 Timote 3:1-5) Malu aa adi enzeka bikole katshia ku 1914.
3. Bua tshinyi malu mmanyanguke katshia Bukalenge bua Nzambi buatuadija kukokesha?
Katupa kîpi Yezu mumane kulua Mukalenge wa Bukalenge bua Nzambi, wakela Satana ne bademon bende mvita mu diulu. Kutshimunaye Satana. Bible udi wamba ne: Satana “wakedibua panshi pa buloba, ne banjelu bende bakedibua nende panshi.” (Buakabuluibua 12:9, 10, 12) Satana udi ne tshiji tshikole bualu mmumanye ne: nebamubutule. Nunku udi ukebesha makenga ne ntatu pa buloba bujima. Ke bualu kayi malu mmanyanguke bikole! Bukalenge bua Nzambi nebujikije ntatu yonso eyi.
BUELA MU BUONDOKE
Mona tshidi tshijadika ne: Bukalenge bua Nzambi buakatuadija kukokesha mu 1914 ne mudibi bitutangila.
4. Dilondangana dia bidimu bia mu Bible didi difikisha mu 1914
Nzambi wakalotesha mukalenge Nebukadenesâ wa mu Babilona wa kale tshilota tshia buprofete. Tshilota atshi ne diumvuija divua Danyele mufile bidi bileja muditshi tshitangila bukokeshi bua Nebukadenesâ ne Bukalenge bua Nzambi.—Balayi Danyele 4:17. a
Balayi Danyele 4:20-26, pashishe nubale malu adi mu kazubu bua nuandamune nkonko eyi:
-
A) Nebukadenesâ wakamona tshinyi mu tshilota tshiende?—Tangila mvese wa 20 ne wa 21.
-
B) Ntshinyi tshivua ne bua kufikila mutshi au?—Tangila mvese wa 23.
-
C) Ntshinyi tshivua ne bua kuenzeka ku ndekelu kua ‘bikondo 7’?—Tangila mvese wa 26.
Mudi mutshi wa mu tshilota upetangana ne Bukalenge bua Nzambi
MÊYI A BUPROFETE (Danyele 4:20-36)
Bukokeshi
A) Mutshi munene
Bimanyika bukokeshi
B) “Upulayi mutshi au,” nuwushiye too ne ‘papita bikondo 7’
Dijadikulula dia bukokeshi
C) “Bukalenge buebe nebuikale buebe kabidi”
Mu dikumbana dia kumpala dia mêyi a buprofete au . . .
-
D) Mutshi au uvua nganyi?—Tangila mvese wa 22.
-
E) Mmunyi muakimanyikabu bukokeshi buende?—Balayi Danyele 4:29-33.
-
F) Ntshinyi tshiakafikila Nebukadenesâ ku ndekelu kua ‘bikondo 7’?—Balayi Danyele 4:34-36.
DIKUMBANA DIA KUMPALA
Bukokeshi
D) Nebukadenesâ, mukalenge wa Babilona
Bimanyika bukokeshi
E) Panyima pa 606 K.Y., Nebukadenesâ wakapala, kupangilaye kukokesha munkatshi mua bidimu 7
Dijadikulula dia bukokeshi
F) Nebukadenesâ wakapetulula lungenyi, kutuadijaye kukokesha kabidi
Mu dikumbana dibidi dia mêyi a buprofete au . . .
-
G) Mutshi au uvua banganyi?—Balayi 1 Kulondolola 29:23.
-
H) Mmunyi muakimanyikabu bukokeshi buabu? Bua tshinyi tudi tuamba ne: too ne patshivua Yezu pa buloba kabavua anu bakokesha to?—Balayi Luka 21:24.
-
I) Bakajadikulula bukokeshi abu dîba kayi ne penyi?
DIKUMBANA DIBIDI
Bukokeshi
G) Bakalenge ba mu Isalele bavua baleji mpala ba bukokeshi bua Nzambi
Bimanyika bukokeshi
H) Bakabutula Yelushalema, kuimanyikabu dilondangana dia bakalenge ba mu Isalele munkatshi mua bidimu 2 520
Dijadikulula dia bukokeshi
I) Yezu ubanga kukokesha bu Mukalenge wa Bukalenge bua Nzambi mu diulu
Bikondo 7 bidi bule kayi?
Mvese kampanda ya mu Bible idi ituambuluisha bua kumvua mikuabu. Tshilejilu, mukanda wa Buakabuluibua udi wamba ne: bikondo 3 ne tshitupa bidi ne matuku 1 260. (Buakabuluibua 12:6, 14) Bikondo 7 bidi ne matuku 1 260 misangu ibidi, tuambe ne: matuku 2 520. Mu Bible, kudi misangu itu dituku dimue diumvuija tshidimu tshimue. (Yehezekele 4:6) Ke mudibi bua bikondo 7 bidi mu mukanda wa Danyele. Bidi biumvuija bidimu 2 520.
5. Malu a panu mmashintuluke katshia ku 1914
Yezu ukavua mumanyishe malu avua ne bua kuenzeka pavuaye ulua Mukalenge. Balayi Luka 21:9-11, pashishe nuandamune lukonko elu:
-
Mmalu kayi adi mu mvese eu aukadi mudimuenene anyi aukadi mumvue menzeke?
Mupostolo Paulo wakumvuija muvua bantu ne bua kuikala mu matuku a ku nshikidilu a bukokeshi bua bantu. Balayi 2 Timote 3:1-5, pashishe nuandamune lukonko elu:
-
Mbikadilu kayi biudi umona mu bantu lelu?
6. Bukokeshi bua Bukalenge bua Nzambi budi butusaka ku tshienzedi
Balayi Matayi 24:3, 14, pashishe nuandamune nkonko eyi:
-
Mmudimu kayi wa mushinga udi uleja ne: Bukalenge bua Nzambi bukadi bukokesha mpindieu?
-
Mmunyi muudi pebe mua kuenza mudimu au?
Bukalenge bua Nzambi bukadi bukokesha mpindieu, dituku dikalabu mua kukokesha buloba bujima dikadi pabuipi. Balayi Ebelu 10:24, 25, pashishe nuandamune lukonko elu:
-
Bu mutudi ‘tumona dituku adi dienda disemena pabuipi,’ ntshinyi tshidi yonso wa kutudi ne bua kuenza?
Wewe mumanye tshintu tshidi mua kuambuluisha bakuabu ne kubapandisha, newenze tshinyi?
MUNTU YEYE MUKUEBEJE NE: “Bua tshinyi Bantemu ba Yehowa batu bakula bikole bua 1914?”
-
Neumuambile tshinyi?
TSHIA KUKUATA
Mêyi a buprofete, dilondangana dia bidimu bia mu Bible, ne malu adi enzeka pa buloba bidi bijadika ne: Bukalenge bua Nzambi bukadi bukokesha mpindieu. Tudi tuleja mutudi tuitabuja bualu ebu patudi tuyisha ne tubuela mu bisangilu.
Diambulula
-
Ntshinyi tshiakenzeka ku ndekelu kua bikondo 7 bikavua mukanda wa Danyele mumanyishe?
-
Ntshinyi tshidi tshikujadikila ne: Bukalenge bua Nzambi buakatuadija kukokesha mu 1914?
-
Tshiudi mua kuenza bua kuleja ditabuja diudi nadi ne: Bukalenge ebu bukadi bukokesha mpindieu ntshinyi?
BIA KUTANGILA KABIDI
Mona tshidi bamanyi ba malu a kale ne bantu bakuabu bamba bua malu adi mashintuluke pa buloba katshia ku 1914.
“Dîba diakabanga bikadilu kunyanguka bikole menemene” (Tabulukayi! 4/2007)
Bala umone muvua mêyi a buprofete adi mu Matayi 24:14 mashintulule nsombelu wa muntu.
“Mvua munange kunaya base-ball kupita tshintu kayi tshionso!” (Tshibumba tshia Nsentedi No. 3 2017)
Bua tshinyi tudi tuamba ne: mêyi a buprofete adi mu Danyele nshapita 4 adi atangila Bukalenge bua Nzambi?
Tshidi tshileja ne: ‘bikondo 7’ bidi mu Danyele nshapita 4 biakajika mu 1914 ntshinyi?
a Tangila biena-bualu bibidi bia ndekelu bia dilongesha edi bidi mu tshitupa tshia Bia kutangila kabidi.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
